Read Capanahua Hebiréri 11 Bible Online

Hebiréri 11 - Capanahua bible

Hebiréri 11

¹Láɓulaw, ɓá mbílaw ka̧n tûl hɛ̧, ka mɔ kɛrɛ ɓá mɔ́ e ziŋáké, zi ɓay a sa kɔ́ ɓá, zibɔʼɔ hɛ̧ ka mɔ zi kó yáy.

²Ka ŋgboro a láɓulaw, pé kú saɓay a béláké sé tûl a njuku a i̧ŋásá̧kéri.

³Ka ŋgboro a láɓulaw, pé ná tu ɓá Gáŋvbôn mɔny tísiri ka ŋgboro a ɓay a mɛ̌. Nǎŋnɔ́, hɛ̧ri̧ too ka ná kóy, Gáŋvbôn mɔny tɛ̧́ gí ka ŋgboro a hɛ̧ri̧ ka ná zi kó yáy.

⁴Ka ŋgboro a láɓulaw, pé Abɛl niŋ hɛ̧púna a béláké ka ndé ɓala a Kâ̧nyí. Nǎŋnɔ́ ka ŋgboro a láɓulaw nɔ́ pé Gáŋvbôn mbí Abɛl ɓá njuku a ndáráké. Ɓayhí̧lé Gáŋvbôn mɛ̌ ka mûn nɛ́, zibɔʼɔ hɛ̧púnaké. Abɛl hú dá, dáy ka ŋgboro a láɓulaw a mɛ̌, ké saɓay dát.

⁵Ka ŋgboro a láɓulaw a Enɔ́k, pé Gáŋvbôn mbí nɛ́ ka nûn he sé nûnalê, ɓay ké zi ná ziŋ hûl. Njuku zi kó Enɔ́k mbaa, ɓayhí̧lé Gáŋvbôn mbí nɛ́ ka nûn sé nûnalê. Katína, Ɗambɛl rá Gáŋvbôn ké mbí Enɔ́k, Mbété sa ɓá: Gáŋvbôn e ka lawrína sé tûl a Enɔ́k.

⁶Nǎŋnɔ́ táŋ láɓulaw, Gáŋvbôn zi ma e ka lawrína sé tûl a njuku a há̧na mbêw yá, ɓayhí̧lé belɓá njuku ka gí ɗɛ́ŋ kuu Gáŋvbôn, ké láɓulaw ɓá Gáŋvbôn erú, mɛ̌ pé kaw ɓá njuku ka e hí̧ kpáʼandɔ̂ʼɔ hí̧ njukuri ka ɛ́ nɛ́.

⁷Ka ŋgboro a láɓulaw pé Nuwé láɓay a Gáŋvbôn, ka saɓay a hɛ̧ri̧ ka e gína, a kú pa̧n kó yá ɓáy. Dáy Nuwé hɛʼɛ Gáŋvbôn, a mɔny batô, ka e pɛ̧́ nɛ́ kuu î̧n a mɛ̌ri̧. Nǎŋnɔ́, ka ŋgboro a láɓulaw, pé Nuwé ziŋ walɓay ŋgbá njuku a tísiriri, dáy ka ŋgboro a láɓulaw a mɛ̌ ké ziŋ béla a Gáŋvbôn, ka mbí nɛ́ ɓá njuku a ndáráké.

⁸Ka ŋgboro a láɓulaw, pé Abaraham lá nzáʼa, pé a zibɔʼɔ ɗína a Gáŋvbôn, pé a uru a kála sé tísiri ka Gáŋvbôn zi ɓay a hí̧ nɛ́, táŋ tu gel a ké kaw serúy.

⁹Ka ŋgboro a láɓulaw kɔ́, pé Abaraham uru ɓá gɔ́rɔ́ sé kaw tísiri ka Gáŋvbôn hí̧nzáʼa ɓá ké e hí̧ nɛ́y. Ké ná ɓil gbáʼari kuu Izák rá̧ Zakob, kuriri kɔ́, ɓá gun nyandal a tísiri a mbêwké nɔ́ kuu Abaraham.

¹⁰Ɓayhí̧lé, Abaraham zoko pû, ka ndál pûké ɓá kpúnáké, pû ka Gáŋvbôn ka mûn nɛ́ pé kaw ɓá njuku mɔnyáké rá̧ njuku zánaké.

¹¹Ka ŋgboro a láɓulaw pé Sára, a ɓil kpɔʼɔrɔ a mɛ̌ too, Gáŋvbôn hí̧ nɛ́ kpɔ́ŋa mbuŋ gun, ɓayhí̧lé ké láɓulaw hí̧ law mbêw a Gáŋvbôn ka hí̧nzáʼa.

¹²Ɓaykénɔ́, pé ka ŋgboro a njuku mbêw, ka ŋgɛ́rɛ zi tí mbaay, ka zi ɗɛ́ŋ ɓay hûl dáy, pé gunri̧ ɓá ŋgɛ̧́náké ziŋ mbuŋa ɓá báŋa rôori a nûnalê, ɓá báŋa sikɔʼɛrɛri ka gbaŋ mbii lúkí, ka njuku ma kɛ̧́náké yáy.

¹³A ɓil láɓulaw pé njuku nɔ́rí̧ too ziŋ hûl, táŋ ziŋ hɛ̧ri̧ ka Gáŋvbôn hí̧nzáʼa ɓay a hí̧ kuriri. Dáy, kú ziŋ kónáké, a ziŋ namáké ɓá ɗínáké, a tu ɓá táŋáké ɓá kú kaw ɓá njuku a gínakéri rá̧ gɔ́rɔ́ri ka tísiri.

¹⁴Ɓayhí̧lé njukuri ka saɓay nǎŋnɔ́, tɔ́ʼɔ ɓá táŋáké ɓá, kú kaw ɛ́ tísiri a kuriri.

¹⁵Kú zi kɛrɛ tâ̧w gel a kú pɔŋ nyá, a tí yá lé, kú e ɛ́ ŋgboro resé fal.

¹⁶Katína lé, kú kaw ɛ́ tísiri a kuriri ka ndé ka bélay, ka ɓá gelkáwa a nûnalê. Ɓaykénɔ́, pé Gáŋvbôn zi tí ka sɔ̧rɔ̧ ɓá kú ɗí nɛ́, ɓá Gáŋvbôn a kuriri yáy, ɓayhí̧lé ké mɔny pû zoko kuriri.

¹⁷Ka ŋgboro a láɓulaw, pé Abaraham hí̧ gun a mɛ̌ Izák ɓá hɛ̧púna, gelka Gáŋvbôn lélawɛ́. Ké kaw ɗɛ́ŋ ɓay a hí̧ gun mbêw a mɛ̌, a tu ɓá Gáŋvbôn hí̧nzáʼa hí̧ nɛ́, a sa hí̧ nɛ́ ɓá:

¹⁸«Ka ŋgboro a Izák, pé mɔ e ziŋ gun ɓilóri, ɓá báŋké nɔ́ ka mi hí̧nzáʼa hí̧ mɔ́y.»

¹⁹Abaraham kɛrɛ ɓá, Gáŋvbôn erú ka kpɔ́ŋa ɓay a toma njuku ka hûl, ɓaykénɔ́ pé Gáŋvbôn rerú gun a mɛ̌ hí̧ nɛ́, ná ɓá báŋa galahɛ̧ sé tûl a njuku ka hú, ka a retomay.

²⁰Ka ŋgboro a láɓulaw, pé Izák ɗí béla kɔ̧ tûl a Zakob kuu Esawu, ɓay a káwa a kuriri a fal.

²¹Ka ŋgboro a láɓulaw, pé Zakob zi ɗɛ́ŋ ɓay a hûl, dáy a ɗí béla kɔ̧ tûl a gun a Jozɛfri mbêw mbêw too, ka ɗíŋ tûl kâ̧w a mɛ̌ a hí̧ ɗéla hí̧ Gáŋvbôn.

²²Ka ŋgboro a láɓulaw, pé Jozɛf kaw húna, dáy a saɓay a tɛ̧́na a gun Izirayɛ́lri ka tísiri a Ezípte, pé a hí̧nzáʼa sé tûl hɛ̧ a kú e niŋáké ka húrú mûn nɛ́.

²³Ka ŋgboro a láɓulaw, pé Mɔyíze a fal mbuŋ nɛ́, bâa a mɛ̌ri̧ ɓá nɛ́ mú fêw sáy. Kú kó ɓá gunké bel njuku mambá, dáy a zi ŋgú wɔ́w a many nzáʼa a mbây yá.

²⁴Ka ŋgboro a láɓulaw pé, Mɔyíze gelka ké hɔ̧́y, ké zi ɓá kú ɗí nɛ́ ɓá gun zîi a Farawôŋ nyá.

²⁵Ké kó ɓá bel ndé ké tɔ́ʼɔsêe kuu njuku a Gáŋvbônri̧, ndé káwa kpay yáŋ ɓá béláké a ɓil ɓéké.

²⁶Katína, ké tí kó yáwhɛ̧ ɓá báŋa Kiris a kú yáw nɛ́y, ná ɓá gáŋ hɛ̧zíŋa, ka ndé hɛ̧zíŋa a tísiri a Ezípte, ɓayhí̧lé ɛ̧rɛ̧ gel a mɛ̌ ɔ ɓá tûl kpáʼandɔ̂ʼɔ péna ka e gínay.

²⁷Ka ŋgboro a láɓulaw, pé Mɔyíze uru ka tísiri a Ezípte, táŋ ŋgú wɔ́w a hɛ́rɛ a mbây a Ezípte, ɓayhí̧lé ké ew ɓá kpúnáké, ɓá báŋa ké kó Gáŋvbôn ka njuku zi kó yáy.

²⁸Ka ŋgboro a láɓulaw, pé Mɔyíze niŋ Pâk pé a ɓá sêm nɔ́ nzáʼaŋgboro, ɓay a aŋnze a hûl, ké zi ná í gáŋnjuku gun a njuku Izirayɛ́lri.

²⁹Ka ŋgboro a láɓulaw, pé gun Izirayɛ́lri, tá ɓil mbii lúkí a sɛ́ŋɛ́, ɛ́ŋ tísiri a hɔ́ʼɔké baa. Dáy a gun Ezípteri, ka zi ɓay a kú ta̧ tɔ́ŋ gun Izirayɛ́lri, mbii gí nyá kuriri.

³⁰Ka ŋgboro a láɓulaw, pé gekén a pû a Jeriko lé, gelka gun Izirayɛ́lri séséna ɗɔ́ŋ rú nâm zíndɔ̂ʼɔsáy.

³¹Ka ŋgboro a láɓulaw, pé Rahab wûny niŋ dala, zi ziŋ hûl kuu njuku kpútûlri yá, ɓayhí̧lé ké nyá njuku nzáʼapéna a gun Izirayɛ́lri ɓá béláké ná vûn a mɛ̌, a kú gí ɓɛʼɛ pû.

³²A̧hí̧, mi zi ɓay a sanáké ɓay lé? Sɛl a sêe zi tí hí̧ mí, ɓay mi saɓay a Zedeyɔ́ŋ, malé Barák, malé Samsɔ́ŋ, malé Zefté, malé mbây Davít, malé Samuwɛl rá̧ porofɛ́t a fékéri yá.

³³Ɓayhí̧lé njuku nɔ́rí̧, ka ŋgboro a láɓulaw, kú rúbére a ndé pû mbâyri, a tɔ́ʼɔ káwa a ndáráké, a ziŋ hɛ̧ ka Gáŋvbôn hí̧nzáʼa ɓayké, ka tu nzáʼa a mamûuri̧,

³⁴kú í ŋgɛ́rɛ hɔrɛ, a ziŋ pɛ̧́na ka nzáʼa gá̧má, ka ziŋ ŋgɛ́rɛ ka záŋmá a kuriri. Kú ziŋ ndéna a ɓil bére, a ní ŋgawbére a njuku ŋgá̧nari̧.

³⁵Ka ŋgboro a láɓulaw, wûnynjukuri ziŋ kó njuku a kuriri ka húy, toma. Dáy, njuku a fékéri tɔ́ʼɔsêe, kú zi ɓá kú sɛl kuriri yá, a kú ziŋ hûl, ɓayhí̧lé kú zi ɓá kú toma ka hûl, a regí ziŋ káwa ka ndé ka bélay.

³⁶Njuku a fékéri ɓáy, ziŋ fára rá̧ vbá̧na, njuku a fékéri kú ŋgá̧ kuriri ka̧n vûn sɛl.

³⁷Kú vbú kuriri ka í kuriri ka saw, a kú kúŋ a há̧narí̧ ka sîi, ka í fékéri ka gá̧má. Njuku a fékéri ŋgú a ɓɛrɛ magélri too, a ri ɓá gâa mbóléri rá̧ hwálári, kú fóy, hɛ̧ri̧ ɓá ŋgɛ̧́náké mbá kuriri, kú ɓá kuriri tɔ́ʼɔsêe, a niŋ kuriri hɛ̧ a belyáké.

³⁸A tu ɓá, njuku nɔ́rí̧ katína lé, tísiri nɛ́ zi ma káwa a kuriri yá. Kú há̧ra̧ sé lá gélri ɓórí ɓórí, lá ɓil kaw, ɓil konri̧, ɓil pɔ̂nyri̧ rá̧ ɓil lɔ̂ʼɔri.

³⁹Njuku nɔ́rí̧ too, a kú saɓay a kuriri ɓá béláké ɓay tûl láɓulaw a kuriri, zi ziŋ hɛ̧ ka Gáŋvbôn hí̧nzáʼa ɓay a hí̧ kuriri yá.

⁴⁰Ɓayhí̧lé Gáŋvbôn tí mɔny béla hɛ̧ a hɔ̧́náké, ɓay a manárí̧. Nǎŋnɔ́ Gáŋvbôn, zi ɓá kú zi ná ziŋ ka̧ káwa a béláké táŋ manárí̧.