Read Capanahua 1Tesalonisiyɛ̧́ri̧ 5 Bible Online

1Tesalonisiyɛ̧́ri̧ 5 - Capanahua bible

1Tesalonisiyɛ̧́ri̧ 5

¹Nyîn nírí̧, ɓay ka kó nâm malé sɛl a sêe réna a Gáŋmbây, i zi tí ka ŋgboro zoko ɓá rú ɗé mbété sé tûlké hí̧ wǎyri yá,

²ɓayhí̧lé, i tu ɓá táŋáké ka mûn a wǎyri kɔ́, ɓá sêe réna a Gáŋmbây, ɓá sɛl sêe ka ná zi tu yá, ɓá báŋa gína a ríwa a haŋa sû̧ŋ.

³Gelka njukuri kaw sa ɓá: «A vónáké erú rá̧ béla káwa!» Núnmbɛ̧́nɛ́ a goló, gel e gbɛʼɛrɛ. Ké e lé tûl a kuriri ɓá báŋa ɓil mbuŋa ka sé wûnynjuku, dáy njuku a há̧na mbêw ka e tɛ̧́ ɓilké, zi tí ná nyá.

⁴Dáy nyîn nírí̧, wǎyri, i zi tí ɓil tirí̧ma nyá rá̧ sêeké nɔ́ ké gí nduʼuru wǎyri ɓá báŋa ríwa yá.

⁵Ɓayhí̧lé wǎyri too, i ɓá gun a geltáŋa, gun ɓil a sêe. Ná zi tí ɓá njuku a sû̧ŋ malé njuku a tirí̧ma nyá.

⁶Nǎŋnɔ́, ná zi ná, ná nâm ɓá báŋa njuku a fékéri, ná gɛ́ŋ nâm, a ná ŋgbá mûn a manárí̧ ɓá béláké.

⁷Njukuri ka ná nâm, ná nâm ka sû̧ŋ, ka njukuri ka távôn, távôn ka sû̧ŋ.

⁸Dáy manárí̧, ná kaw ɓá njuku a ɓil a sêe, nǎŋnɔ́, ná ŋgbá mûn a manárí̧ ɓá béláké! Ná mbí láɓulaw rá̧ zína ɓá gári ŋgáŋbére rá̧ kɛrɛ pɛ̧́na, ɓá goytûl bére.

⁹Gáŋvbôn, zi ɗí nárí̧, ɓay a ɓá hɛ́rɛ a mɛ̌ kɔ̧ tûl a manárí̧ nyá, dáy ké ɗí nárí̧, ɓay a ná ziŋ pɛ̧́na ka ŋgboro a Gáŋmbây a manárí̧ Zezú Kiris.

¹⁰Zezú ziŋ hûl ɓay a manárí̧ rá̧lǒo a ɓil káwa a ndísɛ̌ʼɛ a manárí̧ malé a ɓil hûl, ná kaw mbêw kuu mɛ̌.

¹¹Ɓaykénɔ́, í kpúmûn a wǎyri mbêw mbêw, a í hí̧ ŋgɛ́rɛ hí̧ há̧narí̧ a ɓil láɓulaw, ɓá báŋké nɔ́ ka i kaw niŋáké.

¹²Nyîn nírí̧, rú sa hí̧ wǎyri, í hɛʼɛ njukuri ka kaw niŋ péna a bazeŋ a wǎyri. Gáŋmbây ɓá kuriri hí̧ wǎyri, ɓay a kú tɔ́ʼɔ ŋgboro hí̧ wǎyri a kú nzɛ́rɛ wǎyri.

¹³Í hɛʼɛ kuriri a í tɔ́ʼɔ zína hí̧ kuriri, ɓay tûl péna a kuriri. A í ɛ́ a vónáké a bazeŋ a wǎyri.

¹⁴Nyîn nírí̧, rú sa hí̧ wǎyri ɓáy ɓá: Í nzɛ́rɛ njuku zɔɔri, a í kpúmûn a njukuri ka vomûn, a í hí̧ndɔ̂ʼɔ hí̧ njukuri ka zi tí ka ŋgɛ́rɛ yáy. Í ikilaw a wǎyri sé ŋgboro a njukuri too.

¹⁵Í kó rá̧, ɓay a njuku a há̧na, ké zi ná rerú ka hɛ̧ a belyáké hí̧ njuku ka niŋ belyá ziŋ nɛ́! Í ɛ́ niŋ béla a bazeŋ a wǎyri rá̧ njukuri too dát.

¹⁶Í kaw dát ka sáʼa,

¹⁷í gɔ́ŋ Gáŋvbôn dát,

¹⁸í zi awá hí̧ Gáŋvbôn a ɓil hɛ̧ri̧ too. Ɓayhí̧lé ɓá hɛ̧ ka Gáŋvbôn zi kuu wǎyri, a ɓil káwa a wǎyri mbêw kuu Zezú Kiris.

¹⁹Í de ŋgboro hí̧ péna a Têm a pukí yá,

²⁰í yáw ɓay a porofɛ́tri yá.

²¹Í bɛʼɛ ɓil hɛ̧ri̧ too, a í sa̧n hɛ̧ri̧ ka ɓá hɛ̧ a béláké.

²²Í ɗí kuu mára̧ hɛ̧ a belyákéri too.

²³Gáŋvbôn a vónáké ka mûn nɛ́, ké ɓá wǎyri kaw ɓá táŋáké a ɓil káwa a wǎyri too ɓay a mɛ̌, a ké koro têm a wǎyri, zóm mûn a wǎyri rá̧ mûn a wǎyri ɓá béláké, ɓay a zoko sêe ka Gáŋmbây a manárí̧ Zezú Kiris e regí.

²⁴Ɓayhí̧lé njuku ka ɗí wǎyri, ké kaw law mbêw. Ɓá mɛ̌ pé e niŋ pénáké.

²⁵Nyîn nírí̧, í gɔ́ŋ Gáŋvbôn kɔ́, ɓay a ɓurú.

²⁶Í nam há̧narí̧ a bazeŋ a wǎyri too, ka zína a wǎyri too, ɓá báŋa nyînrí̧.

²⁷Mi vú hí̧ wǎyri ka rɛŋ a Gáŋmbây Zezú Kiris: Í kɛ̧́ mbété nɛ́ hí̧ há̧narí̧ too.

²⁸Béla a Gáŋmbây a manárí̧ Zezú Kiris, ké kaw kuu wǎyri!