Read Capanahua Kolosiyɛ̧́ri̧ 1 Bible Online

Kolosiyɛ̧́ri̧ 1 - Capanahua bible

Kolosiyɛ̧́ri̧ 1

¹Mǐ Pôl, apotere a Zezú Kiris, ka zína a Gáŋvbôn, mi ɗé mbété nɛ́ kuu Timoté nyîn a manárí̧,

²hí̧ wǎyri njuku a Gáŋvbônri̧, ka e a tísiri a Kolos, wǎyri ka kaw ɓá nyîn a manárí̧ a ɓil káwa mbêw kuu Kiris: Gáŋvbôn, Bâa a manárí̧, ké hí̧ wǎyri béla rá̧ a vónáké a mɛ̌!

³Rú kaw gɔ́ŋ Gáŋvbôn, Bâa a Gáŋmbây a manárí̧ Zezú Kiris, ɓay tûl a wǎyri, a kaw zi awá dát hí̧ nɛ́.

⁴Dáy katína rú lá, ɓay a láɓulaw a wǎyri hí̧ Zezú Kiris, rá̧ zína ka i tɔ́ʼɔ hí̧ njuku láɓulawri tooy,

⁵ɓay tûl kɛrɛ ka Gáŋvbôn mɔny zoko wǎyri a nûnalê. Kɛrɛké nɔ́, kú sa hí̧ wǎyri ka ŋgboro a gbátɓay ka ɓá Bélaɓay.

⁶Bélaɓayké nɔ́ ka̧ gel a wǎyri, ɓá báŋké a ké léy, ka a wal ma tísiri tooy. Ké niŋ ɓá báŋké nɔ́ a bazeŋ a wǎyri, tí ka sêe ka i nyá ka a tu béla a Gáŋvbôn ɓá gbátké,

⁷ɓá báŋké ka i ziŋ hɛ̧tɔ́ʼɔ a gel a Epafáras, ka ɓá mbáŋa a maná rá̧ mbáŋa a péna a maná. Ké niŋ péna a gel a manárí̧ hí̧ wǎyri ɓá báŋa njuku péna law mbêw a Kiris.

⁸Ké sa hí̧ rú zína ka Têm Pukí hí̧ wǎyri.

⁹Ɓaykénɔ́ pé ɓurú kɔ́, tí ka sêe ka rú láɓayké nɔ́, rú zi pɔŋ gɔ́ŋ Gáŋvbôn ɓay a wǎyri yá. Rú vbí Gáŋvbôn ɓá ké hí̧ wǎyri hɛ̧túna sé tûl hɛ̧ a ké ziy, ka ŋgboro a rɔ̧́na rá̧ hɛ̧túna ka Têm a mɛ̌ hí̧y.

¹⁰Nǎŋnɔ́, i e sé bɔʼɔséna ɓá báŋké ka Gáŋmbây ziy, a ɓil niŋ hɛ̧ a ké ziy dát. A reniŋ mára̧ péna a bélákéri too, a hɔ̧́ a ɓil hɛ̧túna a Gáŋvbôn,

¹¹nǎŋnɔ́, i e ziŋ ŋgɛ́rɛ a ɓil hɛ̧ri̧ too, ka ŋgboro a kpɔ́ŋa hɔ̧́na a mɛ̌, rá̧ i ma ew kpú a ɓil ŋgá̧law a wǎyri sé tûl hɛ̧ri̧ too.

¹²Í zi awá hí̧ Bâa, Gáŋvbôn ka sáʼa: Ké hí̧ wǎyri ŋgboro ziŋ béla a ké mɔny zoko njuku a mɛ̌ri̧ a ɓil Pû Mbây a mɛ̌.

¹³Ké ten nárí̧ a ɓil kpɔ́ŋa a tirí̧ma, a ɓá nárí̧ sé kaw ɓil Pû a Gun zína a mɛ̌.

¹⁴Ka ŋgboro a Gun a mɛ̌ nɔ́, pé ké lú nárí̧ a ɓil hɛ̧ a belyáké, pé a turu ɓéké a manárí̧.

¹⁵Kiris kaw ɓá Têm mûn a Gáŋvbôn ka njuku zi kó yáy, ké kaw ɓá titíla a gun, ka ɓil hɛ̧ri̧ too ka Gáŋvbôn mɔny.

¹⁶Ɓayhí̧lé ka ŋgboro a mɛ̌, pé Gáŋvbôn mɔny hɛ̧ri̧ too a nûnalê rá̧ tísiri, hɛ̧ri̧ ka nûn kó, rá̧ hɛ̧ri̧ ka nûn zi kó yáy, ŋgɛ́rɛri rá̧ têmri̧, ka kaw tûl a njukuri rá̧ kpɔ́ŋay. Gáŋvbôn mɔny hɛ̧ri̧ too ka ŋgboro a mɛ̌ ɓay a mɛ̌.

¹⁷Kiris tí e ɗambɛl a hɛ̧ri̧ too, mɛ̌, pé ɓá hɛ̧ri̧ too kaw gel káwa a kuriri.

¹⁸Mɛ̌, pé kaw ɓá tûl a mûn ka ɓá Egilize; Mɛ̌ pé kaw ɓá tí táʼa káwa a ŋgɛŋké, ké kaw ɓá titíla gun, titíla njuku ka tí toma a ɓil a hûlri, ɓay a kaw ɓá ɗambɛl hɛ̧ri̧ too.

¹⁹Ɓayhí̧lé ri Gáŋvbôn, ɓay a ké ɓá káwa a mɛ̌ too kɔ̧ ɓil mûn a Gun a mɛ̌.

²⁰Gáŋvbôn zi a ŋgboro a Kiris, pé a ɓá láhá̧na ka̧n bazeŋ a njukuri too ka tísiri rá̧ nûnalê kuu mɛ̌. Ka ŋgboro a hûl a Kiris ka tûl dii vbatay, pé Gáŋvbôn ɓá a vónáké kɔ̧ bazeŋ a njukuri too; ka tísiri rá̧ nûnalê.

²¹Wǎyri kɔ́, tâ̧wké i kaw ɓá gɔ́rɔ́ rá̧ njuku ŋgá̧na a Gáŋvbôn, ɓay tûl hɛ̧ a belyákéri too ka i kɛrɛ, ka a niŋ.

²²Dáy ŋgɛŋnɛ́, Gáŋvbôn ɓá wǎyri láhá̧na kuu mɛ̌, ka ŋgboro a hûl a Gun a mɛ̌, ka mbí mûn a njuku, ka a tɔ́ʼɔsêe a ɓil mûnké, ɓay a ɓá wǎyri gí mbɛl a Gáŋvbôn ɓá táŋáké, táŋ ɓékéhɛ̧, ka njuku a há̧na ma sa ɓéké ɓay sé tûl a wǎyri yáy.

²³Dáy, belɓá í kaw a ɓil láɓulaw, a í kaw ɓá kpúnáké ka tûl ndálvûn, táŋ ɗí ka kɛrɛ. Kɛrɛké nɔ́, ka i erú í̧ŋásá̧, tí a i lá Bélaɓay. Bélaɓayké, kú tɔ́ʼɔ hí̧ njukuri too, mǐ Pôl, mi tɛ̧́ njukupéna a Bélaɓayké nɔ́.

²⁴Mi e ka sáʼa a ŋgɛŋnɛ́, ka ɓil tɔ́ʼɔsêe a mí ɓay a wǎyri. Ɓayhí̧lé a ɓil káwa a mǐ, mi zi ɓá mí ɔrɔ hɛ̧ a zi ka ɓil tɔ́ʼɔsêe a Kiris, ɓay a mûn nɛ́, ka ɓá Egilize.

²⁵Mi tɛ̧́ njukupéna a Egilize, sé tûl nzáʼapéna, ka Gáŋvbôn hí̧ mí ɓay a wǎyri: ɓá tɔ́ʼɔɓay a mɛ̌ hí̧ wǎyri,

²⁶zi ɓay a sa ɓá, hɛ̧ a múnáké a ké ɓá mú njukuri í̧ŋásá̧y. Dáy a ŋgɛŋnɛ́, ké ten táŋáké hí̧ njukuri ka láɓulaw.

²⁷Ɓayhí̧lé, Gáŋvbôn zi ɓay a ké tɔ́ʼɔ kuriri hɔ̧́na a hɛ̧zíŋa a hɛ̧ a múnáké nɔ́, a ké mɔny ɓay tûl a njukuri tooy. Hɛ̧ a múnáké nɔ́, ɓá: Kiris e a bazeŋ a wǎyri, a hí̧ wǎyri mbílaw ɓá i e ziŋ káwa a ɓil hɔ̧́na a Gáŋvbôn.

²⁸Ɓá Kiris, pé ná tɔ́ʼɔ, a ɓil nzɛ́rɛ njukuri, ɓil tɔ́ʼɔ ŋgboro hí̧ kuriri mbêw mbêw too, ka ŋgboro a rɔ̧́na, ɓay a ɓá njuku too, kpáʼa a ɓil Têm Pukí, ka ɓil káwa mbêw kuu Kiris.

²⁹Ɓaykénɔ́, pé mi niŋ péna, ka rúbére a ŋgɛ́rɛ ka gí a gel a Kiris, ka a niŋ péna a ɓil mûn ní ka kpɔ́ŋay.