Read Capanahua Ják 1 Bible Online

Ják 1 - Capanahua bible

Ják 1

¹Mǐ Ják, njukupéna a Gáŋvbôn, rá̧ Gáŋmbây Zezú Kiris, mi nam njuku a Gáŋvbônri̧ too, ka wal ma tísiri.

²Nyîn nírí̧, í kó ɓá hɛ̧ mûnrína mára̧ tɔ́ʼɔsêeri too ka ziŋ wǎyri.

³Ɓayhí̧lé, i tu ɓá, láɓulaw a wǎyri mi ew ɓá ŋgɛ́rɛ́ké a ɓil tɔ́ʼɔsêe, e hí̧ wǎyri ŋgɛ́rɛ ew ɓá kpúnáké.

⁴Dáy belɓá í ŋgbá kpú ka̧ kɔ́rɔ́ké, a goló i kaw ɓá béla njukuri, táŋ ɓékéhɛ̧, nǎŋnɔ́ hɛ̧ mbá wǎyri zi tí ná nyá.

⁵Dáy njuku a há̧na a bazeŋ a wǎyri, mí zi tí ka rɔ̧́na nyá lé, ké vbí Gáŋvbôn, ké e hí̧ nɛ́. Ɓayhí̧lé Gáŋvbôn hí̧ njukuri too ka law a béláké, táŋ vbí nzáʼa.

⁶Dáy, belɓá ké vbí ka ŋgboro a láɓulaw, táŋ manyáké a ɓil lawɛ́. Ɓayhí̧lé njuku ka many, kaw ɛ́ŋ mbɛ̧́nɛ́ kuu gbélém mbii, a kúná fá̧ ka a laŋ gí, laŋ géy.

⁷Mára̧ njuku nǎŋnɔ́, ké zi ná kɛrɛ ɓá ké e ziŋ hɛ̧ a há̧na a gel a Gáŋmbây,

⁸ɓayhí̧lé ké ɓá, njuku niŋ law sére, a zi ɓá lawɛ́ ka̧n tûl hɛ̧ mbêw a ɓil hɛ̧ niŋa a mɛ̌ri̧ nyá.

⁹Njuku ka kaw ɓá fóyay, ké kaw ka mûnrína, gelka Gáŋvbôn gbaŋ nɛ́y,

¹⁰rá̧ njuku ka kaw ɓá njuku hɛ̧zíŋay, ké kaw ka mûnrína, gelka Gáŋvbôn ɗéré nɛ́y. Ɓayhí̧lé, njuku hɛ̧zíŋa zi ɗiɓaŋ nyá ɓá báŋa fúná hoy.

¹¹Katína gelka sêe tɛ̧y, záŋáké gí rɛ́ŋ hoy hɔ́ʼɔ, fúnáké do, rá̧ belkóna a mɛ̌ ɓɔ́l. Ɓá mbêwké kɔ́, njuku hɛ̧zíŋa e ɓɔ́la a ɓil péna a mɛ̌.

¹²Béla hí̧ njuku ka ew kpú a ɓil hɛ̧ lélawri, ɓayhí̧lé a fal lélawkéy, ké e ziŋ mbulí a káwa a ndísɛ̌ʼɛ dát, ka Gáŋvbôn hí̧nzáʼa ɓaykéy hí̧ njukuri a ké ziy.

¹³Hɛ̧ léhɛ̧ mí ziŋ njuku lé, ké zi ná sa ɓá: «Gáŋvbôn, pé lé mí.» Ɓayhí̧lé, kú ma lé Gáŋvbôn ka ŋgboro a ɓékéhɛ̧ nyá, nǎŋnɔ́, Gáŋvbôn ka mûn nɛ́ zi lé njuku yá kɔ́.

¹⁴Katína lé, njuku too lé ɓil lélaw, gelka, ké ɓá kɛrɛ a mɛ̌ ka̧n tûl ɓékéhɛ̧ri̧ a ké ziy.

¹⁵Falké, kɛrɛ a belyáké ka̧ ɓil dalé, ké mbuŋ ɓéké, dáy ɓéké hɔ̧́ dalé, ké mbuŋ hûl.

¹⁶Í rɔ́ʼɔ tûl a wǎyri a ɓil kɛrɛké yá, nyîn nírí̧:

¹⁷Bélahɛ̧ rá̧ hɛ̧hí̧na a béláké too, ɗere gí a nûnalê, kú ɗere gí a gel a Bâa a geltáŋa, ka a gé lé laŋ zi tí yá rá̧ pé fere a têm nyá.

¹⁸Ka ŋgboro a zína a mɛ̌, ké hí̧ nárí̧ káwa a ndísɛ̌ʼɛ dát ka ŋgboro a ɓay a mɛ̌, ka ɓá gbátɓay, rá̧lǒo ná kaw ɓá titíla hɛ̧ a bazeŋ a hɛ̧ri̧ too a ké mɔny.

¹⁹Nǎŋnɔ́ dáy nyîn nírí̧, belɓá njuku too ké gamûn a ɓil láɓay, dáy ké zi tí ná gamûn a ɓil saɓay rá̧ ɗí hɛ́rɛ;

²⁰Ɓayhí̧lé njuku ka ɗí hɛ́rɛy, zi ma niŋ hɛ̧ a ndáráké a mbɛl a Gáŋvbôn nyá.

²¹Ɓaykénɔ́, pé belɓá í pɔŋ gefal hɛ̧ ka yírí káwa a njuku rá̧ hɛ̧ too ka hí̧ káwa ŋgbɔ́rɔ hí̧ njuku. A í nyá ka law a vónáké, ɓay a Gáŋvbôn, a ké rú ka̧n ɓil law a wǎyri, ka erú ka kpɔ́ŋa ɓay a pɛ̧́ wǎyri.

²²Í zi ná kaw ɓá láɓay a Gáŋvbôn mbɛ́ŋ táŋ niŋ péna, ka ɓayké nɔ́ vbí wǎyri ka ŋgboro a rɔ́ʼɔ tûl a wǎyri ka ɓéké kɛrɛ a fékéri.

²³Katína, njuku ka láɓay, ka a zi niŋ pénáké yáy, ɛ́ŋ njuku ka ɛ̧rɛ̧ mûn nɛ́ a ɓil tatáray, ka a kó mûn nɛ́ ɓá báŋké a ké kaw.

²⁴A fal kó mûn nɛ́, ké kála, a ré yɛʼɛrɛ a̧ní ké kaw.

²⁵Dáy, njuku ka mbí lawɛ́ ka̧n tûl sáŋna a béláké, ka hí̧ nárí̧ káwa ka zi tí ɓá káwa koy yá, ka a ŋgbá a law mbêw, ka a zi yɛʼɛrɛ yá, dáy a niŋ pénákéy, mɛ̌ njuku nɔ́, e kaw ka sáʼa a ɓil péna a mɛ̌ too.

²⁶Njuku mí kɛrɛ ɓá ké kaw ɓá gbát gun láɓulaw rá̧ a mí ma ŋgbá ndísɛlɛ́ yá lé, ké rɔ́ʼɔ tûlé ka mûn nɛ́: Láɓulaw a mɛ̌ zi tí ka nɛ́rɛ̧ nyá.

²⁷Láɓulaw a gbátké ka zi tí ka ɓéké a mbɛl a Gáŋvbôn, Bâa a manárí̧ nyáy ɓá: Koro gunsêeri rá̧ wûnysêeri a ɓil tɔ́ʼɔsêe a kuriri, rá̧ koro mûn ɓay tûl ɓéké hɛ̧ a tísiri.