Read Capanahua Hebiréri 3 Bible Online

Hebiréri 3 - Capanahua bible

Hebiréri 3

¹Nyîn nírí̧, wǎy njuku a Gáŋvbônri̧, ka ziŋ ɗína a mɛ̌, í ɓá ɛ̧rɛ̧ gel a wǎyri ka̧n tûl a Zezú, njuku ka Gáŋvbôn péy, ka kaw ɓá gáŋnjuku nzáʼaká̧na a láɓulaw, ka rú tɔ́ʼɔɓay a mɛ̌y.

²Ɓayhí̧lé, Zezú kaw law mbêw kuu Gáŋvbôn ka ten nɛ́, ka a ɓá nɛ́ ɓá gáŋnjuku nzáʼaká̧na, ɓá báŋa Mɔyíze, ka ziŋ kaw law mbêw a ɓil vûn a Gáŋvbôn.

³Dáy, Zezú ziŋ hɔ̧́na ndé Mɔyíze, ɓayhí̧lé njuku ka zá vûn, e ka nɛ́rɛ̧ ndé vûnké nɔ́.

⁴Vûn mbêw mbêw too erú ka njuku ka záy, dáy njuku ka mɔny hɛ̧ri̧ tooy, ɓá Gáŋvbôn.

⁵Mɔyíze, niŋ law mbêw a ɓil vûn a Gáŋvbôn too, dáy ké kaw ɓá njukupéna, a kaw ɓá njuku ka tí saɓay a hɛ̧ri̧ ka Gáŋvbôn e sanáké.

⁶Dáy Kiris, ké kaw law mbêw ɓá báŋa gun ɓil vûn a Gáŋvbôn. Vûnké ɓá manárí̧, ka manárí̧ mí ew ɓá kpúnáké a ɓil mbílaw a manárí̧ rá̧ kɛrɛ ka ná ziŋ mûnrína a manárí̧ sé tûlkéy.

⁷Ɓaykénɔ́, pé Têm Pukí sa ɓá: «Sénɛ́, wǎyri mí lá kɔ́ŋ a Gáŋvbôn lé,

⁸í kpúlaw a wǎyri yá, ɓá báŋké ka zîi a wǎyri kpútûl ziŋ nɛ́ í̧ŋásá̧, a sêe a kú lélawɛ́ a ɓil kaw.»

⁹Gáŋvbôn kɔ́ sa: «Zîi a wǎyri ɛ́ ɓay ziŋ mí ka lélaw ní a ɓil káwaké, a fal kó hɛ̧ too ka mi niŋ,

¹⁰a ɓil mbimbɔ̂m bonɛŋ. Ɓaykénɔ́, pé mi ɗí hɛ́rɛ ziŋ kuriri, dáy a sa: “Law a kuriri ɓá kuriri sé ɓá ŋgboro ɓɔ́l dát. Kú zi tu ŋgboro a mǐ nyá.”

¹¹Nǎŋnɔ́, a ɓil hɛ́rɛ a mǐ, mi háhɛ̧ ɓá: Kú ma ri gel ɔʼɔ ka mi mɔny bɔʼɔ mbêw yá!»

¹²Nyîn nírí̧, i koro káwa a wǎyri ɓá béláké, ɓay a njuku a há̧na a bazeŋ a wǎyri, ké zi ná erú ka ɓéké law, ka e ɓá nɛ́ fere ka̧ny hí̧ Gáŋvbôn a ndísɛ̌ʼɛ.

¹³Dáy, í nzɛ́rɛ há̧narí̧ sêe too, ka ná sa ɓá: «Sénɛ́», rá̧lǒo, njuku a há̧na a bazeŋ a wǎyri, ké ná kpúlawɛ́ ka ŋgboro a hɛ̧rɔ́ʼɔ a ɓékéhɛ̧.

¹⁴Katína lé, ná kaw ɓá mbáŋa péna a Kiris, dáy belɓá, ná koro mbílaw a manárí̧ ɓá kpúnáké ka̧ kɔ́rɔ́ké, ɓá báŋa títáʼaké.

¹⁵Nǎŋnɔ́ Mbété a Gáŋvbôn sa: «Sénɛ́, wǎyri mí lá kɔ́ŋ a Gáŋvbôn lé, i kpúlaw a wǎyri yá, ɓá báŋké ka zîi a wǎyri kpútûl ziŋ nɛ́ í̧ŋásá̧, a sêe a kú lélawɛ́ a ɓil kaw.»

¹⁶A gé lá kɔ́ŋ a Gáŋvbôn rá̧ a kpútûl ziŋ nɛ́ lé? Tí ɓá njukuri too ka Mɔyíze ten kuriri ka tísiri a Ezípte yá lé?

¹⁷Kuu gé rá̧ Gáŋvbôn ɗí hɛ́rɛ mbimbɔ̂m bonɛŋ lé? Tí ɓá, kuu njukuri ka niŋ ɓékéhɛ̧ ziŋ Gáŋvbôn, ka a ziŋ hûl a ɓil kaw ɓá ŋgɛ̧́náké yá lé?

¹⁸Ɓay tûl a gé rá, Gáŋvbôn háhɛ̧ ɓá kú tí ri gel ɔʼɔ a ké mɔny nyá lé? Tí ɓá, ɓay tûl a njukuri ka kpútûl ziŋ nɛ́ nyá lé?

¹⁹Ná kó ɓá táŋáké lé, kú zi ziŋ ri gel ɔʼɔké ráy yá, ɓay tûl kpúlaw a kuriri.