Read Capanahua 1Tesalonisiyɛ̧́ri̧ 1 Bible Online

1Tesalonisiyɛ̧́ri̧ 1 - Capanahua bible

1Tesalonisiyɛ̧́ri̧ 1

¹Mi ɗé mbété nɛ́ mǐ Pôl, kuu Silás [1]rá̧ Timoté, hí̧ Egilizeri ka Tesaloník, wǎyri ka, kaw mbêw kuu Gáŋvbôn, Bâa a manárí̧ rá̧ Gáŋmbây Zezú Kiris. Lawbéla rá̧ a vónáké a Gáŋvbôn ké kaw kuu a wǎyri.

²Sêe too, rú kaw zi awá hí̧ Gáŋvbôn, ɓay a wǎyri too, rú kaw ɗí rɛŋ a wǎyri a ɓil gɔ́ŋ Gáŋvbôn a ɓurú dát.

³Rú kaw kɛrɛ wǎyri dát, a mbɛl a Gáŋvbôn, sé tûl péna láɓulaw a wǎyri, tɔ́ʼɔ zína a wǎyri rá̧ ɓá kɛrɛ a wǎyri dát sé tûl a Gáŋmbây Zezú Kiris.

⁴Nyîn nírí̧, rú tu ɓá Gáŋvbôn zi wǎyri, pé a ten wǎyri, ɓay a í kaw ɓá a mɛ̌.

⁵Ɓayhí̧lé, Bélaɓay ka rú tɔ́ʼɔ hí̧ wǎyri, zi ka̧ bazeŋ a wǎyri ka ŋgboro a ɓay ɓǎŋ nyá, gí ka ŋgboro a kpɔ́ŋa rá̧ hí̧ndɔ̂ʼɔ a Têm Pukí rá̧ ka ŋgboro mbílaw sé tûl Bélaɓayké. Nǎŋnɔ́, i tu báŋké ka rú káwa a bazeŋ a wǎyri, ɓay tûl béla a wǎyri.

⁶Nǎŋnɔ́ wǎyri kɔ́, í tɔ́ŋ bɔʼɔséna a ɓurú, rá̧ bɔʼɔséna a Gáŋmbây. A ɓil tɔ́ʼɔsêeri ɓá ŋgɛ̧́náké, i nyá ɓay a Gáŋmbây ka law sáʼa a Têm Pukí ɓá kɔ̧ law a wǎyri.

⁷Nǎŋnɔ́, i tɛ̧́ njukuri ka tɔ́ʼɔ ŋgboro hí̧ njukuri too ka láɓulaw, ka tísiri a Maseduwa̧n rá̧ Akayí.

⁸Ɓayhí̧lé, ɓay a Gáŋmbây tí gbé a gel a wǎyri ka tísiri a Maseduwa̧n rá̧ Akayí too. Dáy tí ɓá a goló mbɛ́ŋ yá, ɓay a láɓulaw a wǎyri hí̧ Gáŋvbôn gbé ma gel too, nǎŋnɔ́, rú zi tí ka ɓay sána sé tûlké mbaa.

⁹Njukuri sa ma gel too, sé tûl nyá bɔʼɔ gína a ɓurú, ka i nyá rú a gel a wǎyri rá̧ a̧ní i fere káwa a wǎyri, ka a regí gel a Gáŋvbôn. I fere káwa a wǎyri, a pɔŋ tɔ́ŋ vbônri̧, ɓay a i niŋ péna hí̧ Gáŋvbôn a ndísɛ̌ʼɛ, ka ɓá gbátké,

¹⁰rá̧ ɓay a i zoko réna a Gun a mɛ̌ a nûnalê, a ké toma nɛ́ a ɓil a hûlri, ɓá Zezú, mɛ̌ ka pɛ̧́ nárí̧ a ɓil hɛ́rɛ a Gáŋvbôn ka gí ɗɛ́ŋ.