Read Capanahua Hebiréri 9 Bible Online

Hebiréri 9 - Capanahua bible

Hebiréri 9

¹Titíla ŋgá̧nzáʼa a Gáŋvbôn, erú ka sáŋnari̧ sé tûl péna a njuku nzáʼaká̧nari̧ rá̧ vûn a Gáŋvbôn ka tísiri.

²Ɓaykénɔ́, kú zá Tabɛrnákɛlɛ, ka̧n, ka wal ɓilké sére, ɓala titíláké, kú ɗí ɓá gel a táŋáké, hɛ̧ ɓá lámbe sírúy, erú rá̧ tay rá̧ biré a kú niŋ hɛ̧púna rú hí̧ Gáŋvbôn.

³Dáy, a fal gáŋ laa, gel a séreké erú, kú ɗí gelké ɓá: «Gel ka táŋ mambáy.»

⁴A goló, nzáʼaká̧na erú a kú mɔny ka vbí̧rí̧lari, ɓay kú rɛ́ŋ yámbó karú, rá̧ sandúku ŋgá̧nzáʼa a Gáŋvbôn erú kɔ́, kú mɔny vbí̧rí̧lari kurú tooy. Hɛ̧ri̧ ka e a ɓil sandúkuké, ɓá sambé a kú mɔny ka vbí̧rí̧lari, ka mbá ka mân, kâ̧w a Arɔŋ ka lɔŋ goy, rá̧ hakpakri a kú mɔny ka saw, a kú ɗé sáŋna a ŋgá̧nzáʼa a Gáŋvbôn ka̧nrú̧y.

⁵Ka tûl sandúkuké, kú mbó seribɛ́ŋri̧[1] ka tɔ́ʼɔ ɓá Gáŋvbôn erú. Têm pɔ́rɔ a kuriri puru tûl gel a kú fere sêm ɓay a vbá̧buma a ɓékéri rúy. Dáy zi tí ɓá sɛl a sêe, ka ná e saɓay sé tûl hɛ̧ké too yá.

⁶Tabɛrnákɛlɛké, kú mɔny si rá̧ hɛ̧ri̧ too kɔ̧ ɓilké, a goló njuku nzáʼaká̧nari̧ ri gel a titíláké sêe too, ɓay a niŋ nzáʼa péna a kuriri.

⁷Dáy, a gel a séreké, ɓá gáŋnjuku nzáʼaká̧na hɛʼɛ pé ri bɔʼɔ mbêw a ɓil mbimbɔ̂m mbêw. Ké ɓá sêm a hɛ̧sâ̧nyri̧, ɓay a niŋ hɛ̧púna hí̧ Gáŋvbôn, ɓay tûl ɓékéhɛ̧ a mɛ̌ ka tûlé rá̧ ɓay tûl ɓékéhɛ̧ a njukuri.

⁸Têm Pukí, zi ɓay a ké tɔ́ʼɔ ka goló ɓá, ŋgboro sé gel táŋáké pa̧n a ŋgburu yá ɓáy, gelka titíla Tabɛrnákɛlɛ erú ɓáy.

⁹Ɓá gala têm hɛ̧ri̧ a ŋgɛŋnɛ́y. Hɛ̧ké zi ɓay a sa ɓá, hɛ̧hí̧na rá̧ hɛ̧púna a kú niŋ hí̧ Gáŋvbôn, ma fere law a njuku ka niŋ hɛ̧púnaké nɔ́, ɓá béláké a mbɛl a Gáŋvbôn nyá.

¹⁰Ɓá hɛ̧ ɓá báŋa a hɛ̧lâʼa, hɛ̧ nzóna, rá̧ ŋgboro turu mûn ɓórí ɓórí, ɓay a kaw ɓá táŋáké. Ɓá Sáŋna a ŋgboro a njuku baa, ka nɛ́rɛ̧́ké gé ɔ ɓá sêe ka Gáŋvbôn gí mɔny hɛ̧ri̧ tooy.

¹¹Dáy Kiris gí ɓá báŋa a gáŋnjuku nzáʼaká̧na, ɓay a béla ka e gínay. Ké tá ri ɓil Tabɛrnákɛlɛ ka ndé ka nɛ́rɛ̧, ka ndé ka béla, ka zi tí ɓá kú zá ka ndɔ̂ʼɔ a njuku yá, zi ɓay sa ɓá, zi tí ɓá ɓala tísiri nɛ́ a kú mɔny nyá.

¹²Dáy Kiris, gí ri gel a táŋákéké bɔʼɔké mbêw yáŋ, tí ɓá ka sêm a bal hwálári malé gun ndayri yá, dáy ka sêm mûn nɛ́, nǎŋnɔ́, ɓay a zé nárí̧ bɔʼɔké mbêw yáŋ wɔm a ɓil ɓékéhɛ̧ri̧.

¹³Ɓayhí̧lé, sêm a ndayri rá̧ bal hwálári rá̧ súgú a mánday a kú rɛ́ŋ, ka a fere kɔ̧ tûl a njukuri ka niŋ ɓékéhɛ̧, mí turu mûn a kuriri a hí̧ kuriri mûn táŋa a kálay,

¹⁴pé ma sêm mûn a Kiris ka, ka ŋgboro a Têm Pukí, ké hí̧ mûn nɛ́ ɓá hɛ̧púna ka zi tí ka ɓéké yá hí̧ Gáŋvbôn, tí turu law a njukuri a ɓil kɛrɛ a belyáké, a fere káwa a kuriri, ɓay kú niŋ péna hí̧ Gáŋvbôn a ndísɛ̌ʼɛ yá lé?

¹⁵Ɓaykénɔ́, pé Kiris, ɓá njuku ka kaw bazeŋ a njukuri rá̧ Gáŋvbôn a ɓil ŋgá̧nzáʼa a fékékéy, rá̧ njukuri ka Gáŋvbôn ɗí kuriri, kú ziŋ béla a wɔmké ka Gáŋvbôn hí̧nzáʼa hí̧ kuriri. Kú e ziŋáké, ɓayhí̧lé Kiris ziŋ hûl ɓay a ké zé njukuri ka niŋ ɓékéhɛ̧ri̧ a ɓil titíla ŋgá̧nzáʼa a Gáŋvbôn.

¹⁶Ɓayhí̧lé, gelka mbété nyandal erúy, belɓá kú tɔ́ʼɔ ɓá njuku ka niŋ mbétéké nɔ́y, ziŋ hûl dá.

¹⁷Dáy mbété nyandal erú ka nɛ́rɛ̧, ka njuku ka niŋ mbétéké, mí hûl dáy. Dáy ké mí zi hú yá ɓáy, mbété nyandalké zi tí ka nɛ́rɛ̧ nyá.

¹⁸Ɓaykénɔ́, pé titíla ŋgá̧nzáʼa a Gáŋvbôn, tí ŋgburu a sêm.

¹⁹Mɔyíze tí kɛ̧́ sáŋna too ɓá báŋké nɔ́ a kú ɗé ka̧n ɓil mbété a mbɛl a njukuri too. Falké ké mbí sêm a gun ndayri rá̧ sêm mûn a bal hwálári rá̧ mbii, ka mí ka taʼala a kú niŋ ka dii izop rá̧ pɔ̧rɔ̧ mûn a sɛ́ŋɛ́[2], kɔ̧ tûl mbété a sáŋna rá̧ tûl a njukuri too.

²⁰Dáy, a sa: «A nɛ́ ɓá sêm ŋgá̧nzáʼa ka Gáŋvbôn ŋgá̧ kuu wǎyri.»

²¹Falké, ké mí sêmké nɔ́ kɔ̧ tûl Tabɛrnákɛlɛ, rá̧ tûl hóla niŋ pénari̧ too.

²²Nǎŋnɔ́, ɓá báŋké ka sáŋna sáy, hɛ̧ri̧ ka sêm zi turu yáy zi ŋgɛ̧́ nyá. Dáy sêm fere yá lé, vbá̧buma ɓékéhɛ̧ zi tí yá.

²³Dáy, mí ná ɓá kú turu ka ŋgboro a nɔ́ têm hɛ̧ a gbátkéri ka e a nûnalê, belɓá, hɛ̧ a gbátkéri ka e a nûnalêri ku turu kuriri ka ŋgboro a hɛ̧púna ka ndé a nɛ́ ka béla ɓáy.

²⁴Ɓayhí̧lé, Kiris zi ri ɓil Tabɛrnákɛlɛ a kú mɔny ka ndɔ̂ʼɔ a njukuri, ka ɓá têm a gbát Tabɛrnákɛlɛ a nûnalê yá. Dáy, Kiris ri nûnalê sá̧, a sé ew a ŋgɛŋnɛ́ a mbɛl a Gáŋvbôn ɓay tûl a manárí̧.

²⁵Dát zi tí ɓá, ɓay a sé mbí mûn nɛ́ ɓá hɛ̧púna dát hí̧ Gáŋvbôn pé Kiris ríy yá, ɓá báŋa a gáŋnjuku nzáʼaká̧na a Juyífri, ka mbimbɔ̂m dát lé, ké ri ɓil Tabɛrnákɛlɛ ka sêm, ka zi tí ɓá sêm mûn nɛ́ nyáy nyá.

²⁶Mí ɓá nǎŋ lé, ké e tɔ́ʼɔsêe dát, tí a kú mɔny tísiri ka̧ sénɛ́. Dáy, a ɓil nâm a nɛ́, ka ɓá sêe a kɔ́rɔ́ké, Kiris tɛ̧́ bɔʼɔké mbêw yáŋ, ɓay a ké lú ɓékéhɛ̧ri̧ too ka ŋgboro a hí̧ mûn nɛ́ ɓá hɛ̧púna.

²⁷Nǎŋnɔ́, hɛ̧ ka kú mɔny zoko njukuri ɓá kú ziŋ hûl bɔʼɔ mbêw yáŋ, falké lé, ɓá walɓay Gáŋvbôn.

²⁸Ɓá mbêwké pí, Kiris hí̧ mûn nɛ́ bɔʼɔké mbêw yáŋ, ɓay a hol ɓékéhɛ̧ a njukuri ɓá ŋgɛ̧́náké, nǎŋnɔ́, ké e retɛ̧ a bɔʼɔ séreké, tí ɓá ɓay a lú ɓéké mbaa, dáy ɓá ɓay a pɛ̧́ njukuri ka kaw zoko nɛ́.