Read Capanahua 2Timoté 4 Bible Online

2Timoté 4 - Capanahua bible

2Timoté 4

¹Timoté, mi vú hí̧ mɔ́ a mbɛl a Gáŋvbôn rá̧ a mbɛl a Zezú Kiris, mɛ̌ ka e walɓay kɔ́ tûl a njukuri ka e ka nûn rá̧ njuku a hûlkéri, a sêe réna a mɛ̌ rá̧ ɓay a kaw Mbây a mɛ̌:

²Ɓá mɔ́ tɔ́ʼɔɓay a Gáŋvbôn, mɔ́ tɔ́ʼɔ, zi lé ka sɛl a sêe béláké malé sɛl a sêe a belyáké too, mɔ́ tɔ́ʼɔ dát. Mɔ́ nzɛ́rɛ kuriri, a sa ɓékéhɛ̧ a kuriri kɔ̧ kála, a mɔ́ tɔ́ʼɔ kuriri ka law a vónáké ɓá béláké.

³Ɓayhí̧lé, nâm e gína, ka njukuri tí lá gbát hɛ̧tɔ́ʼɔ mbaa, a tɔ́ŋ ɓá ɓékéhɛ̧ ka law a kuriri ziy. Nǎŋnɔ́, kú e ɗí njuku tɔ́ʼɔhɛ̧ri̧ ɓá ŋgɛ̧́náké gí gél a kuriri, ɓay kú saɓay ka súku a kuriri zi ɓay a lánáké.

⁴Kú e tu súku a kuriri, ɓay kú zi ná lá gbátɓay, a kí sé ɓay galíri.

⁵Dáy a mɔ̌, mɔ́ ŋgbá tûló ɓá béláké sé tûl hɛ̧ri̧ too. Mɔ́ ŋgá̧law a ɓil tɔ́ʼɔsêe, mɔ́ tɔ́ʼɔ Bélaɓay, a mɔ́ niŋ péna a njukupéna a Gáŋvbôn a mɔ̌.

⁶A mǐ lé, nâm kála a mǐ ka̧ dá, ka ndísɛ̌ʼɛ a mǐ e fere ɓá báŋa mára̧, ka fere kɔ̧ tûl hɛ̧púna hí̧ Gáŋvbôn.

⁷Mi rúbére a béláké, a ɔrɔ ŋgúna a mǐ dá, a zi pɔŋ láɓulaw a mǐ nyá.

⁸Ŋgɛŋnɛ́, kpáʼandɔʼɔ péna a ndáráké a mǐ e zoko mí, ka ɓá mbulí pɛ̧́na, ka Gáŋmbây, njuku walɓay a ndáráké, e hí̧ mí ka sêe walɓay a mɛ̌. Dáy, tí ɓá mǐ hɛʼɛ ní nyá, ké e hí̧ njukuri too ka zoko nâm réna a mɛ̌ ka law zína kɔ́.

⁹Timoté, mɔ́ rú mûn nɔ́ a gí ziŋ mí ɓá gánáké.

¹⁰Demás sáŋ mí ɓayhí̧lé, ké zi hɛ̧ a tísiri, a kála sé Tesaloník. Kɛrɛsáŋ kála sé tísiri a Galáte, Tît kɔ́, kála sé Dalmasí.

¹¹Luk hɛʼɛ, pé e kuu mǐ. Mɔ́ ɗá Márke gí kuu mɔ̌, ɓayhí̧lé ké e ka nɛ́rɛ̧ hí̧ mí a ɓil péna a Gáŋvbôn.

¹²Mi pé Tisík sé Efɛze.

¹³Mɔ̌ mí e gína lé, mɔ́ mbí laa gelvóna a mǐ, ka mi pɔŋ ka̧n Torowás, ka gél a Karpós gírú. Mɔ́ fa̧ mbétéri, tapátké ɓá mbété a kánákéri.

¹⁴Alekzaŋndɛrɛ, njuku paʼatu, niŋ hɛ̧ sé law ní mambá. Gáŋmbây e re niŋ hí̧ nɛ́ ɓá báŋké a ké niŋ hí̧ míy.

¹⁵Mɔ̌ kɔ́, mɔ́ ŋgbá tûló kuu mɛ̌! Ɓayhí̧lé ké manyɓay ka ŋgɛ́rɛ kuu ɓurú, sé tûl tɔ́ʼɔɓay a ɓurú.

¹⁶Titíláké, a kú ɓá mi sé ɓaraɓay, njuku hí̧ndɔ̂ʼɔ hí̧ mí zi tí yá, kú sáŋ mí too. Gáŋvbôn, ké zi ná fere hɛ́rɛ a mɛ̌ kɔ̧ tûl a kuriri ɓayké!

¹⁷Dáy Gáŋmbây, hí̧ndɔ̂ʼɔ hí̧ mí, a hí̧ mí ŋgɛ́rɛ, nǎŋnɔ́, mi tɔ́ʼɔɓay a mɛ̌, hí̧ njukuri too ka zi tí ɓá Juyíf yáy. Dáy ké pɛ̧́ mí a ɓil ndɔ̂ʼɔ a mamûu.

¹⁸Nǎŋnɔ́ Gáŋmbây e ten mi a ɓil hɛ̧ ɓékéri too, ké e ɓá mi ri ɓil Pû Mbây a mɛ̌ a nûnalê. Hɔ̧́na ké hí̧ nɛ́ dát! Amɛn!

¹⁹Mɔ́ nam Pirisîl kuu Akilás, rá̧ î̧n a Onɛ́zifɔr kɔ́.

²⁰Eráste kaw Kɔrɛŋte, mi pɔŋ Torofíme ɔ Milɛ́, ɓayhí̧lé mûn nɛ́, zi ga yá.

²¹Mɔ́ ɛ́ ŋgboro ka̧na ɓá gánáké rá̧ lékétêl ké ka̧. Eyubulus, Pudɛns, Liŋyus, Kolodiyá rá̧ nyîn a manárí̧ too nam mɔ́.

²²Gáŋmbây, ké kaw kuu mɔ̌! Béla a Gáŋvbôn, ké kaw kuu wǎyri too!