Read Capanahua 1Timoté 3 Bible Online

1Timoté 3 - Capanahua bible

1Timoté 3

¹Ɓay nɛ́, ma ɓay a njukuri too kú mbílaw sé tûlké: Njuku mí zi ɓay kaw ɓá gáŋnjuku koro mára̧ a gun a Gáŋvbônri̧ lé, tɔ́ʼɔ ɓá ké zi ɓay a niŋ béla péna.

²Nǎŋnɔ́, belɓá gáŋnjuku koro Egilize too, ké kaw ɓá njuku a kú zi ma ɓew ɓay a mɛ̌ nyáy, ké kaw ɓá njuku wûny mbêw, ké ɓá njuku ŋgbátûl, njuku ka erú ka kɛrɛ ɓay rá̧ káwa a béláké. Ké kaw ɓá njuku nyá gɔ́rɔ́ri, njuku ka ma tɔ́ʼɔhɛ̧.

³Ké zi ná kaw ɓá koy vôn, malé njuku niŋ hɛ̧ ka ŋgɛ́rɛ, dáy ké kaw ɓá njuku law a vónáké, rá̧ njuku pá̧ nzáʼa. Ké zi ná kaw ɓá njuku ka zi lari mambáy.

⁴Ké kaw ɓá njuku ka koro wûny a mɛ̌ rá̧ gun a mɛ̌ri̧ ɓá béláké, gun a mɛ̌ri̧ kú kaw ɓá gun lá nzáʼari rá̧ gun hɛʼɛ hɛ̧ri̧.

⁵Ɓayhí̧lé njuku, mí zi tu koro wûny a mɛ̌ rá̧ gun a mɛ̌ri̧ ɓá béláké yáy, ké e niŋ a̧ní rá̧ a koro Egilize lé?

⁶Ké zi ná kaw ɓá njuku ka láɓulaw a ŋgɛŋ hí̧ Kiris, a tí nǎŋ nyá lé, ké e hɔ̧́tûl, dáy Gáŋvbôn e walɓay ŋgbá nɛ́ ɓá báŋa Sata̧n.

⁷Belɓá, njukuri ka zi láɓulaw yáy kɔ́, kú saɓay a mɛ̌ ɓá béláké, ɓay a njukuri kú zi ná yáw nɛ́, a ké lé ɓil ndaw a Sata̧n.

⁸Nǎŋnɔ́ kɔ́, diyákereri kú kaw ɓá njukuri a kú hɛʼɛ kuriri, a kú ná kaw ɓá njuku nzáʼa sére. Kú zi ná kaw ɓá njuku távônri̧ malé njuku ɛ́ ŋgboro ziŋ lari ka ŋgboro a belyákéri.

⁹Belɓá kú ŋgbá gbátɓay ka ná láɓulaw rúy, ka law a táŋáké.

¹⁰Belɓá, kú tí lé kuriri rá̧ bɔʼɔséna a kuriri mí ná ɓá béláké, kú ma tí péna a kuriri.

¹¹Wûnynjukuri kɔ́, belɓá kú kaw ɓá wûny a ǎ̧yrí̧ a kú hɛʼɛ kuriri. Kú zi ná kaw ɓá wûny niŋ naníri̧, kú kaw ɓá wûny ŋgbátûlri. Kú kaw ɓá wûnynjukuri ka kaw law mbêw ka tûl hɛ̧ri̧ too.

¹²Belɓá diyákere, ké kaw ɓá njuku wûny mbêw. Ké kaw ɓá njuku ka koro wûny a mɛ̌ rá̧ gun a mɛ̌ri̧ rá̧ î̧n a mɛ̌ too ɓá béláké.

¹³Ɓayhí̧lé, diyákereri too, ka niŋ péna a kuriri ɓá béláké, njukuri too hɛʼɛ kuriri. Nǎŋnɔ́, kú e ziŋ saɓay a láɓulaw táŋ wɔ́w ka mára̧ manárí̧ kuu Zezú Kiris mbêw.

¹⁴Mi ɗé mbété nɛ́ hí̧ mɔ́, a kaw kɛrɛ ɓá zaa kpay lé, mi e gé kó mɔ́.

¹⁵Dáy mǐ, mí ziŋ géna ɓá gánáké yáy lé, ɓay a ɓil mbété nɛ́, e hí̧ mɔ́ ŋgboro tu bɔʼɔséna a béláké a ɓil î̧n a Gáŋvbôn, zi ɓay a sa ɓá, Egilize a Gáŋvbôn a ndísɛ̌ʼɛ, ka ɓá gáŋ dii rá̧ dii sôl gbátɓay.

¹⁶Katína, njuku ma manyáké yá, hɛ̧ a múnáké, ka láɓulaw a manárí̧ tɔ́ʼɔy, ka hɔ̧́ mambá ɓá: Kiris tɔ́ʼɔ mûn nɛ́, ɓá báŋa a njuku, Têm Pukí tɔ́ʼɔ káwa a ndáráké a mɛ̌ aŋnzeri kó nɛ́ ka mûnrína Njukuri saɓay a mɛ̌, ka tísiri, Njukuri ɓá ŋgɛ̧́náké ka tísiri, láɓulaw hí̧ nɛ́, kú gbaŋ nɛ́ sé sâa, a ɓil hɔ̧́na.