Read Capanahua Hebiréri 12 Bible Online

Hebiréri 12 - Capanahua bible

Hebiréri 12

¹Nǎŋnɔ́, ná erú ka njukuri ɓá ŋgɛ̧́náké ka kaw ɗɔ́ŋ nárí̧ a kaw kó nárí̧, ɓaykénɔ́, ná pɔŋ hóla too ka de nárí̧ sésénay, gé fal, tapátké, ɓékéhɛ̧ ka mbɔl nárí̧ ɗɛ́ŋ. A ná ŋgú ŋgúna ka zoko nárí̧ táŋ ta̧mûn.

²A ná ɓá ɛ̧rɛ̧ gel a manárí̧ dát ɔ ɓá tûl a Zezú. Ɓá mɛ̌ pé láɓulaw a manárí̧ kaw tûlé, tí ka títáʼaké sé ka̧ kɔ́rɔ́ké. Zezú ziŋ hûl ka tûl dii vbatay, táŋ kó sɔ̧rɔ̧ ka erú ka mára̧ hûlké nɔ́. Ɓayhí̧lé ké kɛrɛ lawrína a zoko nɛ́, dáy a ŋgɛŋnɛ́, ké kaw ka ndɔ̂ʼɔ lâʼa a gelkáwa Mbây a Gáŋvbôn.

³Í kɛrɛ mára̧ ikilaw a nɔ́ ka Zezú iki a ɓil tɔ́ʼɔsêe a ɓil ndɔ̂ʼɔ a ɓéké njukuri, ka fɔny nɛ́. Nǎŋnɔ́ ɓay a í zi ná vomûn a wǎyri a í reka mûn a wǎyri sé fal!

⁴Ɓayhí̧lé, i zi ŋgbá kpú a ɓil rúbére a wǎyri kuu ɓékéhɛ̧ ka̧ hûl yá ɓáy!

⁵Dáy, i yɛʼɛrɛ nzáʼa nzɛ́ra ka Gáŋvbôn hí̧ wǎyri ɓá báŋa gun a mɛ̌ri̧ dá lé? Ké sa: «Gun a mǐ, mɔ́ ná kó nzɛ́rɛ a Gáŋmbây a mɔ̌, ɓá báŋa hɛ̧ a baaké, a mɔ́ zi ná vomûn nɔ́ gelka ké kaw nzɛ́rɛ mɔ́y.

⁶Ɓayhí̧lé Gáŋmbây nzɛ́rɛ njuku a ké ziy, a ké vbá̧ gun a ké tu ɓá gun a mɛ̌y.»

⁷Í ikilaw a ɓil tɔ́ʼɔsêe a wǎyri, ka Gáŋvbôn mí nzɛ́rɛ wǎyri, ɓayhí̧lé Gáŋvbôn kó wǎyri ɓá báŋa gun a mɛ̌ri̧. Gun a sí̧ rá̧ bâa a mɛ̌ zi nzɛ́rɛ nɛ́ nyá lé?

⁸Wǎyri, mí ziŋ nzɛ́rɛ ɓá báŋa gunri̧ too nyáy, tɔ́ʼɔ ɓá, i zi tí ɓá gbát gun a mɛ̌ nyá, i ɓá gun dalari.

⁹Ná kɛrɛ káwa manárí̧ kuu bâa manárí̧ ka tísiri nɛ́, kú nzɛ́rɛ nárí̧, ná lá kuriri. Dáy belɓá ná lá Gáŋvbôn Bâa a manárí̧ a nûnalê ndé ɓáy, rá̧ ná ziŋ káwa a ndísɛ̌ʼɛ dát.

¹⁰Bâa a manárí̧ ka tísiri nzɛ́rɛ nárí̧, ɓay nâm kpay yáŋ, ɓá báŋké a kú ziy, dáy Gáŋvbôn nzɛ́rɛ nárí̧, ɓay tûl béla a manárí̧, ɓay ná ziŋ káwa a táŋáké a mɛ̌.

¹¹Katína nzɛ́rɛ hɛ̧ too ka núnmbɛ̧́nɛ́ nɔ́, zi ná ɓá hɛ̧ mûnrína nyá, ná ɓá hɛ̧ lawyíra. Dáy a falké lé, njukuri ka ziŋ nzɛ́rɛké nɔ́, ziŋ káwa a ndáráké rá̧ a vónáké.

¹²Ɓaykénɔ́, í gbaŋ ndɔ̂ʼɔ a wǎyri ka tá̧y, a í ndara nzáʼa túka a wǎyri ka ɗɔ̧y.

¹³Í séséna ka tûl ŋgboro a ndáráké, rá̧ bɔʼɔ a belyáké, ké ɓew gé ɓá mbɛl yá, a ké ziŋ ŋgɛ́rɛ.

¹⁴Í ɛ́ káwa a vónáké kuu njukuri too, rá̧ káwa a táŋáké, ɓayhí̧lé káwa a táŋáké mí zi tí yáy, njuku ka e kó Gáŋmbây zi tí yá.

¹⁵Í koro káwa a wǎyri ɓá béláké, ɓay a njuku a há̧na ké zi ná pɛ̧rɛ̧ béla a Gáŋvbôn, a njuku a há̧na ké zi ná kaw ɓá báŋa sɛ̧w dii a zuŋáké ka tɛ̧́, ka hí̧ ɓéké káwa, ka ɓew káwa a njukuri ɓá ŋgɛ̧́náké ka zuŋá a mɛ̌.

¹⁶Í kó rá̧, ɓay a njuku a há̧na, ké zi ná ri ɓil káwa niŋ dala, malé yáwhɛ̧ a táŋáké ɓá báŋa Esawu, mɛ̌ ka ɓay tûl lâʼa baa, zé gel káwa mɛ̌, mɛ̌ ka ɓá gáŋnjuku hí̧ nyîn nɛ́y!

¹⁷I tu ɓá táŋáké, ka falké, a ké zi ɓay a ké ziŋ béla a bâa a mɛ̌y, ké zi ziŋ nyá. Ɓayhí̧lé a ké ɛ́ ka vúna nɔ́ too ɓay a ké niŋ a̧ní rá̧, bâa a mɛ̌ ké ɗí béla kɔ̧ tûlé léy, ŋgboro zi tí hí̧ nɛ́ mbaa.

¹⁸Dáy, i zi gí gbaŋ hɛ̧ ka njuku ma ɗánáké, ɓá báŋa tûl kon a Sinâ̧ny ka gáŋ hɔrɛ a mɛ̌, malé gel yíra, tirí̧ma, gáŋ kúna a há̧na,

¹⁹gara tɛ̧̂w a kú ul rá̧ kɔ́ŋ a njuku yá. Dáy gun Izirayɛ́lri lá kɔŋké a ŋgú wɔ́w a zi ɓay a lánáké mbaa.

²⁰Ɓayhí̧lé, kú zi ma ikilaw sé tûl ɓayké yá: «Njuku ka e ɗa kon, zi lé ɓá sâ̧ny, kú e vbú nɛ́ ka saw, ka í nɛ́.»

²¹Hɛ̧ ka niŋ, ná ɓá hɛ̧ wɔ́w mambá, dáy Mɔyíze ka mûn nɛ́ sa: «Wɔ́w ŋgbá mí, mûn ní tɔ́ mí mambá.»

²²Dáy a wǎyri, í ta̧m gí gbaŋ kon a Siyɔŋ, rá̧ gbaŋ Pû a Gáŋvbôn a ndísɛ̌ʼɛ, Zerúzalɛ̂m a nûnalê, ka aŋnzeri a mɛ̌ri̧ ɓá ŋgɛ̧́náké

²³a kaw záyay, a ɓil mára̧ a mbɔŋɔ gun a Gáŋvbônri̧, ka rɛŋ a kuriri ɗé e a nûnalê. Í ta̧m gí gbaŋ a Gáŋvbôn ka kaw ɓá njuku walɓay a njukuri too, rá̧ gbaŋa têm a njuku a ndárákéri, ka Gáŋvbôn ɓá kuriri tɛ̧ béla njukuri.

²⁴Í ta̧m gí gbaŋ a Zezú, a fere sêm mûn nɛ́, ɓay turu nárí̧. Ké kaw ɓá njuku ka kaw bazeŋ manárí̧ rá̧ Gáŋvbôn a ɓil ŋgá̧nzáʼa a fékéké, kuu manárí̧, dáy sêm mûn nɛ́ ka féréy saɓay ndé ɓala Abɛl ɓáy.

²⁵Í kó rá, ɓay a í zi ná sáŋ láɓay a njuku ka saɓay hí̧ wǎyri. Ɓayhí̧lé, njukuri ka sáŋ lá nzáʼa a njuku ka saɓay hí̧ kuriri ka tísiri nɛ́y, zi tɛ̧ ɓil hɛ́rɛ a Gáŋvbôn nyá. Rá̧ ma manárí̧, pé e tɛ̧́ ɓilké lé, ka manárí̧ mí fere ka̧ny hí̧ njuku ka saɓay hí̧ nárí̧ a sâa ka nûnalêy.

²⁶Njuku ka í̧ŋásá̧, kɔ́ŋɛ́ laŋ tísiri, saɓay hí̧ nárí̧ ka sénɛ́ ɓá: «Mi e laŋ tísiri ɓáy bɔʼɔ mbêw, dáy tí ɓá tísiri mbɛ́ŋ nyá, nûnalê kɔ́.»

²⁷Ɓay ka sa ɓá: «Bɔʼɔ mbêw ɓáy.» Tɔ́ʼɔ ɓá hɛ̧ri̧ ka Gáŋvbôn mɔny e láŋa too, ka ɓɔ́la too, dáy hɛ̧ri̧ ka e kaw dát, ɓá hɛ̧ri̧ ka tí láŋa nyáy.

²⁸Nǎŋnɔ́, ná zi awá hí̧ Gáŋvbôn, ɓayhí̧lé, ná e ziŋ Pû Mbây ka tí láŋa nyáy, dáy ná tɔ́ʼɔ zi awá a manárí̧ hí̧ nɛ́, ka ŋgboro a niŋ péna ka e hí̧ nɛ́ sáʼa rá̧ a ɓil hɛʼɛ hɛ̧ rá̧ ɓil ŋgú wɔ́w a mɛ̌.

²⁹Ɓayhí̧lé Gáŋvbôn a manárí̧, kaw ɓá báŋa hɔrɛ ka rɛ́ŋ hɛ̧y.