Read Capanahua Ják 3 Bible Online

Ják 3 - Capanahua bible

Ják 3

¹Nyîn nírí̧, í zi ná mbí mûn a wǎyri too, ɓá njuku tɔ́ʼɔhɛ̧ri̧, ɓayhí̧lé i tu ɓá, ɓurú njuku tɔ́ʼɔhɛ̧ri̧, kú e walɓay ŋgɛ́rɛ mambá kɔ̧ tûl a ɓurú.

²Ná niŋ hɛ̧ a manyákéri too ka ŋgboro ɓórí ɓórí. Njuku mí zi niŋ hɛ̧ manyá a ɓil saɓay a mɛ̌ nyáy, ké kaw ɓá béla njuku, ké ma ɓay a ŋgbá mûn nɛ́ too ɓá béláké.

³Ná ɓá wɛ̧̂ɛ ka̧n nzáʼa a dôn, ɓay a ké niŋ hɛ̧ ka ná ziy, nǎŋnɔ́, ná tɔ́ʼɔ ŋgboro hí̧ mûn nɛ́ too.

⁴Malé í kó batô, ka hɔ̧́ nɔ́ too, ka gáŋ kúna sɔʼɔrɔ nɛ́y, ɓá ka gun a̧má̧ tɛ̧́w yáŋ, pé kú here rúy, nǎŋnɔ́ ké sé gel too ka njuku héraké ziy.

⁵Ɓá mbêwké kɔ́, ndísɛl ɓá gun hɛ̧ tɛ̧́w yáŋ a ɓil mûn, dáy ké niŋ wélé a hɛ̧ ka hɔ̧́ ndé nɛ́. Í kɛrɛ gun hɔrɛ tɛ̧́w yáŋ, ma rɛ́ŋ ɓil kɔr too.

⁶Nǎŋnɔ́ kɔ́, ndísɛl ɛ́ŋ hɔrɛ. Ɓá gel káwa a ɓékéhɛ̧ri̧ too, pé e a ɓil mûn a manárí̧, pé a yírí mûn a manárí̧ too. Ké ɓá hɔrɛ ka̧n ɓil káwa a manárí̧ too, hɔrɛ ka gí a ɓil pɔ̂ny hɔrɛ.

⁷Njuku ma ɓay a kaw tûl a sâ̧nyri̧ too, ndoyri, nzwîyri, sôyri, katína njuku kaw tûl a kuriri.

⁸Dáy njuku ka ma kaw tûl ndísɛl, zi tí yá: Ké ɓá hɛ̧ belyáké ka njuku ma kaw tûlé yáy, ké mbá ka pom ka í hûl.

⁹Ná mbí ndísɛl, a ɗél Gáŋmbây, Bâa manárí̧ rú̧, ka reɗí ɓéké rú̧ kɔ̧ tûl a njukuri ka Gáŋvbôn mɔny kuriri ɛ́ŋ nɛ́y.

¹⁰Ɓay ɗélari rá̧ ɓéké ɓayri too kaw tɛ̧́ ka nzáʼa mbêwké nɔ́. Nyîn nírí̧, ké zi ná, ná nǎŋnɔ́ hí̧ wǎyri!

¹¹Pɔ̂ny mbii a mbêwké, zi ma ten mbii a rínáké rá̧ mbii a zuŋáké kɔ́ yá.

¹²Nyîn nírí̧, kú tí ɗɔrɔ ka tûl dii njɔ̧̂ny, léna dii olive yá, malé kú tí ɗɔrɔ léna njɔ̧̂ny ka tûl dii ví̧nyɛ nyá, ɓá mbêwké kɔ́, lɔ̂ʼɔmbii a mbêwké, kú tí ziŋ mbii ka ná ɓá tôm rá̧ mbii a rínáké kɔ́ yá.

¹³Njuku a sí̧ a bazeŋ a wǎyri, kɛrɛ ɓá ké erú ka rɔ̧́na rá̧ hɛ̧túnay lé? Ké tɔ́ʼɔ ka bɔʼɔséna a béláké, ka ŋgboro a péna pɔtûl rá̧ rɔ̧́na.

¹⁴Dáy law a wǎyri, mí mbá ka sɛ́rɛ a belyáké rá̧ lekpere lé, í pɔŋ niŋ wélé ɓá í kaw ɓá njuku rɔ̧́náké, í de gbátɓay ka kúŋɓay yá.

¹⁵Mára̧ rɔ̧́na nǎŋnɔ́, zi gí a nûnalê yá, ɓá rɔ̧́na a tísiri, mbá ka péna a hay mûn, ka ɓá péna a Zábolo.

¹⁶Ɓayhí̧lé, gel ka sɛ́rɛ erú rá̧ péna lekpere erúy, ɓá gel káwa niŋ hɛ̧ táŋ ŋgboroké rá̧ mára̧ hɛ̧ belyákéri too erúy.

¹⁷Dáy, rɔ̧́na ka gí a nûnalê ná ɓá táŋáké rá ɓáy, a falké, ké mbá ka káwa a vónáké, vóna law rá̧ kɛrɛ a béláké. Ké mbá ka béla rá̧ béla pénari̧, ké zi wal káwa yá, a zi tí ka káwa law sére yá.

¹⁸Njukuri ka mɔny a vónáké ka gelkáwa kuriri, rú hɛ̧ a gel a vónáké, hɛ̧pay a kuriri, a kú ziŋ, ɓá káwa a ndáráké.