Read Capanahua Tît 2 Bible Online

Tît 2 - Capanahua bible

Tît 2

¹Dáy mɔ̌ Tît, mɔ́ tɔ́ʼɔhɛ̧ ka sé mahá̧na kuu tɔ́ʼɔɓay a ndáráké.

²Mɔ́ sa hí̧ kpɔʼɔrɔ́ri, kú ná mbí mûn a kuriri ka̧n ɓil távôn, kú kaw ɓá njukuri ka ma hɛʼɛ, njukuri ka e ka kɛrɛ a béláké, ka kaw kpú a ɓil láɓulaw, a ɓil zína rá̧ ikilaw.

³Nǎŋnɔ́ kɔ́, mɔ́ sa hí̧ máwûnyri̧ kɔ́, kú sé bɔʼɔséna ka Gáŋvbôn ziy. Kú zi ná sa ɓéké ɓay kɔ̧ tûl a njuku, malé kaw ɓá koy a vôn. Kú hí̧ nzáʼa nzɛ́rɛ a béláké,

⁴a kú tɔ́ʼɔ hí̧ wûny lɔŋɔ́ri̧, ŋgboro zi wɔ̧rɔ̧́ a kuriri rá̧ gun a kuriri,

⁵a kú kaw ɓá wûnynjuku ka erú ka kɛrɛ a béláké rá̧ káwa táŋáké, ka niŋ péna vûn a wɔ̧rɔ̧́ a kuriri ɓá béláké, a kú kaw ɓá wûny niŋ béla rá̧ wûny pɔtûl hí̧ wɔ̧rɔ̧́ a kuriri, rá̧ njukuri kú zi ná yáw ɓay a Gáŋvbôn ɓay tûl a kuriri.

⁶Nǎŋ, mɔ́ sa hí̧ kaban njukuri kɔ́, kú kaw ɓá njukuri ka e ka káwa a béláké,

⁷a ɓil hɛ̧ri̧ too. Mɔ̌ ka mûn nɔ́, mɔ́ kaw ɓá njuku ka e tɔ́ʼɔ ŋgboro niŋ péna a bélákéri. Tɔ́ʼɔhɛ̧ a mɔ̌ ké ná ɓá táŋáké ka ŋgboroké.

⁸Ɓay a mɔ̌ ké ná ɓá ndáráké, manyá ké tí yá, rá̧ njuku ŋgá̧na a mɔ̌ri̧, kú kaw ka sɔ̧rɔ̧. Ɓayhí̧lé kú zi ziŋ ɓéké ɓay, ɓay sa sé tûl a manárí̧ nyá.

⁹Belɓá koyri, kú pɔtûl a kuriri hí̧ bákáwa a kuriri a ɓil hɛ̧ too. Kú kaw ɓá béláké a mbɛl a kuriri, a kú manyɓay kuu kuriri yá,

¹⁰malé kú ríw hɛ̧ a há̧na mbêw a kuriri yá. Kú tɔ́ʼɔ bákáwa a kuriri káwa béláké, rá̧ káwa law mbêw, rá̧lǒo kú hí̧ ɗéla hí̧ tɔ́ʼɔhɛ̧ a Gáŋvbôn, njuku pɛ̧́ nárí̧.

¹¹Ɓayhí̧lé Gáŋvbôn tɔ́ʼɔ Béla a mɛ̌, ka ɓá sɛ̧w pɛ̧́na a njukuri too.

¹²Bélaké tɔ́ʼɔ nárí̧, ŋgboro sáŋ ɓéké káwa rá̧ zína a hɛ̧ a tísiri nɛ́, ɓay a sé bɔʼɔséna ka tísiri nɛ́ ɓá béláké, ɓá ndáráké, rá̧ káwa law mbêw kuu Gáŋvbôn.

¹³Nǎŋnɔ́ pé ná e kaw zoko béla ka ná kɛrɛ, rá̧ nâm ka hɔ̧́na a Gáŋvbôn a manárí̧ rá̧ hɔ̧́na a njuku pɛ̧́ nárí̧ Zezú Kiris e ten mûn nɛ́y.

¹⁴Ké hí̧ nárí̧ ndísɛ̌ʼɛ a mɛ̌, ɓay a zé manárí̧ a ɓil ɓékéhɛ̧, rá̧ ké ɓá nárí̧ tɛ̧́ njuku a táŋákéri, a ná kaw ɓá njuku a mɛ̌ri̧, a kaw ɗɛ́ŋ ɓay a niŋ béla pénari̧ dát.

¹⁵Mɔ́ sa ɓay hɛ̧ nɔ́rí̧, a mɔ́ kpúmûn a kuriri, a mɔ́ nzáʼa ziŋ njuku a fékéri ka zi lá mɔ́ nyáy ka kpɔ́ŋa. Njuku a há̧na mbêw ké ná yáw mɔ́.