Read Capanahua Kolosiyɛ̧́ri̧ 2 Bible Online

Kolosiyɛ̧́ri̧ 2 - Capanahua bible

Kolosiyɛ̧́ri̧ 2

¹Mi zi ɓá i tu, ŋgɛ́rɛ bére ka mi rú ɓay tûl a wǎyri, ɓay a njuku a Lawdiséri rá̧ ɓay njukuri too, ka zi kó mí bɔʼɔ mbêw yá ɓáy.

²Mi zi ɓá kú ziŋ kpúna a ɓil law a kuriri, a kú kaw mbêw a ɓil zína, a kú mbá ka hɛ̧túna, ɓay a tu hɛ̧ a múnáké a Gáŋvbôn, ka ɓá Kiris, mɛ̌ ka mûn nɛ́.

³Ɓá a gé lé pé hɛ̧zíŋári̧ ka kó rɔ̧́na rá̧ hɛ̧túnari̧ too, mú rúy.

⁴Mǐ sa hí̧ wǎyri ɓay nɛ́, ɓay a njuku a há̧na ké zi ná rɔ́ʼɔ wǎyri ka ŋgboro a ɓay a manyákéri.

⁵Nǎŋnɔ́, mǐ, mí zi tí a bazeŋ a wǎyri yáy, mi e kuu wǎyri ka ŋgboro a têm, dáy mi e ka sáʼa kó wǎyri too, ew ɓá béláké ka kpú a ɓil láɓulaw a wǎyri hí̧ Kiris.

⁶Ɓá báŋké nɔ́, ka i nyá Zezú Kiris ɓá Gáŋmbây a wǎyri, belɓá, í mára̧ káwa a wǎyri mbêw kuu mɛ̌.

⁷Í ɓara sɛ̧w a wǎyri, a i mɔny káwa a wǎyri too ka̧n tûlé. Í kpú a ɓil láɓulaw a wǎyri gé ɓá mbɛl, ɓá báŋké ka i ziŋ ka ɓil tɔ́ʼɔhɛ̧, a í zi awá ɓá ŋgɛ̧́náké hí̧ Gáŋvbôn.

⁸I kó rá, ɓay a njuku a há̧na, ké zi ná rɔ́ʼɔ wǎyri, ka ŋgboro a nzáʼa rɔ́ʼɔ baa, ka ɓá rɔ̧́na a njukuri: ka ew tûl hɛ̧ niŋa a njukuri, tûl ŋgɛ́rɛ a têm a tísiriri, a zi tí ɓá tûl kpɔ́ŋa a Kiris yáy.

⁹Ka ŋgboro a Kiris, ná kó Gáŋvbôn a ɓil káwa a mɛ̌ too;

¹⁰Nǎŋnɔ́, i ziŋ hɛ̧ri̧ too ka ŋgboro Kiris, mɛ̌, ka kaw ɓá mbây a lásarari too rá̧ kpɔ́ŋa a têmri̧ too.

¹¹A ɓil káwa mbêw kuu Kiris, i ziŋ ndá ganzá, ndá ganzáké nɔ́, tí ɓá ndɔ̂ʼɔ a njuku pé niŋ nyá, ɓá ndá ganzá ka gí ka ŋgboro a Kiris, ka ten nárí̧ a ɓil káwa ɓéké.

¹²Nǎŋnɔ́, ka ŋgboro nyá batêm, kú goro wǎyri mbêw kuu Kiris, dáy i ziŋ toma a hûl mbêw kuu Kiris, ka ŋgboro a láɓulaw hí̧ kpɔ́ŋa a Gáŋvbôn ka toma Kiris a bazeŋ a hûlri.

¹³Í̧ŋásá̧, i ziŋ hûl ka ŋgboro a têm, ɓay tûl ɓéké a wǎyri, ɓay a hɛ̧ ka i zi ndá ganzá yáy, a kaw ɓá njukuri ka zi tu Gáŋvbôn nyáy. Dáy a ŋgɛŋnɛ́, Gáŋvbôn hí̧ wǎyri ndísɛ̌ʼɛ kuu Kiris, a turu ɓékéhɛ̧ a manárí̧ too.

¹⁴Ké lú mbété ka saɓay sé tûl ɓékéhɛ̧ a manárí̧ ka ɓá ɓay ŋgbá nárí̧, a ɓara ka̧n tûl dii vbatay.

¹⁵Nǎŋnɔ́, pé Gáŋvbôn lú ŋgɛ́rɛ rá̧ kpɔ́ŋa a têmri̧ too, a ŋgá̧ kuriri ɓá báŋa njuku vûn sɛlri, a kɔʼɔ, a ɓá sɔ̧rɔ̧ ŋgbá kuriri a ɓil a dawá, a ɓil mára̧ ndéna a Gun a mɛ̌ ka tûl dii vbatay.

¹⁶Njuku a há̧na, ké zi ná ɓá ɓay ŋgbá wǎyri sé tûl lâʼa malé hɛ̧ nzóna, sé tûl záy fêw a ŋgɛŋké malé sé tûl nâm ɔʼɔ yá.

¹⁷Hɛ̧ nɔ́rí̧ too, ná ɓá têm hɛ̧ri̧ ka e gínay. Dáy hɛ̧ a gbátké, ɓá Kiris.

¹⁸Í zi ná pɔŋ kú ɓá ɓay ŋgbá wǎyri, njukuri ka ziŋ mûnrína a kuriri, a ɓil niŋ mûn tɛ̧́w ka nûn a njukuri, rá̧ ɓil ɗél aŋnzeri, ka hí̧ nɛ́rɛ̧ mambá hí̧ hɛ̧ri̧, a kú kó a ɓil lɔ́lari. Mára̧ njuku nɔ́rí̧, mbá ka hɔ̧́tûl ka zi tí ka nɛ́rɛ̧ nyá, ka gí a ŋgboro a kɛrɛ a kuriri ka ɓá hɛ̧kɛ́rɛ a njukuri.

¹⁹Kú zi kaw mbêw kuu Kiris, ka ɓá tûl yá. A tu ɓá, ka ŋgboro a Kiris, pé mûn too ziŋ lâʼa a béláké, rá̧ tûl ɗɔ́ʼɔlari too, ziŋ ŋgbá mbɛ̧́nɛ́ ka nɛ̧̂w ɓá béláké, ka hɔ̧́ ɓá báŋké ka Gáŋvbôn ziy.

²⁰I ziŋ hûl kuu Kiris, dáy kú lú wǎyri a ɓil ŋgɛ́rɛ a têm a tísiriri dá, dáy ɓayhí̧rá̧, i kaw, ɓá báŋa káwa a njuku a tísiriri ɓáy, a i zibɔʼɔké ɓá, kú hí̧ wǎyri sáŋna ɓá:

²¹«Mɔ́ zi ná mbí hɛ̧ nɛ́», «Mɔ́ zi ná lé hɛ̧ nɛ́», «Mɔ́ zi ná ɗa hɛ̧ nɛ́» lé?

²²Hɛ̧ nɔ́rí̧ too, ná ɓá hɛ̧ ka e ɓewa, ka njuku, mí mbí ka niŋ péna rúy. Ɓá sáŋnari̧ rá̧ hɛ̧tɔ́ʼɔ a njukuri baa, zi tí ka nɛ́rɛ̧ nyá!

²³Katína sáŋnakéri, a kó ná nûn, ná ɓá hɛ̧ rɔ̧́náké, ɓayhí̧lé, ké sa hɛ̧ láɓulaw a njuku, sé tûl niŋ mûn tɛ̧́w rá̧ ɓá mûn tɔ́ʼɔsêe ka ŋgɛ́rɛ, dáy a nɔ́rí̧ too, nɛ́rɛ̧ké zi tí yá, ná ɓá niŋ hɛ̧ ka hay mûn a manárí̧ ziy.