Read Capanahua Tît 3 Bible Online

Tît 3 - Capanahua bible

Tît 3

¹Mɔ́ resa hí̧ njuku láɓulawri ɓá kú lá nzáʼa a mbâyri rá̧ lásarari. Belɓá kú lá nzáʼa a kuriri, a kú kaw ɗɛ́ŋ ɓay niŋ hɛ̧ a bélákéri too.

²Kú fára njuku a há̧na mbêw yá, a kú niŋ ɓay kuu njukuri yá. Dáy kú kaw ɓá njukuri ka ɓá káwa vónáké gí bazeŋ a njukuri rá káwa a béláké, a kú tɔ́ʼɔ vóna law hí̧ njukuri too dát.

³Ɓayhí̧lé manárí̧ kɔ́ í̧ŋásá̧, ná zi tí ka hɛ̧túna mbêw yá, dáy a kpútûl kuu Gáŋvbôn, nǎŋnɔ́ ná ɓɔ́l ŋgboro, a tɛ̧́ koy a hɛ̧ri̧ ka law manárí̧ ziy. Ná tí e a ɓil ɓékéhɛ̧, a kaw ɓá njuku ɓá law ka̧n tûl hɛ̧ri̧, nǎŋnɔ́ ná fɔny há̧narí̧ a bazeŋ manárí̧, njukuri pí, refɔ̧ny nárí̧ kɔ́.

⁴Dáy, gelka Gáŋvbôn, njuku pɛ̧́ nárí̧ tɔ́ʼɔ béla rá̧ zína a mɛ̌ hí̧ njukuri,

⁵ké pɛ̧́ nárí̧. Ké mí niŋ nǎŋ, tí ɓá ɓay ka ná niŋ péna a ndárákéri yá, dáy ɓá ɓay hɛ̧ a ké kósêe a manárí̧. Nǎŋnɔ́, ké pɛ̧́ nárí̧, ka hí̧ nárí̧ káwa a ŋgɛŋké ka ŋgboro a Têm Pukí ka turu nárí̧.

⁶Têm Pukíké, Gáŋvbôn fere ɓá ŋgɛ̧́náké kɔ́ tûl a manárí̧ ka ŋgboro a Zezú Kiris njuku pɛ̧́ nárí̧.

⁷Nǎŋnɔ́, ka ŋgboro a lawbéla a Gáŋvbôn, ná tɛ̧́ njuku a ndárákéri a mbɛlɛ́, ɓay a ziŋ káwa a ndísɛ̌ʼɛ dát, ka ná ɓá kɛrɛ a manárí̧ ka̧n tûlké.

⁸Ɓay nɛ́rí̧ ka mi sáy ɓá gbátɓay. Mi zi ɓá mɔ́ tɔ́ʼɔ ka kpɔ́ŋa, rá̧ njukuri ka láɓulaw hí̧ Gáŋvbôn, kú ew ɓá kpúnáké sé tûl niŋ béla pénari̧. A nɔ́, pé ɓá béla hɛ̧, ka erú ka nɛ́rɛ̧ ɓay a njukuri tooy.

⁹Dáy, mɔ́ manyɓay táŋ ŋgboroké yá, ɓá báŋa ɛ́ sɛ̧w a sɛl î̧n a zîiri, táhá̧narí̧, many há̧narí̧ sé tûl sáŋna a Mɔyíze. A nɔ́ too ná ɓá hɛ̧ a baaké, nɛ́rɛ̧ ké zi tí yá.

¹⁰Njuku mí ɓá njuku wal káwa a njukuri lé, mɔ́ nzɛ́rɛ nɛ́ bɔʼɔ mbêw rá̧ a bɔʼɔ séreké, ké mí zi lánáké yá lé, mɔ́ lú nɛ́ gefal.

¹¹Mɔ́ tu ɓá, mára̧ njuku nǎŋ e ka tûl ɓéké ŋgboro, ké mí zi pɔŋ niŋ nǎŋnɔ́ nyáy, ké ŋgá̧ tûlé ka mûn nɛ́.

¹²Mi e pé Artemás malé Tisík gé goló. Gelka, ké mí gé ka̧ lé, mɔ́ uru ɓá gánáké gí ziŋ mí a Nikopolîs. Ɓayhí̧lé ka sá̧, pé mi zi ɓay a kawrú ka lékétêl.

¹³Mɔ́ mɔny gɔ́rɔ́ a Zenás, njuku hánzáʼa ɓá a béláké, rá̧ Apoló kɔ́, hɛ̧ a há̧na ké zi ná mbá kuriri ka ŋgboro.

¹⁴Belɓá njuku láɓulaw kɔ́, kú mbɛl niŋ béla pénari̧, ɓay kú ma hí̧ndɔ̂ʼɔ ɓá a ŋgɛ̧́náké hí̧ njukuri, ka hɛ̧ mbá kuriri, a goló láɓulaw a kuriri, tí ná ɓǎŋ baa táŋ lénáké yá.

¹⁵Njukuri too, ka e kuu mǐ, nam mɔ̌. Mɔ́ nam mbáŋa a manárí̧ a ɓil láɓulaw too. Béla a Gáŋvbôn ké kaw kuu wǎyri too!