Read Capanahua Hebiréri 13 Bible Online

Hebiréri 13 - Capanahua bible

Hebiréri 13

¹Í tɔ́ʼɔ zína a bazeŋ a wǎyri dát ɓá báŋa nyînrí̧.

²Í zi ná pɔŋ nyá gɔ́rɔ́ri. Ɓayhí̧lé njuku a há̧narí̧, a gé nyá gɔ́rɔ́, pé kú nyá aŋnzeri táŋ túnáké.

³Í kɛrɛ njukuri, ka e a ɓil vûn sɛl, ɓá báŋa wǎyri kɔ́ i e a ɓil vûn sɛl kuu kuriri. Í kɛrɛ njukuri, ka e a ɓil tɔ́ʼɔsêe, ɓayhí̧lé, wǎyri kɔ́, i e ka hay mûn ɓá báŋa kuriri.

⁴Njukuri too, kú hɛʼɛ káwa wûny kuu wɔ̧rɔ̧́. Wɔ̧rɔ̧́ kuu wûny, kú kaw law mbêw a ɓil ŋgbá mûn a kuriri. Ɓayhí̧lé Gáŋvbôn e walɓay kɔ̧ tûl njuku niŋ dalari rá̧ wɔ̧rɔ̧́njuku malé wûnynjuku ka mbí dalay.

⁵Tapátké, í zi ná ɓá law a wǎyri ka̧n tûl lari, í kaw ka sáʼa sé tûl hɛ̧ ka í erúy. Ɓayhí̧lé Gáŋvbôn ka mûn nɛ́ sa ɓá: «Mi tí pɔŋ mɔ́ nyá, a tí sáŋ mɔ́ nyá.»

⁶Ɓaykénɔ́ pé, ná e ka ŋgboro sa ka law mbêw ɓá: «Gáŋmbây, ɓá njuku hí̧ndɔ̂ʼɔ hí̧ mí. Mi zi tí ka wɔ́w a hɛ̧ há̧na nyá. A̧hí̧ njuku ma niŋ ziŋ mí lé?»

⁷Í kɛrɛ njukuri ka, tɔ́ʼɔ ŋgboro hí̧ wǎyri, ka a saɓay a Gáŋvbôn hí̧ wǎyri. A í kó a̧ní, káwa a kuriri sé ka̧ kɔ́rɔ́ké, a í mbɛl láɓulaw a kuriri.

⁸Zezú Kiris kaw ɓá mbêwké, lewra, sénɛ́ rá̧ sêe too.

⁹Í zi ná pɔŋ mûn a wǎyri, a njukuri kú rɔ́ʼɔ wǎyri, ka ŋgboro tɔ́ʼɔhɛ̧ ɓórí ɓórí ka gí a kálay. Ɓayhí̧lé, belɓá béla a Gáŋvbôn ké hí̧ nárí̧ ŋgɛ́rɛ, a zi tí ɓá sáŋna ka saɓay sé tûl hɛ̧lâʼa yá. Mára̧ njukuri ka tɔ́ŋ sáŋna a nɔ́y, zi ziŋ nɛ́rɛ̧́ké bɔʼɔ mbêw yá.

¹⁰Ná erú ka nzáʼaká̧na, ka njuku nzáʼaká̧nari̧ ka niŋ péna a ɓil Tabɛrnákɛlɛ ma ziŋ sɔ̧́lâʼa karú yáy.

¹¹Gáŋnjuku nzáʼaká̧na ka gí ka sêm a sâ̧nyri̧, gí niŋ hɛ̧púna ka nzáʼaká̧na ɓay tûl ɓékéhɛ̧ri̧, kú njúŋ hay a sâ̧nykéri a falgel.

¹²Ɓaykénɔ́ pé Zezú kɔ́, ɓay a turu ɓékéhɛ̧ a njukuri ka sêm mûn nɛ́, ziŋ hûl a fal pû.

¹³Nǎŋnɔ́, ná tɛ̧ sé ziŋ nɛ́ a fal pû, a ɓil zibɔʼɔ yáwhɛ̧, ɓá báŋa mɛ̌ kɔ́.

¹⁴Ɓayhí̧lé, ná zi tí ka pû a tísiri nɛ́ ka ná dát yá, dáy ná kaw ɛ́ pû ka e gínay.

¹⁵Ka ŋgboro a Zezú, ná niŋ hí̧ Gáŋvbôn dát hɛ̧púna ɗéla, zi ɓay a sa ɓá, hɛ̧hí̧na ka tɛ̧ a nzáʼa manárí̧ ka a hí̧ hɔ̧́na hí̧ rɛŋɛ́y.

¹⁶Nǎŋnɔ́, ná zi ná yɛʼɛrɛ niŋ béla, rá̧ hí̧ndɔ̂ʼɔ hí̧ há̧narí̧, ɓayhí̧lé ná ɓá hɛ̧púna a béláké, ka hí̧ sáʼa hí̧ Gáŋvbôn.

¹⁷Í lá nzáʼa a njukuri ka tɔ́ʼɔ wǎyri ŋgboro, a í pɔtûl hí̧ kuriri, ɓayhí̧lé, kú kaw koro wǎyri, a í tu ɓá, kú e rerú ka fal péna a kuriri hí̧ Gáŋvbôn. Belɓá í niŋ rá̧lǒo, kú niŋ péna a kuriri ka law sáʼa, táŋ vúmûn, tí nǎŋ nyá lé, zi ná ɓá hɛ̧ a béláké hí̧ wǎyri yá.

¹⁸Í gɔ́ŋ Gáŋvbôn hí̧ rú. Nǎŋnɔ́, rú tu ɓá táŋáké, ɓá kɛrɛ a ɓurú ná ɓá béláké, ɓayhí̧lé rú zi ɓá, bɔʼɔséna a ɓurú ké ná dát ɓá béláké.

¹⁹Mi vú hí̧ wǎyri, í gɔ́ŋ Gáŋvbôn hí̧ mí, ɓay mí ziŋ regé law sélé a wǎyri ɓá gánáké.

²⁰Gáŋvbôn a vónáké, ka toma Gáŋmbây a manárí̧ Zezú, gáŋnjuku koro hɛ̧hɔ́la a ɓil a hûlri, ka ŋgboro a sêm ngá̧nzáʼa ka ná dát,

²¹ké hí̧ wǎyri ŋgɛ́rɛ niŋ hɛ̧ a béláké too, ɓay a í niŋ hɛ̧ a ké ziy. A ké niŋ hí̧ nárí̧, hɛ̧ a ké ziy ka ŋgboro a Zezú Kiris! Mɛ̌, ka hɔ̧́na ké hí̧ nɛ́ dát! Amɛn!

²²Nyîn nírí̧, mi kaw sa hí̧ wǎyri, í lá nzáʼa nzɛ́rɛ nɛ́ ka mi hí̧ wǎyri ka law mbêw. Ɓayhí̧lé, hɛ̧ ka mi ɗé hí̧ wǎyri zi pé yá.

²³Mi zi ɓá í tu, ɓá Timoté nyîn a manárí̧ tɛ̧ ka vûn sɛl dá. Ké mí ka̧ ɓá gánákéy, mi e gé kuu mɛ̌, ɓay a gé kó wǎyri.

²⁴Í nam gáŋnjuku mára̧ a wǎyri, rá̧ njuku láɓulawri too. Njuku a Italíri nam wǎyri.

²⁵Béla a Gáŋvbôn, ké kaw kuu wǎyri too!