Read Capanahua Kolosiyɛ̧́ri̧ 3 Bible Online

Kolosiyɛ̧́ri̧ 3 - Capanahua bible

Kolosiyɛ̧́ri̧ 3

¹I ziŋ toma ka hûl kuu Kiris. Nǎŋnɔ́, í ɛ́ hɛ̧ri̧ ka e a nûnalê, gelka Kiris erú, ka a kaw a ndɔ̂ʼɔ lâʼa a Gáŋvbôn.

²Í ɓá kɛrɛ a wǎyri sé tûl hɛ̧ ka e a nûnalê, a zi tí ɓá, sé tûl hɛ̧ ka e a tísiri yá.

³Ɓayhí̧lé, i ziŋ hûl, dáy ndísɛ̌ʼɛ a wǎyri mú kuu Kiris a gel a Gáŋvbôn.

⁴Kiris ɓá gbát ndísɛ̌ʼɛ a wǎyri. Sêe a ké e tɔ́ʼɔ mûn nɛ́, wǎyri kɔ́, i e tɔ́ʼɔ mûn a wǎyri kuu mɛ̌, a ziŋ káwa a ɓil hɔ̧́na a mɛ̌.

⁵Ɓaykénɔ́ belɓá, i í hɛ̧ ka mûn a wǎyri ka ɓá hɛ̧ a tísiri, ɓá báŋa: Ɓéké káwa, káwa a táŋnyáké, zi hɛ̧ ka ndé ŋgɛ́rɛ, haŋhɛ̧ a belyákéri rá̧ sɛ̧ŋlâʼa, ɓayhí̧lé sɛ̧ŋlâʼa ɓá pú vbônri̧.

⁶Hɛ̧ nɔ́rí̧ pé kɔʼɔ hɛ́rɛ a Gáŋvbôn sé tûl a njukuri ka zi lá nzɛ́ʼɛ yáy.

⁷Ɓá nǎŋnɔ́, pé ɓá káwa a wǎyri í̧ŋásá̧y, ka i e a ɓil ɓékéhɛ̧ nɔ́rí̧.

⁸Dáy a ŋgɛŋnɛ́, í pɔŋ hɛ̧ nɛ́rí̧ too ɓá báŋa: Hɛ́rɛ, haŋfá̧na rá̧ ŋgbɔ́rɔ. Hɛ̧ fára rá̧ ndóla, ké tɛ̧́ a nzáʼa a wǎyri yá.

⁹I kúŋɓay ka̧n nzáʼa a há̧narí̧ nyá, ɓayhí̧lé, tâ̧w káwa a wǎyri, i lú gefal ɓá báŋa tâ̧w laa, ka péna niŋákéri too dá.

¹⁰Dáy, i ri mûn a féké, a retɛ̧ njuku a ŋgɛŋké dá. I kaw ɓá njuku a ŋgɛŋké, ka Gáŋvbôn, ka mɔny nárí̧, refére mûnké dát ɛ́ŋ têm mûn nɛ́y, ɓay a i tu nɛ́ ɓá táŋáké.

¹¹Ŋgɛŋnɛ́, njukuri ka ɓá Juyíf malé tí ɓá Juyíf yáy, rá̧ njukuri ka ndá ganzá malé ndá ganzá yáy, zi tí mbaa. Njuku hɛ̧túna rá̧ njuku ka tuhɛ̧ nyáy, zi tí mbaa. Koy rá̧ njuku ka zi tí ɓá koy yáy, zi tí mbaa. Dáy hɛ̧ ka e ka nɛ́rɛ̧y, ɓá Kiris, ké ɓá hɛ̧ too, a e ɓil hɛ̧ri̧ too.

¹²I kaw ɓá njuku a Gáŋvbôn; ké ten wǎyri, a zi wǎyri. Ɓaykénɔ́, í mbílaw zína, haŋnjuku, mbí mûn tɛ̧́w yáŋ, law a pá̧na rá̧ ikilaw.

¹³I ikilaw hí̧ há̧narí̧, rá̧ njuku mí erú ka ɓay ziŋ mbɛ́ŋnɛ́ lé, i vbá̧buma ziŋ há̧narí̧ ɓá báŋké ka Gáŋmbây vbá̧buma ziŋ wǎyri.

¹⁴Tapátké too ɓá, í zi há̧narí̧: Zína ɓá hɛ̧ ka mára̧ káwa a njukuri mbêw.

¹⁵A vónáké a Kiris ké kaw ɓil law a wǎyri! Ɓayhí̧lé ɓá ɓay a vónáké nɔ́, pé Gáŋvbôn ɗí wǎyri, ɓay a i retɛ̧ hay mûn mbêw. I zi awá hí̧ nɛ́ dát.

¹⁶Ɓay a Kiris rá̧ hɛ̧zíŋáké too, ké kaw kuu wǎyri. Í tɔ́ʼɔhɛ̧ hí̧ há̧narí̧, a í nzɛ́rɛ há̧narí̧, ka ɓil rɔ̧́na ɓá ŋgɛ̧́náké. Í ɗí si̧ŋ hí̧ Gáŋvbôn, a zi awá hí̧ nɛ́ ka law a wǎyri too, ka si̧ŋ a mbây Davít, rá̧ si̧ŋ a fékéri ka gí ka ŋgboro a Têm Pukí.

¹⁷Hɛ̧ri̧ too ka i niŋ, ka ŋgboro a ɓayri malé ka ŋgboro a péna niŋa lé, í niŋ ka rɛŋ a Gáŋmbây Zezú, a í zi awá ka ŋgboro a mɛ̌ hí̧ Gáŋvbôn, Bâa a manárí̧.

¹⁸Wûnynjukuri, í pɔtûl a wǎyri hí̧ wɔ̧rɔ̧́ a wǎyri, ɓá báŋké ka belɓá í niŋ hí̧ Gáŋmbây.

¹⁹Wɔ̧rɔ̧́njukuri, í zi wûny a wǎyri, a í zi ná kpúlaw ziŋ kuriri.

²⁰Gunri̧, í lá nzáʼa a bâa rá̧ mâa a wǎyri, sé tûl hɛ̧ri̧ too, nǎŋnɔ́ pé Gáŋmbây ziy.

²¹Bâari rá̧ mâari̧, í ɓá hɛ́rɛ ka̧n law a gun a wǎyri yá, ɓay a mûn a kuriri, ké zi ná hú.

²²Koyri, ka tûl hɛ̧ri̧ too, í lá nzáʼa a bákáwa a wǎyri a tísiri. Í zi ná niŋ péna ɓay a nûn a kuriri, ɓay ké ri law a kuriri. Dáy, í lá nzáʼa kuriri ka law a táŋáké, ɓay tûl hɛ̧ hɛʼɛ, ka i erú ɓay a Gáŋmbây.

²³Hɛ̧ri̧ too ka i e niŋáké, í niŋ ka law a wǎyri too ɛ́ŋ lǒo, i kaw niŋ hí̧ Gáŋmbây, a zi tí ɓá hí̧ njukuri yá.

²⁴Ɓayhí̧lé i tu, Gáŋmbây e hí̧ wǎyri kpáʼandɔ̂ʼɔké. I e ziŋ bélari too a ké koro zoko njuku a mɛ̌ri̧. Ɓayhí̧lé gbát bákáwa, ka i kaw niŋ péna hí̧ nɛ́y, ɓá Kiris.

²⁵Njuku ka niŋ hɛ̧ a belyákéy, e ziŋ kpáʼandɔ̂ʼɔ ɓéké péna a mɛ̌, ɓayhí̧lé, Gáŋvbôn zi wal káwa a njuku yá.