Read Capanahua Kolosiyɛ̧́ri̧ 4 Bible Online

Kolosiyɛ̧́ri̧ 4 - Capanahua bible

Kolosiyɛ̧́ri̧ 4

¹A wǎy bákáwari, í niŋ hí̧ koy a wǎyri ka law mbêw, ka ŋgboro a ndáráké. Í zi ná yɛʼɛrɛ ɓá wǎyri kɔ́, i erú ka bákáwa a wǎyri a nûnalê.

²Í kaw ɓil gɔ́ŋ Gáŋvbôn dát, a í ná nâm a ɓil gɔ́ŋ Gáŋvbônké yá, a i zi awá hí̧ nɛ́.

³Í gɔ́ŋ Gáŋvbôn hí̧ rú pí, ɓay a ké ŋgburu ŋgboro tɔ́ʼɔɓay a mɛ̌, ɓay a rú ten hɛ̧ a múnáké a Kiris, ɓayhí̧lé ɓá ɓayké nɔ́, pé mi e ka vûn sɛl.

⁴Í gɔ́ŋ Gáŋvbôn rá̧ mí ziŋ saɓay hɛ̧ké kɔ́ kála ɓá táŋáké, ɓá báŋké nɔ́ ka mi e sanáké.

⁵Í tu ŋgboro séséna kuu njukuri ka zi tí ɓá njuku a Kirisri yáy, a í zi ná pɔŋ sɛl a sêe ka Gáŋvbôn hí̧ wǎyri, ké tá kɔ̧ kpâa baa.

⁶Ɓay a wǎyri, ké mbá ka ɓay volaw rá̧ ɓay a rínaké dát rá̧ í tu rerú ka ŋgboro ɓay hí̧ njukuri ɓá béláké.

⁷Tisík ka ɓá nyîn ní ka mi zi mambáy, njukupéna law mbêw, mbáŋa péna a mǐ a ɓil péna a Gáŋmbây, e gé sa hí̧ wǎyri hɛ̧ too ka kó mí.

⁸Mi pé nɛ́ nǎŋnɔ́, ɓay a ké gé sa hí̧ wǎyri, ɓay ka kó káwa ɓurú, rá̧ ké ma ziŋ kpúmûn a wǎyri kɔ́.

⁹Mi pé nɛ́ kuu nyîn ní Onɛzîm, ka mi zi mambáy, njukupéna law mbêw, ka ɓá gun pû a wǎyri. Kú e gé sa hí̧ wǎyri hɛ̧ri̧ too ka tá a geléy.

¹⁰Aristark, ka e ka vûn sɛl kuu mǐ, nam wǎyri rá̧ Márke, gun nǎa a Barnabas[1] kɔ́. I tí lá nzáʼapéna a kó Márke; Ké mí gé bazeŋ a wǎyri lé, í nyá nɛ́ ɓá béláké.

¹¹Zezú, a kú ɗí nɛ́ ɓá Justus, nam wǎyri kɔ́. Ɓá kuriri sáy nɔ́rí̧, a bazeŋ a Juyífri ka láɓulaw, pé niŋ péna kuu mǐ ɓay a Pû a Gáŋvbôn. Kú kaw ɓá njukuri ka hí̧ mí mûn kpúna mambáy.

¹²Epafáras, ka ɓá njuku pû a wǎyri nam wǎyri kɔ́, ké ɓá njukupéna a Zezú Kiris, ké zi pɔŋ gɔ́ŋ Gáŋvbôn ɓay a wǎyri yá. Ɓayhí̧lé, ké zi ɓá í ew ɓá kpúnáké ɓá báŋa njuku a kpáʼakéri a ɓil ɓay a Gáŋvbôn, ka mbí mûn a kuriri ɓay a niŋ hɛ̧ri̧ too ka Gáŋvbôn ziy.

¹³Mi tu nɛ́, ɓayhí̧lé: Ké tɔ́ʼɔsêe mambá ɓay a wǎyri, ɓay a njuku a Lawdiséri rá̧ ɓay a njuku a Hiyérapolísíri.

¹⁴Luk, njuku mbáŋa a ɓurú, njuku hí̧ nzáʼagoy, nam wǎyri rá̧ Damas kɔ́.

¹⁵I nam nyîn a manárí̧ ka e a Lawdisé, kuu Nimfá rá̧ Egilize ka mára̧ a ɓil vûn a mɛ̌.

¹⁶Í kɛ̧́ mbété nɛ́ dalé, í hí̧ a kú kɛ̧́ hí̧ Egilize ka e a Lawdisé kɔ́. Í kɛ̧́ mbété ka e gí a Egilize a Lawdisé, wǎyri kɔ́.

¹⁷Í sa hí̧ Arkíp ɓá: «Ké koro péna ka Gáŋmbây hí̧ nɛ́ ɓay a niŋáké ɓá béláké.»

¹⁸Mǐ Pôl, pé ɗé hɛ̧nama nɛ́ ka ndɔ̂ʼɔ ní hí̧ wǎyri. Í kɛrɛ mí ɓá mi e a vûn sɛl! Béla a Gáŋvbôn ké kaw kuu wǎyri!