Read Capanahua 2Tesalonisiyɛ̧́ri̧ 2 Bible Online

2Tesalonisiyɛ̧́ri̧ 2 - Capanahua bible

2Tesalonisiyɛ̧́ri̧ 2

¹Nyîn nírí̧, ɓay ka kó réna a Gáŋmbây a manárí̧ Zezú Kiris rá̧ mára̧ a manárí̧ mbêw kuu mɛ̌, rú vú hí̧ wǎyri ɓá,

²í ná pɔŋ mûn a wǎyri, a njuku a há̧na, ké ná kí tûl a wǎyri malé ɓá wɔ́w ŋgbá wǎyri ɗɛ́ŋ, sa ɓá nâm réna a Gáŋmbây ka̧ dá. Zi lé njuku, ké sa hí̧ wǎyri, ka tɔ́ʼɔ ɓá ɓayké gí a gel a Gáŋvbôn, malé ɓá nzáʼapéna a há̧na malé mbétéké gí a gel a ɓurú, í ná zibɔʼɔké.

³Í zi ná pɔŋ njuku a há̧na ké rɔ́ʼɔ wǎyri ka ŋgboro a há̧na. Ɓayhí̧lé, sêeké tí ka̧na ɗambɛl táŋ njuku uru bére a kɔ́rɔ́kéri yá rá̧ hɛ̧ɓéké ka ɓá njuku ɓɔ́lay, e ten mûn nɛ́ kɔ́.

⁴Ké e kaw ɓá njuku ŋgá̧na a hɛ̧ri̧ too ka njukuri ɗí ɓá Gáŋvbôn, ka a hɔ̧́y. Ké e sé kaw ɓil vûn a Gáŋvbôn, ka mbí mûn nɛ́ ka mûn nɛ́ ɓá mɛ̌ pé kaw ɓá Gáŋvbôn.

⁵Mi tí saɓayké nɔ́ hí̧ wǎyri, ka mi e kuu wǎyri ɓáy, i yɛʼɛrɛ dá lé?

⁶Ŋgɛŋnɛ́, í tu hɛ̧ ka de nɛ́, ka a niŋ rá̧, a ké e tɔ́ʼɔ mûn nɛ́, ɓá sêe ka Gáŋvbôn ziy.

⁷Dáy, kpɔ́ŋa a múnáké a hɛ̧ɓékéké, tí péna a mɛ̌ dá. Gelka njuku ka de nɛ́ a ŋgɛŋnɛ́ e pɔŋ ŋgboro hí̧ nɛ́y, a goló, ké e niŋ péna a mɛ̌ ɓá báŋké a ké ziy.

⁸Falké, hɛ̧ɓéké e ten mûn nɛ́y. Gáŋmbây Zezú e gí í nɛ́, a kúlá nzɛ́ʼɛ, ké e gbɛʼɛrɛ nɛ́ ka hɔ̧́na gína a mɛ̌

⁹Hɛ̧ɓékéké e gí ka kpɔ́ŋa a Sata̧n, ké e niŋ hɛ̧sáʼamari̧ ɓórí ɓórí, ka niŋ hɛ̧ lú law rá̧ hɛ̧ yérkéri, ɓay a ké rɔ́ʼɔ njukuri,

¹⁰a ŋgboro a ɓéké pénari̧ ɓórí ɓórí, ké e niŋ ɓay a rɔ́ʼɔ njukuri ka ɓá njuku ɓɔ́lari. Dáy kú e ɓɔ́la, ɓayhí̧lé kú zi nyá, a zi gbátɓay ka e pɛ̧́ kuriri yá.

¹¹Ɓaykénɔ́, pé Gáŋvbôn pé hí̧ kuriri kpɔ́ŋa ɓá kuriri ri ɓil hɛ̧rɔ́ʼɔ, ɓay kú zibɔʼɔ a kúŋɓayké nɔ́.

¹²Nǎŋnɔ́, njukuri too ka zi nyá gbátɓay yáy, ka ziŋ mûnrína a kuriri ɓá a ɓil ɓékéhɛ̧, kú e walɓay ŋgbá kuriri.

¹³A ɓurú lé nyînrí̧, belɓá rú zi awá hí̧ Gáŋvbôn sêe too, ɓay a wǎyri, wǎyri ka Gáŋmbây zi wǎyri. Ɓayhí̧lé Gáŋvbôn tí ten wǎyri, tí ka títáʼaké, ɓay í ziŋ pɛ̧́na ka ŋgboro a káwa a táŋáké ka Têm Pukí hí̧, rá̧ ka ŋgboro a láɓulaw a wǎyri hí̧ gbátɓay.

¹⁴Ɓaykénɔ́, pé Gáŋvbôn ɗí wǎyri, ka ŋgboro a Bélaɓay ka rú tɔ́ʼɔ hí̧ wǎyri. Ké zi ɓá í ziŋ hɔ̧́na a Gáŋmbây a manárí̧ Zezú Kiris.

¹⁵Nǎŋnɔ́ nyîn nírí̧, í ew ɓá kpúnáké, a í ŋgbá hɛ̧ ka rú tɔ́ʼɔ hí̧ wǎyri, ka ŋgboro a ɓay a ɓurú malé ka ŋgboro a mbété ka rú ɗé hí̧ wǎyri.

¹⁶Gáŋmbây a manárí̧ Zezú Kiris ka mûn nɛ́ rá̧ Bâa, Gáŋvbôn manárí̧, ka zi nárí̧, ka hí̧ nárí̧ ka ŋgboro a lawbéla a mɛ̌, vóna law dát ka kɔ́rɔ́ké zi tí yáy, rá̧ mbílaw a béláké,

¹⁷kú hí̧ wǎyri vóna law, rá̧ ŋgɛ́rɛ niŋ péna a bélákéri too, a ɓil péna a wǎyri rá̧ a ɓil ɓayri a wǎyri!