Read Capanahua Filípiyɛ̧́ri̧ 3 Bible Online

Filípiyɛ̧́ri̧ 3 - Capanahua bible

Filípiyɛ̧́ri̧ 3

¹Dáy a ŋgɛŋnɛ́ nyîn nírí̧, í ri mûn a wǎyri, ɓay a káwa a wǎyri mbêw kuu Gáŋmbây! Ɓayhí̧lé, mi tí ta̧ bɔʼɔ mbêw, ɓay a mí saɓay ka mi tí ɗé hí̧ wǎyri dá yá, ɓayhí̧lé ná ɓá hɛ̧ a béláké hí̧ wǎyri.

²Í ŋgbátûl a wǎyri ɓá béláké kuu njuku niŋ hɛ̧ belyákéri, vâari nɔ́, ka hí̧ nɛ́rɛ̧ hí̧ ndá ganzá mambáy!

³Dáy, ɓá manárí̧ pé erú ka ndá ganzá a gbátké, ɓayhí̧lé manárí̧ ná niŋ péna a Gáŋvbôn ka ŋgboro a Têm pukí a mɛ̌, ná erú ka mûnrína kaw ɓá njuku a Zezú Kirisri, ná zi ɓá kɛrɛ a manárí̧ ka̧n tûl hɛ̧ ka hí̧ wélé hí̧ njukuri yá.

⁴Mí ɓá nǎŋ, mǐ kɔ́, mi ma niŋ wélé sé tûl hɛ̧ nɔ́rí̧ ka njuku a fékéri niŋ wélé sé tûlkéy, mi e ka ŋgboro reniŋ tá a ge lé too.

⁵Mǐ, kú ɓá mí ndá ganzá nâm zíndɔ̂ʼɔsére a fal mbuŋ mí. Mi kaw ɓá gun Izirayɛ́l, ka bɔʼɔdii ká̧na a Bɛŋzamɛŋ, mi kaw ɓá Hebiré, bâa a mǐ rá̧ mâa a mǐ ɓá Hebiré. Ka ŋgboro a tu sáŋna lé, mi ɓá fariziyɛ̧́,

⁶mi mbí mûn ní a ɓilké ka ŋgɛ́rɛ a mǐ too, ka ɓá Egilize tɔ́ʼɔsêe. Ka ŋgboro a tɔ́ŋ hɛ̧ ka sáŋna vbíy lé, njuku ka e saɓay a mǐ belyá sé tûlké zi tí yá.

⁷Dáy hɛ̧ nɔ́rí̧ ka mi tí kó ɓá béla hɛ̧ ka nûn ní, ŋgɛŋnɛ́ mi kó ɓá hɛ̧ a baaké ɓay tûl a Kiris.

⁸Nǎŋnɔ́, mi kó hɛ̧ri̧ too ka nûn ní ɓá hɛ̧ a baaké, ɓay tûl béla ka ndé hɛ̧ too ka hɔ̧́na ka ɓá: Tu Zezú Kiris Gáŋmbây a mǐ, ka ɓay tûlé, mi pɔŋ hɛ̧ri̧ too, a kó ɓá báŋa tûl râw ka nûn ní, rá̧lǒo mi ziŋ Kiris,

⁹a mí ziŋ kaw mbêw kuu mɛ̌ ɓá béláké. Mi zi kó mûn ní ɓá báŋa njuku a ndáráké ka ŋgboro sáŋna nyá, dáy mi kó mûn ní ɓá njuku a ndáráké, ka ŋgboro láɓulaw hí̧ Kiris. Káwa a ndáráké nɔ́ ka gí ka ŋgboro a Gáŋvbôn, ka ew tûl láɓulaw.

¹⁰Hɛ̧ too ka mi ziy, ɓá tu Kiris rá̧ kpɔ́ŋa ka toma nɛ́ a bazeŋ a hûlri rá̧ ziŋ tɔ́ʼɔsêe ɛ́ŋ nɛ́, rá̧ ziŋ hûl ɓá báŋa a mɛ̌ kɔ́,

¹¹rá̧lǒo mǐ kɔ́, mí ziŋ toma a bazeŋ a hûlri.

¹²Mi zi sa ɓá, mi ziŋ hɛ̧ ka mi ŋgú ɓayké dá malé mi tɛ̧́ njuku a béláké dá yá. Ɓayhí̧lé Zezú Kiris ŋgbá ndɔ̂ʼɔní, mi ŋgú a rú mûn ní ɓay a mi ziŋ kpáʼandɔ̂ʼɔké.

¹³Tí nǎŋ nyá, nyîn nírí̧, mi zi kó mûn ní ɓá mi ziŋ kpáʼandɔ̂ʼɔké dá yá, dáy mi niŋ hɛ̧ mbêw: Mi yɛʼɛrɛ hɛ̧ too ka e a fal ní, ka rú mûn ní ɓay a ka̧ hɛ̧ ka e a mbɛl ní.

¹⁴Mi ŋgú gé ɓá mbɛl, rá̧lǒo mi ziŋ kpáʼandɔ̂ʼɔké ka Gáŋvbôn, ka ŋgboro a Zezú Kiris ɗí nárí̧ ɓay a ná ziŋ a nûnalê.

¹⁵Manárí̧ too, ka ɓá njuku a kpáʼakéri a ɓil láɓulaw, belɓá ná erú ka kɛrɛ a mbêwké. Rá̧ wǎyri mí e ka kɛrɛ a féké a bazeŋ a wǎyri lé, Gáŋvbôn e ten hí̧ wǎyri táŋáké.

¹⁶Dáy ŋgboro nɔ́, ka ná tí serú gí ka̧ sénɛ́, belɓá ná tɔ́ŋ ŋgboro a mbêwké nɔ́ manárí̧ too sé mbɛl.

¹⁷Nyîn nírí̧, í mbɛl bɔʼɔséna a mǐ wǎyri too, a í ɓá ɛ̧rɛ̧ gel a wǎyri ka̧n tûl a njukuri ka tɔ́ŋ bɔʼɔséna nɔ́y.

¹⁸Katína, mi tí sa hí̧ wǎyri dá, dáy mi resa hí̧ wǎyri a ŋgɛŋnɛ́ ɓáy, ka vúna: Njukuri ɓá ŋgɛ̧́náké erú, ka séséna ɓá báŋa njuku ŋgá̧nari̧ a dii vbatay Kiris.

¹⁹Kɔ́rɔ́ a kuriri ɓá ɓɔ́la. Ɓayhí̧lé vbôn a kuriri, ɓá ɓil a kuriri. Kú rí mûn a kuriri sé tûl hɛ̧ ka ɓá hɛ̧ ɓá sɔ̧rɔ̧ ka̧n nûn a kuriri, kɛrɛ a kuriri gé ɓá tûl hɛ̧ a tísiriri mbêw yáŋ.

²⁰Dáy a manárí̧, ná kaw ɓá njuku a nûnalêri. Ná zoko njuku pɛ̧́ nárí̧ Gáŋmbây Zezú Kiris ka e gína ka sá̧y.

²¹Ké e gí fere mûn sêe a manárí̧, ka reɓá tɛ̧́ mûn ka ɛ́ŋ nɛ́ ka hɔ̧́na, ka ŋgboro a kpɔ́ŋa a ké erú ɓay a ɓá hɛ̧ri̧ too kɔ̧ bɛʼɛ.