Read Capanahua 2Tesalonisiyɛ̧́ri̧ 3 Bible Online

2Tesalonisiyɛ̧́ri̧ 3 - Capanahua bible

2Tesalonisiyɛ̧́ri̧ 3

¹A kɔ́rɔ́ké nyîn nírí̧, í gɔ́ŋ Gáŋvbôn hí̧ rú rá̧ ɓay a Gáŋmbây, ké wal magél too ɓá gánáké, a njukuri kú hɔ̧́ ɓayké, ɓá báŋké ka niŋ a gel a wǎyri.

²Í gɔ́ŋ Gáŋvbôn kɔ́, ɓay a ké koro rú, ɓay a ɓéké njukuri rá̧ njuku ŋgbɔ́rɔri. Ɓayhí̧lé tí ɓá njukuri too pé láɓulaw yá.

³Dáy, Gáŋmbây kaw law mbêw, ké e hí̧ wǎyri ŋgɛ́rɛ, a koro wǎyri ɓay a Hɛ̧ɓéké.

⁴Gáŋmbây hí̧ rú mbílaw ɓay a wǎyri, dáy rú tu ɓá táŋáké ɓá, i kaw niŋ hɛ̧ ka rú tɔ́ʼɔ hí̧ wǎyri, a tɔ́ŋ niŋáké dát, ɓá báŋké ka rú sa hí̧ wǎyri.

⁵Gáŋmbây, ké hí̧ wǎyri law zi Gáŋvbôn, a ké hí̧ wǎyri ŋgá̧law ɓá báŋa Kiris.

⁶Nyîn nírí̧, rú vbí wǎyri ka rɛŋ a Gáŋmbây Zezú Kiris: Í ɗí kuu nyîn a há̧narí̧ ka ɓá njuku zɔɔri, ka zi tɔ́ŋ ŋgboro ka rú tɔ́ʼɔ hí̧ wǎyri yáy.

⁷I tu wǎyri kɔ́ ka mûn a wǎyri ɓá táŋáké, a̧ní i e niŋ ɓay tɔ́ŋ bɔʼɔséna ɓurú, ɓayhí̧lé rú zi kaw a bazeŋ a wǎyri ɓá njuku zɔɔri yá.

⁸Rú zi sɔ̧́lâʼa a njuku ɓǎŋ nyá, rú niŋ péna sû̧ŋ ka sêe ka ndɔ̂ʼɔ ɓurú, ka tɔ́ʼɔsêe, ɓay a ziŋ lâʼa nzáʼa a ɓurú, ɓay a rú zi ná kaw ɓá hóla hí̧ njuku a há̧na a bazeŋ a wǎyri.

⁹Katína, zi tí ɓá ŋgboro vbí wǎyri hɛ̧ pé mbá rú yá, dáy rú niŋ nǎŋnɔ́, ɓay a í mbɛl péna niŋa a ɓurú.

¹⁰Ɓayhí̧lé, sêe ka rú e kuu wǎyri ɓáy, rú vbara wǎyri ɓá: «Njuku mí zi niŋ péna nyá lé, ké zi ná sɔ̧́lâʼa!»

¹¹Ɓayhí̧lé rú lá ɓá, njuku a fékéri a bazeŋ a wǎyri kaw ɓá zɔɔ, a zi niŋ péna nyá, péna a kuriri ɓá ri ɓil ɓay a njuku a fékéri ka zi kó kuriri yáy.

¹²A mára̧ njuku a nɔ́rí̧, rú ɗí kuriri, a sa hí̧ kuriri ka rɛŋ a Gáŋmbây Zezú Kiris ɓá: Kú sɔ̧́lâʼa a nzáʼa kuriri, a ɓil niŋ péna ka ndɔ̂ʼɔ a kuriri dát.

¹³A wǎyri nyîn a mǐri̧, í ta̧ a ɓil niŋ béla yá.

¹⁴Njuku, mí zi láɓay a ɓurú ka rú ɗé ka̧n ɓil mbété nɛ́ nyá lé, í ŋga nɛ́, a í pɔŋ kaw kuu mɛ̌, a sɔ̧rɔ̧ ké ŋgbá nɛ́.

¹⁵Dáy, í zi ná kó nɛ́ ɓá báŋa njuku ŋgá̧na a wǎyri, í vbara nɛ́, ɓá báŋa nyîn a wǎyri.

¹⁶Gáŋmbây a vónáké ka mûn nɛ́, ké hí̧ wǎyri a vónáké a mɛ̌ sêe too, ka ŋgboro too! Gáŋmbây, ké kaw kuu wǎyri too!

¹⁷Mǐ Pôl, mi nam wǎyri ka ndɔ̂ʼɔ ní. Ɓá a nɔ́ pé ɓá ŋgána a hɛ̧ɗéna a mǐ too, ɓá nǎŋnɔ́ pé ɓá hɛ̧ɗéna a mǐ.

¹⁸Béla a Gáŋmbây a manárí̧ Zezú Kiris, ké kaw kuu wǎyri too!