Read Capanahua 1Timoté 2 Bible Online

1Timoté 2 - Capanahua bible

1Timoté 2

¹Ɗambɛl hɛ̧ too, mi sa hí̧ wǎyri ɓá í gɔ́ŋ, a í vbí, a í vú hí̧ Gáŋvbôn, a í zi awá hí̧ nɛ́ ɓay a njukuri too.

²I gɔ́ŋ Gáŋvbôn kɔ́ kɔ̧ tûl a mbâyri rá̧ lásárari too, rá̧lǒo ná ziŋ béla káwa, káwa vónáké, a ɓil hɛʼɛ, a ɓil káwa a béláké kuu Gáŋvbôn.

³A nɔ́ pé, ɓá hɛ̧ a béláké, ka ri law a Gáŋvbôn njuku pɛ̧́ nárí̧,

⁴mɛ̌ a zi ɓá njukuri too kú pɛ̧́, a kú ziŋ tu gbátɓay.

⁵Ɓayhí̧lé, Gáŋvbôn mbêw yáŋ, njuku ka ew a bazeŋ a njukuri kuu Gáŋvbôn ɓá mbêw kɔ́, njuku Zezú Kiris,

⁶ka hí̧ ndísɛ̌ʼɛ a mɛ̌, ɓay zé njukuri too. A nɔ́ pé ɓá hɛ̧ ka niŋ a nâm ka mɛ̌ Gáŋvbôn tí mɔny, ɓay a tɔ́ʼɔ ɓá ké zi ɓá njukuri too kú ziŋ pɛ̧́na.

⁷Ɓaykénɔ́, pé Gáŋvbôn ɓá mí, ɓá njuku nzáʼapéna rá̧ apotere ɓay a tɔ́ʼɔhɛ̧ hí̧ njukuri ka zi tí ɓá Juyífri yáy, ŋgboro láɓulaw rá̧ gbátɓay. Mi sa gbátɓay a mbɛl a Kiris, mi zi kúŋɓay yá.

⁸Mi zi ɓá wɔ̧rɔ̧́njukuri a gel too, kú gɔ́ŋ Gáŋvbôn, ka gbaŋ ndɔ̂ʼɔ a kuriri sé sâa, ka law a táŋáké, táŋ hɛ́rɛ, táŋ manyɓay.

⁹Mi zi ɓá wûnynjukuri kɔ́, kú ri laa a ɓil hɛʼɛ mûn. Kú ri laa ka zi kɔʼɔ ɛ̧rɛ̧ gel a njukuri sé tûl a kuriri yáy. Kú zi ná mɔny mûn a kuriri kuu hɛ̧ ɓá báŋa hɛ̧súku a kú niŋ ka vbí̧rí̧lari malé ŋgbá tûl wélé malé zaw malé gári lari yá.

¹⁰Dáy, mɔny mûn a kuriri, ké ɓá béla péna a kuriri, ka belɓá wûnynjukuri ka sa ɓá kú hɛʼɛ Gáŋvbôn, kú niŋ.

¹¹Wûnynjukuri kú kaw ták, a lá tɔ́ʼɔɓay a Gáŋvbôn, a ɓil pɔtûl sé ŋgboro hɛ̧ too.

¹²Mi zi pɔŋ ŋgboro hí̧ wûnynjuku a há̧na, ɓá ké tɔ́ʼɔhɛ̧ malé ké he tûl a wɔ̧rɔ̧́njuku yá, ké kaw ták.

¹³Ɓayhí̧lé Gáŋvbôn tí mɔny Adam ɗambɛl, rá̧ pé a mɔny Ɛ́ve a falké.

¹⁴A tí ɓá Adam, pé Sata̧n rɔ́ʼɔ yá, ɓá wûnynjuku pé lé ɓil nzáʼa rɔ́ʼɔ a Sata̧n, dáy a many nzáʼa a Gáŋvbôn.

¹⁵Nǎŋnɔ́ dáy, wûnynjuku e ziŋ pɛ̧́na ka ŋgboro a mbuŋ gun, dáy hɛ̧ mbêw ɓá: Ké kaw ɓil láɓulaw, ɓil zína, ɓil káwa a táŋáké, ɓil káwa ɗɛ́ŋ, táŋ kɔʼɔ ɛ̧rɛ̧ gel a njukuri.