Read Capanahua Ják 4 Bible Online

Ják 4 - Capanahua bible

Ják 4

¹Táhá̧na rá̧ rúbére a bazeŋ a wǎyri gí ka ŋgboro a sí̧ lé? Zi tí ɓá kɛrɛ a belyáké ka e ka law a wǎyri ka rú há̧narí̧ a ɓil mûn a wǎyri yá lé?

²I zi ɓay a ziŋ hɛ̧ há̧na, dáy a zi ziŋ nyá, nǎŋnɔ́ i kaw ɗɛ́ŋ ɓay a í hûl, i zi hɛ̧, dáy a ma ziŋáké yá, a goló, i ri táhá̧narí̧, a niŋ béreri. I zi ziŋ hɛ̧ ka i zi yá, ɓayhí̧lé i zi vbí Gáŋvbôn ka ŋgboroké yá.

³Rá̧ wǎyri mí vbí rá̧ a mí zi ziŋ nyá lé, tɔ́ʼɔ ɓá kɛrɛ a wǎyri zi sé ɓá béláké yá, i vbí ɓay a í niŋ hɛ̧ri̧ ka law a wǎyri ziy.

⁴Wǎy njuku niŋ dalari! I zi tu ɓá, njuku ka zi hɛ̧ a tísiri mambáy, kaw ɓá njuku ŋgá̧na a Gáŋvbôn nyá lé? Njuku too ka zi ɓay a kaw ɓá mbáŋa a hɛ̧ a tísiri, tɛ̧ njuku ŋgá̧na a Gáŋvbôn.

⁵I kɛrɛ ɓá ɓǎŋ pé kú ɗé ɓá: «Gáŋvbôn zi mambá Têm a mɛ̌ a ké ɓá ka̧n mûn a manárí̧.»

⁶Dáy, béla ka Gáŋvbôn niŋ hí̧ nárí̧ ndé ka hɔ̧́na, ɓayhí̧lé kú sa kɔ́ ɓá: «Gáŋvbôn kpúlawɛ́ ziŋ njuku hɔ̧́tûlri, a niŋ béla ziŋ njukuri ka pɔtûl hí̧ nɛ́.»

⁷Nǎŋnɔ́ í pɔtûl a wǎyri hí̧ Gáŋvbôn, a í kpútûl a wǎyri ziŋ Zábolo, lé ké e ŋgú ɓá ɗínáké ka gbaŋa a wǎyri.

⁸Í ta̧m gí gbaŋa a Gáŋvbôn, ké e ta̧m gí gbaŋa a wǎyri. Í turu ndɔ̂ʼɔ a wǎyri, ɓéké njukuri, í turu law a wǎyri, wǎy njuku law séreri!

⁹Í tu káwa sêe a wǎyri, a í vú, a órómûn a wǎyri, sáʼa a wǎyri ké fere tɛ̧ vúna, a lawrína a wǎyri, ké fere tɛ̧ lawyíra.

¹⁰Í pɔtûl a wǎyri a mbɛl a Gáŋmbây, ké e gbaŋ wǎyri sé sâa.

¹¹Nyîn nírí̧, í sa ɓéké ɓay kɔ̧ tûl há̧narí̧ nyá. Njuku ka sa ɓéké ɓay ka̧n tûl a nyîn nɛ́y, malé walɓay ka̧n tûl a nyîn nɛ́y, sa ɓéké ɓay, a walɓay kɔ̧ tûl sáŋna a Gáŋvbôn. A goló mɔ́ kaw ɓá njuku walɓay kɔ̧ tûl sáŋna, a zi tí ɓá mɔ kaw ɓá njuku tɔ́ŋ sáŋna nyá.

¹²A tu ɓá, ɓá Gáŋvbôn hɛʼɛ pé hí̧ sáŋna, mɛ̌ pé ma ɓay a walɓay, mɛ̌ hɛʼɛ ké ma ɓay a pɛ̧́ njuku, a ma ɓay ɓá njuku ɓɔ́l. Dáy a mɔ̌, mɔ́ mbí mûn nɔ́ ɓá gé rá, a walɓay ka̧n tûl a mbɔ́ŋnɔ́ lé?

¹³Í lá mí, ŋgɛŋnɛ́, wǎyri ka sa ɓá: «Sénɛ́ malé típélé lé, rú e sé pû nɛ́, rú e kaw pûké mbimbɔ̂m mbêw, rú e niŋ hɛ̧sɔ́ʼɔ a ziŋ lari.»

¹⁴A zi tu ɓá, káwa a wǎyri e ná a̧ní ka típélé yá! Katína, i kaw ɓá báŋa mbúsâny, ka ew a goló, falké lé ké tɛwrɛy.

¹⁵Dáy ɓay ka belɓá i sáy, ɓá a nɛ́: «Gáŋmbây mí zibɔʼɔkéy, rú e káwa, rú e niŋ hɛ̧ nɛ́ malé hɛ̧ nɔ́.»

¹⁶Dáy, katína, i kaw ɓá njuku hɔ̧́tûlri rá̧ njuku niŋ wéléri baa. Mára̧ hɔ̧́tûl nǎŋnɔ́, zi belyá.

¹⁷Nǎŋnɔ́ njuku ka tu niŋ hɛ̧ a béláké, ka a zi niŋ nyáy, niŋ ɓéké.