Read Capanahua Hebiréri 6 Bible Online

Hebiréri 6 - Capanahua bible

Hebiréri 6

¹Ɓaykénɔ́, ná pɔŋ titíla gun hɛ̧ri̧ a kú tɔ́ʼɔ nárí̧ sé tûl a Kiris kɔ̧ fal, a ná hɔ̧́ a ɓil ɓay a mɛ̌ sé mbɛl. Nǎŋnɔ́, táŋ ɗá hɛ̧tɔ́ʼɔ ka erú ka nɛ́rɛ̧ ka saɓay sé tûl pɔŋ ɓékéhɛ̧ri̧ ka ɓá njuku sé hûl, ɓay a láɓulaw hí̧ Gáŋvbôn,

²ɓay a batêmri̧, ɓay a ɓá ndɔ̂ʼɔ kɔ̧ tûl, ɓay a toma a hûl rá̧ walɓay a sêe kɔ́rɔ́ké.

³Ɓá péna ka rú e niŋáké, ka Gáŋvbôn mí zibɔʼɔké.

⁴Ɓayhí̧lé, njukuri ka ziŋ geltáŋa a Gáŋvbôn bɔʼɔ mbêw, ka a lé hɛ̧hí̧na a nûnalê, ka tu kpɔ́ŋa a Têm Pukí,

⁵ka a lé Bélaɓay a Gáŋvbôn, rá̧ kpɔ́ŋa hɛ̧ri̧ ka e gína,

⁶ka a relé ɓil ɓékéhɛ̧ ɓáy, ŋgboro zi tí hí̧ kuriri, ɓá kú refére law a kuriri ɓá féké ɓáy mbaa. Ɓayhí̧lé, kú reɓara gun a Gáŋvbôn ka̧n tûl dii vbatay ɓá féké, ka ŋgboro a bɔʼɔséna a kuriri, kú niŋ rá̧ njukuri fára nɛ́.

⁷Gelka siri nzó mbii mbɔ̂m ɓá ŋgɛ̧́náké, ka a niŋ hɛ̧pay lé ɓá béláké hí̧ njuku wâʼari, Gáŋvbôn ɗí béla ka̧n tûlké.

⁸Dáy, mí ɓá dii ŋgátúru pé tɛ̧́ ka siriké rá̧ goy diiri ka ná ɓá njâw, tɔ́ʼɔ ɓá siriké zi tí ka nɛ́rɛ̧ nyá, zi ɓá, hɛ̧hána a Gáŋvbôn, falké lé, ɓá rɛ́ŋ nɛ́ a hɔrɛ.

⁹Dáy a wǎyri mbáŋa a mǐri̧, a ɓil ɓay nɔ́rí̧ too ka rú sáy, rú tu ɓá, i e ka tûl ŋgboro a béláké, ka ɓá ŋgboro ziŋ pɛ̧́nay.

¹⁰Katína, Gáŋvbôn ɓá njuku a ndáráké, ké ma yɛʼɛrɛ péna ka i niŋ malé zína ka i tɔ́ʼɔ hí̧ njuku láɓulawri ɓay tûlé, a kaw niŋáké ɓáy, ka̧ sénɛ́y, nyá.

¹¹Hɛ̧ ka rú zi ɓá njuku mbêw mbêw a bazeŋ a wǎyri ké niŋ, ɓá ew ɓá kpúnáké a ɓil pénáké ɓá báŋa títáʼaké ka̧ kɔ́rɔ́ké. Nǎŋnɔ́, hɛ̧ ka i kɛrɛ too, i e ziŋáké.

¹²Dáy í vomûn a wǎyri yá, i mbɛl bɔʼɔséna a njukuri, ka láɓulaw, a ew ɓá kpúnáké, ka a ziŋ kpáʼandɔ̂ʼɔ ka Gáŋvbôn hí̧nzáʼa ɓayké.

¹³Gelka Gáŋvbôn hí̧nzáʼa hí̧ Abaraham, ké háhɛ̧ ka rɛŋɛ́, ɓayhí̧lé njuku ka ndé nɛ́ ka hɔ̧́na ɓáy tí mbaa,

¹⁴dáy a sa: «Katína, mi e ɗí ɓay a béláké ka̧n tûló, ka hí̧ mɔ́ gunri̧ ɓá ŋgɛ̧́náké.»

¹⁵Nǎŋnɔ́ Abaraham ikilawɛ́, a zoko, dáy a ziŋ hɛ̧ ka Gáŋvbôn hí̧nzáʼa ɓayké.

¹⁶Dáy njukuri kaw háhɛ̧ lé, kú háhɛ̧ ka rɛŋ a njuku ka ndé kuriri ka hɔ̧́nay, nǎŋnɔ́ hɛ̧ hánáké, tɔ́ʼɔ kɔ́rɔ́ manyɓay.

¹⁷Gáŋvbôn zi ɓay tɔ́ʼɔ ɓá táŋáké hí̧ njukuri ka e ziŋ béla hɛ̧ a ké sáy, ɓá hí̧nzáʼa a mɛ̌, zi fere bɔʼɔ mbêw yá, ɓaykénɔ́ pé ké hí̧nzáʼa pé a háhɛ̧.

¹⁸Nǎŋnɔ́ hɛ̧ri̧ sére erú ka Gáŋvbôn tí refal yá, ka ŋgboro zi tí ɓá ké kúŋɓay yáy, manárí̧ ka ziŋ gel ɔʼɔ mbêw a gé lé, ɓá ná koro ɓá béláké mbílaw ka Gáŋvbôn hí̧nzáʼa hí̧ nárí̧.

¹⁹Mbílawké nɔ́, ka ná erúy, ɓá báŋa hɛ̧ ka ŋgbá ndísɛ̌ʼɛ a manárí̧ ɓá kpúnáké rá̧ gbátké. Ké tá ɓil gáŋ gári ka wal ɓil vûn a Gáŋvbôn sé ka̧ gel ka táŋ mambáy.

²⁰A goló, pé Zezú tí ri ɗambɛl, ɓay a manárí̧, ɓayhí̧lé ké tɛ̧ gáŋnjuku nzáʼaká̧na dát ɓá báŋa Mɛlkisédɛ́k.