Read Capanahua 1Tesalonisiyɛ̧́ri̧ 3 Bible Online

1Tesalonisiyɛ̧́ri̧ 3 - Capanahua bible

1Tesalonisiyɛ̧́ri̧ 3

¹Nǎŋnɔ́, ka rú ma zoko ɓáy mbaay, rú ŋgá̧nzáʼa ɓay a kaw hɛʼɛ ɓurú ka Atɛn.

²Dáy, rú pé nyîn a ɓurú Timoté, ka niŋ péna a Gáŋvbôn kuu ɓurú, a ɓil tɔ́ʼɔ Bélaɓay a Kiris. Rú pé nɛ́, ɓay ké gé kpúmûn a wǎyri, a ké hí̧ wǎyri ŋgɛ́rɛ a ɓil káwa láɓulaw a wǎyri.

³Rá̧lǒo, njuku a há̧na mbêw a bazeŋ a wǎyri, ná kó tɔ́ʼɔsêe a resé fal. Ɓayhí̧lé, i tu ka mûn a wǎyri ɓá, tɔ́ʼɔsêeké nɔ́rí̧ ɓá Gáŋvbôn pé tí mɔny zoko nárí̧.

⁴Gelka rú e kuu wǎyri ɓáy, rú tí sa hí̧ wǎyri ɓá, belɓá ná tɔ́ʼɔsêe, dáy ɓá hɛ̧ nɔ́ pé ka̧ ɓá báŋké ka i tuy.

⁵Ɓaykénɔ́, ka mi ma zoko ɓáy mbaay, pé mi pé Timoté, ɓay ké gé kó a regí sa hí̧ rú, a̧ní káwa a láɓulaw a wǎyri ná lé. Katína, mi ŋgú wɔ́w a hɛ̧ mbêw, ɓá Sata̧n ké zi ná lélaw a wǎyri dá, a ɓá péna ɓurú a bazeŋ a wǎyri, tɛ̧́ hɛ̧ a ɓǎŋké.

⁶Dáy, Timoté regí a gel a wǎyri, a gí sa nzáʼa péna a béláké hí̧ rú, sé tûl láɓulaw rá̧ zína a wǎyri. Ké sa hí̧ rú ɓá, i kɛrɛ ɓay a ɓurú ɓá béláké, a zi ɓay a kó rú, ɓá báŋké nɔ́ ka rú zi ɓay a kó wǎyri kɔ́.

⁷Nǎŋnɔ́ nyîn nírí̧, a ɓil tɔ́ʼɔsêe rá̧ ɓil lawyíra a ɓurú too, rú ziŋ ŋgɛ́rɛ ka ŋgboro a láɓulaw a wǎyri.

⁸Dáy a ŋgɛŋnɛ́, rú rekaw ka ndísɛ̌ʼɛ, ɓayhí̧lé i ŋgbá kpú a ɓil káwa a wǎyri kuu a Gáŋmbây.

⁹Rú zi tu a̧ní, rú e zi awá hí̧ Gáŋvbôn ɓay a wǎyri yá, ɓay tûl mûnrína, ka rú ziŋ ɓay a wǎyri a mbɛl a Gáŋvbôn a manárí̧!

¹⁰Sû̧ŋ ka sêe too, rú kaw vú hí̧ Gáŋvbôn ka ŋgɛ́rɛ, a ké pɔŋ ŋgboro hí̧ rú, a rú gé kó wǎyri, a rú ɓá hɛ̧ a féké ka zi a ɓil láɓulaw a wǎyri kɔ̧ tûlké.

¹¹Bâa, Gáŋvbôn ka mûn nɛ́ rá̧ Gáŋmbây a manárí̧ Zezú Kiris, ké ŋgburu ŋgboro hí̧ rú, a rú ka̧ gel a wǎyri!

¹²Gáŋmbây ké niŋ, a zína a wǎyri, ké hɔ̧́ gé ɓá mbɛl a bazeŋ a wǎyri, rá̧ a bazeŋ a njukuri too, ɓá báŋa zína nɔ́, ka rú zi wǎyri.

¹³Gáŋmbây ké hí̧ wǎyri ŋgɛ́rɛ a ɓil law a wǎyri, rá̧ njuku a há̧na mbêw, ké ziŋ ɓékéhɛ̧ a ɓil káwa táŋáké a wǎyri a mbɛl a Gáŋvbôn, Bâa a manárí̧, ka sêe réna a Gáŋmbây a manárí̧ Zezú kuu njuku a mɛ̌ri̧ nyá. Amɛn!