Read Capanahua Hebiréri 1 Bible Online

Hebiréri 1 - Capanahua bible

Hebiréri 1

¹A títáʼaké sá̧, Gáŋvbôn saɓay hí̧ zîi a manárí̧, ka ŋgboro ɓórí ɓórí ɓá ŋgɛ̧́náké ka nzáʼa a porofɛ́tri.

²Dáy a ŋgɛŋnɛ́, ka ɓá sêe a kɔ́rɔ́ké, Gáŋvbôn saɓay hí̧ nárí̧ ka ŋgboro a Gun a mɛ̌, a ké ɓá nɛ́ ɓá nyandal. Ka ŋgboro a mɛ̌, pé Gáŋvbôn mɔny tísiri too.

³Hɔ̧́na a Gáŋvbôn too, tɔ́ʼɔ mûn nɛ́ ka ŋgboro a mɛ̌, Ké tɔ́ʼɔ gbát káwa a Gáŋvbôn. Ké ŋgbá hɛ̧ too ka tísiri ew ka ŋgboro kpɔ́ŋa ɓay a mɛ̌. Ké turu ɓéké a njukuri, ka he sé kaw ndɔ̂ʼɔ lâʼa a Gáŋvbôn ka ndé ka kpɔ́ŋay.

⁴Gun a Gáŋvbôn ndé aŋnzeri too ka nɛ́rɛ̧. Ɓayhí̧lé Gáŋvbôn hí̧ nɛ́ rɛŋ ka ndé rɛŋ a kuriri too.

⁵Dáy ɓay há̧na mbêw erú, ka Gáŋvbôn zi sa bɔʼɔ mbêw hí̧ aŋnze a há̧na nyáy. Ɓayké ɓá: «Mɔ ɓá Gun a mǐ, tí ka sénɛ́, mi kaw ɓá Bâa a mɔ̌.» Malé, ké zi sa hí̧ aŋnze a há̧na ɓá: «Mi e kaw ɓá Bâa a mɛ̌, ké e kaw ɓá gun a mǐ nyá.»

⁶Dáy, sêe ka Gáŋvbôn pé mbɔŋɔ Gun gí tísiriy, ké sa ɓá: «Aŋnzeri too, kú huku mbɛlɛ́ a hɔ̧́ nɛ́.»

⁷Ɓay, ka Gáŋvbôn sa sé tûl a aŋnzeri ɓá: «Gáŋvbôn niŋ aŋnzeri ɓá kúkúna, njukupéna a mɛ̌ri̧ ɓá rêm hɔrɛ.»

⁸Dáy, a Gun a mɛ̌, ké sa: «Mɔ ɓá Gáŋvbôn, káwa mbây a mɔ̌ e ná dát. Káwa mbây a mɔ̌ ka tûl a njukuri e ná ɓá ndáráké.

⁹Mɔ zi hɛ̧ a ndáráké, ka fɔny hɛ̧ a belyáké. Ɓaykénɔ́, mɔ̌ Gáŋvbôn, Gáŋvbôn a mɔ̌ ten mɔ́, a ɓá mára̧ mûnrína a mɛ̌ nɔ́ mɔ́, ɓay mɔ́ kaw tûl a gárá mbâyri too.»

¹⁰Gáŋvbôn sa pí ɓá: «Mɔ̌ Gáŋmbây, a títáʼaké, mɔ mɔny tísiri, rá̧ nûnalê kɔ́ ɓá gél ndɔ̂ʼɔ péna a mɔ̌.

¹¹Hɛ̧ nɔ́rí̧ too e ɔna, dáy mɔ̌, mɔ e kaw dát. Nûnalê rá̧ tísiri e kpɔʼɔra ɛ́ŋ laa,

¹²mɔ ka kuriri ɓá báŋa gáŋ laa, nǎŋnɔ́, kú e fere kuriri ɓá báŋa laa. Dáy mɔ̌, mɔ́ e kaw dát ɓá mbêwké, mbimbɔ̂m a mɔ̌ ma ɔ bɔʼɔ mbêw yá.»

¹³Gáŋvbôn, zi sa bɔʼɔ mbêw hí̧ aŋnze a mɛ̌ a há̧na mbêw ɓá: «Mɔ́ gí kaw ndɔ̂ʼɔ lâʼa a mǐ, ka̧ sêe ka mi e mára̧ njuku ŋgá̧na a mɔ̌ri̧ kú tɛ̧́ gel ɓá bɔʼɔ kɔ̧rú̧ nyá.»

¹⁴Katína aŋnzeri, kaw ɓá têm ka niŋ péna hí̧ Gáŋvbôn, ké pé kuriri ɓay a kú hí̧ndɔ̂ʼɔ hí̧ njukuri ka e ziŋ pɛ̧́na.