Read Capanahua 1Timoté 4 Bible Online

1Timoté 4 - Capanahua bible

1Timoté 4

¹Têm Pukí sa ɓá táŋáké ɓá, sêe kɔ́rɔ́kéri, njuku a há̧narí̧ e pɔŋ láɓulaw, ɓay a tɔ́ŋ têm rɔ́ʼɔhɛ̧ri̧, rá̧ hɛ̧tɔ́ʼɔ a vbônri̧.

²Kú e pɔŋ mûn a kuriri ɓɔ́l, ka ŋgboro a njuku foori rá̧ njuku kúŋɓayri, a kɛrɛhɛ̧ a kuriri e ka ŋgána, ɓá báŋa wɛ̧̂ɛ a kú ɓá ka̧n hɔrɛ, ɓay a ŋgá hɛ̧ rúy.

³Njuku nɔ́rí̧ de ɓá, njukuri kú zi ná nyá wûny malé kú sɔ̧́lâʼa a fékéri yá. A tu ɓá Gáŋvbôn, pé mɔny hɛ̧lâʼaké, ɓay a njukuri ka láɓulaw, a tu gbátɓay, kú sɔ̧́lâʼaké a zi awá hí̧ nɛ́.

⁴Katína, hɛ̧ too ka Gáŋvbôn mɔny, belbéla, hɛ̧ ka njuku e sáŋáké mbêw zi tí yá, belɓá ná sɔ̧́lâʼaké, a ɓil zi awá hí̧ Gáŋvbôn.

⁵Ɓayhí̧lé hɛ̧ too turu ɓá táŋáké, ka ŋgboro a ɓay a Gáŋvbôn rá̧ gɔ́ŋ Gáŋvbôn.

⁶Mɔ̌ mí tɔ́ʼɔ hɛ̧ nɔ́rí̧ too, hí̧ nyîn a manárí̧ a ɓil láɓulaw, a goló, mɔ́ e kaw ɓá béla njukupéna a Zezú Kiris. Tɔ́ʼɔ ɓá, mɔ ziŋ hɔ̧́na ka ŋgboro a ɓayri ka hí̧ láɓulaw rá̧ tɔ́ʼɔhɛ̧ a ndáráké, ka mɔ tɔ́ŋ rú̧ ka law mbêw

⁷Dáy, mɔ́ sáŋ galí ka ná ɓá hɛ̧ a baaké, ka zi sé kuu gbátɓay a Gáŋvbôn ka sa yá. Mɔ́ rú mûn nɔ́, a niŋ hɛ̧ ka tɔ́ʼɔ ɓá mɔ́ kaw mbêw kuu Gáŋvbôn.

⁸Rú mûn, erú ka nɛ́rɛ̧, dáy tɛ̧́w yáŋ, nǎŋnɔ́ ɛ́ káwa mbêw kuu Gáŋvbôn, e ka nɛ́rɛ̧ a ɓil hɛ̧ too. Ɓayhí̧lé káwa mbêw kuu Gáŋvbôn, hí̧ nárí̧ káwa a béláké a ŋgɛŋnɛ́ rá̧ béla káwa, a ɓil nâm a falri ka e gínay.

⁹A nɛ́, pé ɓá ɓay ka ma ɓay a njukuri too kú mbílaw, a kú nyá ka law mbêw.

¹⁰Katína, ná niŋ péna ka rúbére ŋgɛ́rɛ mambá, ɓayhí̧lé ná ɓá kɛrɛ a manárí̧ ka̧n tûl a Gáŋvbôn a ndísɛ̌ʼɛ, ka ɓá njuku ka pɛ̧́ njukuri too, zi ɓay a sa ɓá, njuku láɓulawri.

¹¹Mɔ́ sa a mɔ́ tɔ́ʼɔ hɛ̧ nɔ́rí̧ too.

¹²Njuku a há̧na mbêw, ké zi ná yáw mɔ́, ɓay ka mɔ kaw ɓá kaban njuku ɓáy. Dáy, mɔ́ kaw ɓá njuku ka njuku láɓulawri e kó káwa a mɔ̌ a tɔ́ŋ rú̧: A ɓil ɓay sána a mɔ̌ri̧, bɔʼɔséna a mɔ̌, zína a mɔ̌, a ɓil láɓulaw a mɔ̌ rá̧ káwa a táŋáké a mɔ̌.

¹³Rá̧ mí gé lé, mɔ́ mbí mûn nɔ́, ka̧n ɓil kɛ̧́ Mbété a Gáŋvbôn, ɓil nzáʼa nzɛ́rɛ rá̧ ɓil tɔ́ʼɔhɛ̧.

¹⁴Mɔ́ ná yáw hɛ̧ ka Têm Pukí hí̧ mɔ́, ka mɔ ziŋ ka ŋgboro a ɓay a porofɛ́tri rá̧ ka ŋgboro a ɓá ndɔ̂ʼɔ a gáŋnjuku péna a Gáŋvbônri̧ kɔ̧ tûló.

¹⁵Mɔ́ niŋ hɛ̧kéri too ɓá béláké, a mɔ́ mbí mûn too sé tûl pénáké. A goló njukuri too e kó báŋké ka mɔ kaw hɔ̧́ sé mbɛl.

¹⁶Mɔ́ koro tûló ka mûn nɔ́ ɓá béláké rá̧ tɔ́ʼɔhɛ̧ a mɔ̌. Mɔ́ ŋgbá pénáké ɓá kpúnáké. Ɓayhí̧lé a ɓil niŋ nǎŋnɔ́, mɔ e pɛ̧́ tûló, mɔ̌ ka mûn nɔ́, rá̧ njukuri too ka lá mɔ́y.