Read Capanahua 1Tesalonisiyɛ̧́ri̧ 4 Bible Online

1Tesalonisiyɛ̧́ri̧ 4 - Capanahua bible

1Tesalonisiyɛ̧́ri̧ 4

¹Ŋgɛŋnɛ́ nyîn nírí̧, i mbɛl a gel a ɓurú, hɛ̧ ka i e niŋáké ɓay a sé bɔʼɔséna ka e hí̧ sáʼa hí̧ Gáŋvbôn. Dáy katína, ɓá hɛ̧ nɔ́ pé i kaw niŋáké. Ŋgɛŋnɛ́ ɓáy, rú vú hí̧ wǎyri ka gɔ́ŋ wǎyri ka rɛŋ a Gáŋmbây, ɓá í hɔ̧́ a ɓil bɔʼɔsénaké sé mbɛl.

²Ɓayhí̧lé, i tu nzáʼa nzɛ́rɛ ka rú hí̧ wǎyri, ka gí ka ŋgboro a Gáŋmbây Zezú.

³Hɛ̧ ka Gáŋvbôn ziy, ɓá í kaw ɓá táŋáké, a í lú mûn a wǎyri a ɓil niŋ dala.

⁴A njuku mbêw mbêw too a bazeŋ a wǎyri, ké tu ŋgbá mûn nɛ́ ɓá táŋáké, a ké tu hɛʼɛ mûn nɛ́,

⁵táŋ pɔŋ ɓéké haŋhɛ̧ri̧, ké ndé tûl a wǎyri, ɓá báŋa njukuri ka zi tu Gáŋvbôn nyáy.

⁶A njuku a há̧na, ké zi ná niŋ péna foo ziŋ nyîn nɛ́, malé sɔ̧́ ŋgɛ́rɛ a nyîn nɛ́, a ɓil hɛ̧ nɛ́ ka mi saɓayké. Ɓayhí̧lé hɛ́rɛ a Gáŋmbây e ɗere kɔ̧ tûl a njukuri ka niŋ mára̧ hɛ̧ nɔ́rí̧, ɓá báŋké ka rú tí sa hí̧ wǎyri, ka a revbara wǎyri ɓáy.

⁷Katína, Gáŋvbôn zi ɗí nárí̧ ɓay a ná kaw ɓil ɗaʼama nyá, ké ɗí nárí̧ ɓay a ná kaw káwa a táŋáké.

⁸Ɓaykénɔ́, pé njuku mi sáŋ nzáʼa nzɛ́rɛ nɛ́ lé, ké zi sáŋ njuku yá, ké sáŋ Gáŋvbôn ka hí̧ wǎyri Têm Pukí a mɛ̌.

⁹Nyîn nírí̧, ɓay hɛ̧ ka kó zína a bazeŋ a wǎyriy, i zi tí ka ŋgboro zoko ɓá rú ɗé mbété sé tûlké hí̧ wǎyri yá. Ɓayhí̧lé Gáŋvbôn ka mûn nɛ́, tɔ́ʼɔ hí̧ wǎyri báŋké ka i e zi há̧narí̧ a bazeŋ a wǎyri.

¹⁰Ɓá zínáké nɔ́, pé i tɔ́ʼɔ sé ŋgboro a gun a Gáŋvbônri̧ too, ka tísiri a Maseduwa̧n, dáy rú sa hí̧ wǎyri, i hɔ̧́ a ɓil zínáké nɔ́ gé ɓá mbɛl dát.

¹¹Í ɛ́ káwa a vónáké a bazeŋ a wǎyri, a í niŋ ɓá péna a wǎyri, ka í ɛ́ lâʼa a nzáʼa a wǎyri ka ndɔ̂ʼɔ a wǎyri, ɓá báŋké nɔ́ ka rú tí tɔ́ʼɔ hí̧ wǎyri.

¹²Nǎŋnɔ́, bɔʼɔséna a wǎyri e niŋa rá̧ njukuri ka zi tu Gáŋvbôn nyáy, e hɛʼɛ wǎyri, a goló i tí kaw ɓá hóla ka tûl a njuku a há̧na nyá.

¹³Nyîn nírí̧, rú zi ɓá, i tu ɓá táŋáké, ɓay ka kɔ́ njukuri ka ziŋ hûl dáy, rá̧lǒo law a wǎyri ké yírí yá, ɓá báŋa njuku a fékéri, ka zi tí a kɛrɛ sé ŋgboro a Gáŋvbôn nyáy.

¹⁴Ɓayhí̧lé, rú láɓulaw ɓá Zezú ziŋ hûl, a toma. Nǎŋnɔ́, rú láɓulaw kɔ́ ɓá, njukuri too ka ziŋ hûl a ɓil láɓulaw hí̧ Zezúy, Gáŋvbôn e rerú ka kuriri ka ŋgboro a Zezú kuu Zezú.

¹⁵Nǎŋnɔ́, í láɓay ka rú kaw sáy hí̧ wǎyri, ɓá báŋké ka Gáŋmbây tɔ́ʼɔy: Manárí̧ ka kaw ka nûn ɓáy, ka sêe ka Gáŋmbây e regíy, ná tí tá ɗambɛl hí̧ njukuri ka hú dá yá.

¹⁶Ɓayhí̧lé Gáŋmbây ka mûn nɛ́, a ɓil ŋgána a kú e hí̧naké rá̧ kɔ́ŋ a gáŋnjuku a aŋnze rá̧ ul tɛ̧̂w a Gáŋvbôn, a goló, ké e ɗere a nûnalê. Njukuri ka ziŋ hûl, a ɓil láɓulaw hí̧ nɛ́y, e tí uru tí ɗambɛl.

¹⁷Falké manárí̧, ka kaw ka nûn ka sêeké nɔ́y, ná e ziŋ uru mbêw kuu kuriri, a ri ɓil ɗaʼama a mbɔ̂m, ɓay sé ziŋ Gáŋmbây a sâa. A goló, ná e kaw kuu Gáŋmbây dát.

¹⁸Nǎŋnɔ́, i kpúmûn a wǎyri mbêw mbêw too ka tûl ɓay nɔ́rí̧.