Read Capanahua Hebiréri 10 Bible Online

Hebiréri 10 - Capanahua bible

Hebiréri 10

¹Katína lé, sáŋna a Mɔyíze, ná ɓá têm hɛ̧ a bélákéri ka e gínay, a tí ɓá gbát hɛ̧ ka mûn nɛ́ nyá. Ɓaykénɔ́ pé, ka ŋgboro a hɛ̧púna mbimbɔ̂m dát, zi ma ɓá njukuri ka kaw niŋ hɛ̧púna nɔ́, tɛ̧́ njuku a táŋákéri a mbɛl a Gáŋvbôn nyá.

²Mi zi tí nǎŋnɔ́ nyáy, njukuri zi tɔ́ŋ niŋ hɛ̧púnaké dát ɓáy yá, ɓayhí̧lé, hɛ̧púnaké nɔ́ a kú niŋ hí̧ Gáŋvbôn, ɓékéhɛ̧ a kuriri turu too dá, nǎŋnɔ́, kú zi tí ka kɛrɛ a ɓékéhɛ̧ a kuriri ɓáy mbaa.

³Dáy, ka ŋgboro a hɛ̧púnaké nɔ́, niŋ rá̧ kú kɛrɛ ɓékéhɛ̧ a kuriri mbimbɔ̂m dát.

⁴Ɓayhí̧lé sêm ndayri rá̧ sêm bal hwálári, ma lú ɓékéhɛ̧ bɔʼɔ mbêw yá.

⁵Ɓaykénɔ́ pé, sêe ka Kiris kaw gí tísiri nɛ́y, ké sa hí̧ Gáŋvbôn ɓá: «Mɔ zi zibɔʼɔ a hɛ̧púna malé hɛ̧hí̧na nyá, dáy, a mɔ mɔny mûn hí̧ mí.

⁶Nǎŋnɔ́, mɔ zi ziŋ mûnrína sé tûl hɛ̧púna a hɛ̧sâ̧ny a kú rɛ́ŋ a nzáʼaká̧na malé hɛ̧púna ɓay a turu ɓékéhɛ̧ nyá.

⁷Dáy, mi sa: “Gáŋvbôn, mǐ kaw yáy, ɓá báŋké a kú ɗé ka̧n ɓil káná mbété sé tûl ní, mi gí, ɓay a niŋ hɛ̧ ka mɔ ziy.”»

⁸Ɓá báŋké ka Kiris tí sa ɗambɛl ɓá: «Mɔ zi zibɔʼɔ hɛ̧púna, malé hɛ̧hí̧na a ndɔ̂ʼɔ malé hɛ̧sâ̧ny a kú rɛ́ŋ a nzáʼaká̧na, malé hɛ̧púna ɓay vbá̧buma a ɓékéhɛ̧ri̧ yá. Katína, mɔ sa hɛ̧ nɔ́rí̧ too zi ri mɔ nyá.» A tu ɓá hɛ̧ nɔ́rí̧ too, niŋ ka ŋgboroké ɓá báŋké ka sáŋna tɔ́ʼɔy.

⁹Kiris resa ɓáy: «Mǐ kaw yáy, mi gí ɓay a niŋ hɛ̧ ka mɔ ziy.» Ɓá nǎŋnɔ́ pé Kiris lú hɛ̧púna a tâ̧wkéri, pé a ɓá hɛ̧ a ŋgɛŋké ka̧n gelké.

¹⁰Kiris, niŋ hɛ̧ ka Gáŋvbôn ziy, ka ŋgboro a hí̧ mûn ɓá hɛ̧púna bɔʼɔ mbêw yáŋ. Ka ŋgboro a nɔ́ pé ɓékéhɛ̧ a manárí̧ ziŋ túray.

¹¹Njuku nzáʼaká̧na too, ew sêe too ɓay a niŋ péna a niŋ hɛ̧púna a mbêwké nɔ́ dát, ka zi ma lú ɓékéhɛ̧ a njuku bɔʼɔ mbêw yáy.

¹²Dáy Kiris mɛ̌, ké gí niŋ hɛ̧púna bɔʼɔ mbêw yáŋ ɓay a ɓékéhɛ̧ri̧, a resé kaw ndɔ̂ʼɔ lâʼa a Gáŋvbôn dát.

¹³Ŋgɛŋnɛ́, ké zoko ɓá Gáŋvbôn, ké mára̧ njuku ŋgá̧na a mɛ̌ri̧ too, kú tɛ̧́ gel ɓá bɛʼɛ kɔ̧rú̧.

¹⁴Nǎŋnɔ́ ka ŋgboro a hɛ̧hí̧na mbêw yáŋ, ké turu njukuri ka erú ka ɓékéhɛ̧ri̧, ɓay kú kaw ɓá táŋáké dát.

¹⁵Ɓá hɛ̧ ka Têm Pukí sa hí̧ nárí̧ kɔ́, ɓayhí̧lé a fal ka Gáŋmbây sa ɓá:

¹⁶«Í kó ŋgá̧nzáʼa, ka mi e ŋgá̧ kuu kuriri a fal nâmké nɔ́, Mi e ɗé sáŋna a mǐ, ka̧n ɓil law a kuriri, a ɗé ka̧n tûl a kuriri.

¹⁷Mi tí kɛrɛ hɛ̧ belyáké a kuriri mbaa, malé ɓékéhɛ̧ a kuriri mbaa.»

¹⁸Nǎŋnɔ́ gel ka vbá̧buma a ɓékéhɛ̧ erú dáy, ŋgboro niŋ hɛ̧púna ɓay tûl ɓékéhɛ̧ zi tí mbaa.

¹⁹Nǎŋnɔ́ dáy nyîn nírí̧, ŋgboro erú hí̧ nárí̧ a ŋgɛŋnɛ́, ɓay a ná ri gel ka táŋ mambáy, ka ŋgboro a sêm mûn a Zezú táŋ wɔ́w.

²⁰Ké ŋgburu ŋgboro a ŋgɛŋké, ŋgboro a ndísɛ̌ʼɛ, ka tɛ̧́ tálá ɓil gáŋ laa ka wal ɓil vûn a Gáŋvbôn, zi ɓay a sa ɓá: Ka ŋgboro a mûn nɛ́.

²¹Dáy ná erú ka Gáŋnjuku nzáʼaká̧na, ka kaw tûl a hɛ̧ri̧ too a ɓil vûn a Gáŋvbôn.

²²Ná ta̧m gí mbɛlɛ́ ka law mbêw, ka mbílaw a táŋáké, táŋ ɓéké kɛrɛ, rá̧ mûn a kú turu ka mbii a táŋáké.

²³Ná ŋgbá ɓá kpúnáké, a ná tɔ́ŋ tɔ́ʼɔɓay ka ná ɓá kɛrɛ a manárí̧ ka̧n tûlké. Ɓayhí̧lé Gáŋvbôn ka hí̧nzáʼa, ké kaw law mbêw.

²⁴Ná ɛ̧rɛ̧ há̧narí̧, ɓay ná hí̧ há̧na ŋgɛ́rɛ zína a bazeŋ a manárí̧ rá̧ ŋgɛ́rɛ niŋ béla.

²⁵Ná zi ná pɔŋ mára̧ a manárí̧, ɓá báŋa péna niŋa a njuku a fékéri. Dáy belɓá, ná hí̧ndɔ̂ʼɔ hí̧ há̧narí̧ sêe too, ɔrɔ iké ɓá, ka ná kó nâm a Gáŋmbây gí ɗɛ́ŋ dáy.

²⁶Ɓayhí̧lé manárí̧ mí tɔ́ŋ niŋ ɓékéhɛ̧ ka zína a law a manárí̧, a fal ka ná tu gbátɓay dáy, hɛ̧púna a féké zi tí ɓáy mbaa, ka e lú ɓékéhɛ̧.

²⁷Ɓá zoko ka law lúna kpɔ́ŋa walɓay a Gáŋvbôn rá̧ ŋgɛ́rɛ hɔrɛ ka e gí rɛ́ŋ njuku ŋgá̧na a Gáŋvbônri̧.

²⁸Njuku ka zi tɔ́ŋ sáŋna a Mɔyíze yáy, ka njukuri sére malé sáy kɔ́ ka sáy, njukuké e ziŋ hûl táŋ njuku ké kósêe a mɛ̌.

²⁹Dáy a kɛrɛ a wǎyri wá, e ná a̧ní hí̧ njuku ka yáw Gun a Gáŋvbôn, ka zi kó nɛ́rɛ̧ a sêm ŋgá̧nzáʼa, ka ziŋ turu ɓékéhɛ̧ a mɛ̌, ka a fára Têm Pukí ka ɓá sɛ̧w a béla a Gáŋvbôn, tí ŋgɛ́rɛ mambá hí̧ nɛ́ nyá lé?

³⁰Ɓayhí̧lé ná tu ɓá táŋáké, ɓá njuku a sa: «Mǐ pé ɓá njuku káŋ njuku! Mǐ pé e rerú a ɓéké a njuku hí̧ njuku!» Ké resa ɓáy kɔ́ ɓá: «Gáŋmbây, pé e walɓay a njuku a mɛ̌ri̧.»

³¹Ŋgɛ́rɛ mambá, ɓay a njuku ké lé ɓil ndɔ̂ʼɔ a Gáŋvbôn a ndísɛ̌ʼɛ.

³²Í kɛrɛ ɓil nâm a mbɛlkéri, ka i ziŋ geltáŋa a Gáŋvbôn, ka a ŋgá̧law a wǎyri a ɓil tɔ́ʼɔsêe, ka a ew kpú a ɓil ŋgɛ́rɛ bére.

³³Njuku a fékéri a bazeŋ a wǎyri, kú fára kuriri, a ɓá kuriri tɔ́ʼɔsêe a ɓil dawá, a féké ɓáy, kú kaw ɗɛ́ŋ ɓay hí̧ndɔ̂ʼɔ, hí̧ njukuri a kú ɓá kuriri tɔ́ʼɔsêe kɔ́y.

³⁴Katína, i tɔ́ʼɔsêe kɔ́ kuu njukuri, a kú ŋgbá kuriri kɔ̧ vûn sɛl ɓay tûl láɓulaw a kuriri. Nǎŋnɔ́, i zibɔʼɔké ka sáʼa, a kú naʼa hɛ̧zíŋa a wǎyri, ɓayhí̧lé i tu ɓá, i erú ka hɛ̧zíŋa ka ndé a nɔ́ a nûnalê ka béla, ka ma ɔ bɔʼɔ mbêw yáy.

³⁵Nǎŋnɔ́, í ná pɔŋ hɛ̧ri̧ ka í ɓá kɛrɛ a wǎyri ka̧n tûlké, ɓayhí̧lé, a ɓil hɛ̧ nɔ́rí̧, pé kpáʼandɔ̂ʼɔ péna a wǎyri ɓá hɔ̧́náké erúy.

³⁶I zi ɓay a ew ɓá kpúnáké rá̧ í ziŋ niŋ hɛ̧ ka Gáŋvbôn ziy, rá̧ ɓay a ziŋ hɛ̧ a ké hí̧nzáʼa ɓayké.

³⁷Ɓayhí̧lé kú ɗé ɓá: «Sɛl a sêe zi kpay, tɛ̧́w yáŋ, ɓay a njuku ka e gínay, ké gí, ké tí ɗí ɓǎŋ nyá.»

³⁸Nǎŋnɔ́ Gáŋvbôn sa: «Njuku ka ɓá njuku a ndáráké a mǐy, e kaw ka ŋgboro a láɓulaw. Dáy, ké mí ré ka mûn nɛ́ sé fal, mi zi tí ka mûnrína sé tûlé yá.

³⁹Manárí̧, ná zi tí ɓá mára̧ njukuri, ka ré ka mûn a kuriri sé fal, ɓay a ɓɔ́l tûl a kuriri yá. Ná e a ɓil a njukuri ka kaw ɓil láɓulaw, ɓay a pɛ̧́ mûn a kuriri.»