Read Capanahua Hebiréri 7 Bible Online

Hebiréri 7 - Capanahua bible

Hebiréri 7

¹Mɛlkisédɛ́k nɔ́, ɓá mbây a Salɛ́m, rá̧ njuku nzáʼaká̧na a Gáŋvbôn a nûnalê. Gelka Abaraham ndé mbâyri ka bére, ka a regíy, Mɛlkisédɛ́k uru a sé ziŋ nɛ́, a ɗí ɓay a béla kɔ̧ tûlé.

²Nǎŋnɔ́, hɛ̧zíŋári̧ too ka Abaraham, gé fá̧ a gel bére rerúy, ké gí lú tûl hɛ̧ bôo too, mbêw mbêw hí̧ Mɛlkisédɛ́k. Rɛŋ a Mɛlkisédɛ́k, zi ɓay sa ɓá: «Mbây a hɛ̧ ndárákéri» Ké kaw ɓá mbây a Salɛ́m, ka zi ɓay sa ɓá: «Mbây a vónáké.»

³Mɛlkisédɛ́k, zi tí ka bâa rá̧ mâa nyá, malé zîiri yá. Kú zi saɓay mbuŋa rá̧ hûl a mɛ̌ nyá. Ké kaw ɓá báŋa gun a Gáŋvbôn, ké kaw ɓá njuku nzáʼaká̧na dát.

⁴I kó nɛ́rɛ̧ a njuku nɛ́, ka Abaraham zîi a manárí̧ kɔ́, lú tûl hɛ̧zíŋa too, mbêw mbêw ka tûl hɛ̧ bôo too, a ké rerú a gel bére hí̧ nɛ́!

⁵Gun a Lévíri kaw ɓá njuku nzáʼaká̧na, dáy ka ŋgboro sáŋna, kú erú ka ŋgboro vbí ɓá kú lú hɛ̧ mbêw mbêw ka tûl hɛ̧ bôo too a ɓil hɛ̧zíŋa a gun Izirayɛ́lri, zi ɓay sa ɓá, nyîn a kuriri, ka ɓá gun zîi a Abarahamri̧ kɔ́y.

⁶Nǎŋnɔ́ Mɛlkisédɛ́k, zi tí a ɓil î̧n a Lévíri yá, ké nyá tûl hɛ̧ mbêw mbêw ka tûl hɛ̧ bôo too ka Abaraham hí̧ nɛ́, dáy Mɛlkisédɛ́k ɗí béla ka̧n tûl a njuku ka ziŋ hɛ̧ hí̧nzáʼa a Gáŋvbôn.

⁷Manyɓay zi tí yá, ɓayhí̧lé njuku ka ɗí bélay, ɓá gáŋnjuku hí̧ njuku a ké ɗí béla ka̧n tûléy.

⁸A gelé, ɓá njukuri ka e ziŋ hûl, pé kaw nyá tûl hɛ̧ mbêw mbêw too ka ndɔ̂ʼɔ a njukuri. A Mɛlkisédɛ́k lé, ɓá njuku ka Mbété a Gáŋvbôn sa ɓá, ké erú ka ndísɛ̌ʼɛ dát.

⁹Tɔ́ʼɔ ɓá, Leví ka mûn nɛ́ kɔ́, lú tûl hɛ̧ mbêw mbêw ka tûl hɛ̧ bôo too, hí̧ Mɛlkisédɛ́k ka ŋgboro a Abaraham, mɛ̌ ka gun a mɛ̌ri̧ nyá tûl hɛ̧ mbêw mbêw ka tûl hɛ̧ bôo too, a gél a njukuri.

¹⁰Ɓayhí̧lé, Leví a kú pa̧n mbuŋ nɛ́ nyá ɓáy, tí e a ɓil sêm mûn a Abaraham dá, ka ɓá zîi a mɛ̌, ka sêe a ké ziŋ há̧na kuu Mɛlkisédɛ́k.

¹¹Ɓá sáŋna a Mɔyíze pé hí̧ ŋgboro hí̧ î̧n a Lévíri, ɓá kú kaw ɓá njuku nzáʼaká̧nari̧. Dáy njuku nzáʼaká̧na a î̧n a Lévíri, mí niŋ péna a kuriri rá̧ njukuri mí kaw ɓá béláké, nɛ́rɛ̧ ten njuku nzáʼaká̧na a féké, ɓá báŋa Mɛlkisédɛ́k ka tí ɓá báŋa Arɔŋ nyáy zi tí yá?

¹²Nǎŋnɔ́, a kú fere báŋ ten njuku nzáʼaká̧na dáy, tɔ́ʼɔ ɓá kú fere sáŋna kɔ́.

¹³Ɓay nɛ́ too, sa sé tûl a Gáŋmbây a manárí̧. Mɛ̌, ka tɛ̧́ a ɓil sɛl î̧n a féké, ka njuku mbêw a ɓil î̧n ké nɔ́, zi niŋ péna nzáʼaká̧na bɔʼɔ mbêw yá.

¹⁴Njukuri too tu ɓá Gáŋmbây a manárí̧, kú mbuŋ nɛ́, a ɓil sɛl î̧n a Juda, njukuri ka Mɔyíze, zi laŋ ɓay a kuriri a ɓil a njuku niŋ péna nzáʼaká̧na bɔʼɔ mbêw yáy.

¹⁵Í kó hɛ̧ ka tɔ́ʼɔ hɛ̧ké ɓá táŋáké ɓáy ɓá: Njuku nzáʼaká̧na a féké tɛ̧́ gí, a kaw ɓá báŋa Mɛlkisédɛ́k.

¹⁶Ké zi kaw ɓá njuku nzáʼaká̧na, ka ŋgboro a sáŋna ka hí̧ ŋgboro hí̧ î̧n a Lévíri yá, dáy mɛ̌, ké kaw ɓá njuku nzáʼaká̧na, ka ŋgboro a kpɔ́ŋa a ndísɛ̌ʼɛ, ka zi ma ɔ bɔʼɔ mbêw yáy.

¹⁷Katína, Mbété a Gáŋvbôn sa kɔ́ ɓá: «Mɔ e kaw ɓá njuku nzáʼaká̧na dát ɓá báŋa Mɛlkisédɛ́k.»

¹⁸Nǎŋnɔ́ ná kó ɓá sáŋna a titíláké, zi tí ka ŋgɛ́rɛ yá, a nɛ́rɛ̧ nyá, ɓaykénɔ́ pé ná lú nɛ́ gefal.

¹⁹Sáŋna a Mɔyíze katína, zi ɓá njukuri sé káwa a béláké yá. Dáy kɛrɛ ka bel ndéy, ziŋ ŋgburu hí̧ nárí̧, nǎŋnɔ́ ka ŋgboroké nɔ́, pé ná ziŋ ta̧m gí gbaŋa a Gáŋvbôn.

²⁰A tûlké ɓáy, hɛ̧hána a Gáŋvbôn mbêw erú. Njuku a fékéri tɛ̧ njuku nzáʼaká̧nari̧ táŋ hɛ̧hánaké.

²¹Nǎŋnɔ́, Zezú tɛ̧ njuku nzáʼaká̧na, ka ŋgboro a hɛ̧hánaké, ɓayhí̧lé Gáŋvbôn háhɛ̧ hí̧ nɛ́ a sa: «Gáŋmbây háhɛ̧ dá, a tí refal yá: Mɔ kaw ɓá njuku nzáʼaká̧na ka kɔ́rɔ́ké zi tí yáy.»

²²Ɓaykénɔ́, ná ziŋ ŋgá̧nzáʼa a béláké, ka ŋgboro a Zezú.

²³Hɛ̧ a féké ɓáy ɓá: Njukuri ɓá ŋgɛ̧́náké, ziŋ kaw ɓá njuku nzáʼaká̧nari̧, ɓayhí̧lé, hûl de kuriri niŋ pénáké sé mbɛl.

²⁴Dáy a mɛ̌ Zezú, ké erú ka ndísɛ̌ʼɛ dát, njuku a há̧na zi ma nyá gel péna nzáʼaká̧na a mɛ̌ bɔʼɔ mbêw yá.

²⁵Ɓaykénɔ́, njukuri ka gí gbaŋa a Gáŋvbôn, ka ŋgboro a Zezú, ké e pɛ̧́ kuriri a hí̧ kuriri ndísɛ̌ʼɛ dát. Ɓayhí̧lé, ké erú ka ndísɛ̌ʼɛ dát, ɓay gɔ́ŋ Gáŋvbôn ɓay a kuriri.

²⁶Zezú ɓá gáŋnjuku nzáʼaká̧na ka belɓá ná ziŋ. Ké kaw ɓá táŋáké, táŋ hɛ̧ a belyáké, táŋ ɓékéhɛ̧, káwa a mɛ̌ wal kuu ɓéké njukuri, dáy Gáŋvbôn ɓá nɛ́ he sé nûnalê sá̧.

²⁷Zezú, zi kaw ɓá báŋa gáŋnjuku nzáʼaká̧na a fékéri yá. Ké zi tí ka nzala niŋ hɛ̧púna dát ɓay a ɓékéhɛ̧ a mɛ̌ malé ɓay a njukuri yá. Ké mbí mûn nɛ́, a niŋ hɛ̧púna rú̧, bɔʼɔ mbêw yáŋ.

²⁸Gáŋnjuku nzáʼaká̧nari̧ ka sáŋna a Mɔyíze, ten kuriri kaw ɓá njuku ɓékéri. Dáy hɛ̧hána a Gáŋvbôn, a gí a fal sáŋna a Mɔyíze, ɓá gun a mɛ̌ he sé kaw gelkáwa a béláké, a ɓá nɛ́ kaw ɓá gáŋnjuku nzáʼaká̧na dát.