Read Capanahua Ják 5 Bible Online

Ják 5 - Capanahua bible

Ják 5

¹Dáy a ŋgɛŋnɛ́ í lá mí, wǎy njuku hɛ̧zíŋári̧! Í vú, a í órómûn a wǎyri ɓay tûl tɔ́ʼɔsêe ka e ɗéré kɔ̧ tûl a wǎyri!

²Hɛ̧zíŋa a wǎyri puŋ too dá, gárí a wǎyri ndére ndé rú too dá.

³Vbí̧rí̧lari a wǎyri rá̧ lari a wǎyri kúgoy too dá, kúgoyké nɔ́, pé e ɓá ɓay ŋgbá wǎyri, a rɛ́ŋ wǎyri ɓá báŋa hɔrɛ. I mára̧ hɛ̧zíŋa a wǎyri a sêe a kɔ́rɔ́ké.

⁴I zi pú lari péna a njukuri ka lú hɛpay a ɓil wâʼa a wǎyri yá, zi tí ɓá péna a béláké yá! Nǎŋnɔ́, kú vú dáy vúna a kuriri gí ka̧ súku a Gáŋvbôn, Gáŋmbây a nûnalê rá̧ tísiri.

⁵I kaw a tísiri a ɓil béla, a niŋ hɛ̧ ka i ziy. I sɔ̧́lâʼa a béláké ka mbé mûn a wǎyri ɓá báŋa ndayri a kú hɔl ɓay ínáké.

⁶I walɓay ŋgbá njukuri ka zi niŋ hɛ̧ nyáy, a í kuriri, kú zi ma niŋ ŋgɛ́rɛ ziŋ wǎyri yá.

⁷Í ikilaw a wǎyri nyîn nírí̧, ka̧ sêe ka Gáŋmbây e gínay. Í kó a̧ní njuku pá wâʼa ikilawɛ́, ka a zoko hɛ̧ wâʼa a mɛ̌, ka̧ sêe lú hɛ̧pay a mɛ̌y. Ké ikilawɛ́ tí ka tûl nzáʼambɔ̂m sé ka̧ tûl nzáʼakêw.

⁸Í ikilaw a wǎyri, wǎyri kɔ́, í kpúmûn a wǎyri, ɓayhí̧lé nâm gína a Gáŋmbây gí ɗɛ́ŋ dá.

⁹Í ŋgɔ̧rɔ̧ há̧narí̧ nyá, nyîn nírí̧, rá̧lǒo Gáŋvbôn ké walɓay kɔ̧ tûl a wǎyri yá, ɓayhí̧lé njuku walɓay gí ɗɛ́ŋ ka nzáʼaŋgboro ɓay a rína dá!

¹⁰Nyîn nírí̧, í kɛrɛ porofɛ́tri ka saɓay ka rɛŋ a Gáŋmbây: Í mbɛl kuriri a ɓil ikilaw a kuriri, a í kaw ka law mbêw a ɓil tɔ́ʼɔsêe a wǎyri.

¹¹Ná sa ɓá, béla káwa hí̧ njukuri ka ew kpú a ɓil ikilaw. I lá kú saɓay a ikilaw a Jób, dáy í kó hɛ̧ ka Gáŋmbây hí̧ nɛ́ a kɔ́rɔ́kéy. Katína, Gáŋmbây mbá ka béla law rá̧ kósêe a njuku.

¹²Dáy nyîn nírí̧, í zi ná háhɛ̧: Í zi ná háhɛ̧ a nûnalê malé ka tísiri, malé ka ŋgboro a hɛ̧ fékéri. I mí sa ɓá ɛ̧ lé, ké ɓá ɛ̧, a mí ɓá háy lé, ké ɓá háy, rá̧lǒo i lé ɓil walɓay a Gáŋvbôn nyá.

¹³Njuku a há̧na a bazeŋ a wǎyri, mí e a ɓil tɔ́ʼɔsêe lé? Ké gɔ́ŋ Gáŋvbôn. Njuku a há̧na, mí e ka lawrína lé? Ké ɗí si̧ŋ a ɗél Gáŋmbây.

¹⁴Njuku a há̧na a bazeŋ a wǎyri, mí e ka záŋmá lé? Ké ɗí gáŋnjuku a Egilizeri, kú gí ɓá mára̧ nɔ́ tûlé, a gɔ́ŋ Gáŋvbôn hí̧ nɛ́ ka rɛŋ a Gáŋmbây.

¹⁵Gɔ́ŋ Gáŋvbôn, a kú niŋ ka ŋgboro a láɓulaw, e hí̧ ŋgɛ́rɛ hí̧ njuku záŋmá: Gáŋmbây e ɓá nɛ́ uru, rá̧ ɓékéhɛ̧ a ké niŋ, Gáŋvbôn e vbá̧buma hí̧ nɛ́.

¹⁶I sa ɓékéhɛ̧ a wǎyri hí̧ há̧narí̧ kɔ̧ kála a bazeŋ a wǎyri, a í gɔ́ŋ Gáŋvbôn hí̧ há̧narí̧, rá̧lǒo í ziŋ ŋgɛ́rɛ. Ɓayhí̧lé gɔ́ŋ Gáŋvbôn a njuku a ndáráké erú ka kpɔ́ŋa mambá.

¹⁷Eli kaw ɓá njuku ɓá báŋa a manárí̧, dáy a gɔ́ŋ Gáŋvbôn, a gɔ́ŋ ɓáy, ɓá mbɔ̂m ké zi ná tɔ́, nǎŋnɔ́ mbɔ̂m zi tɔ́ yá ka tísiri mbimbɔ̂m sáy ka fêw zêe.

¹⁸Dáy ké regɔ́ŋ Gáŋvbôn ɓá féké ɓáy, nǎŋnɔ́ nûnalê pɔŋ mbɔ̂m tɔ́, tísiri hí̧ hɛ̧payri.

¹⁹Nyîn nírí̧, a bazeŋ a wǎyri, njuku mí ɓɔ́l ŋgboro a gbátɓay, rá̧ njuku a féké mí rerú nɛ́ lé,

²⁰í tu ɓá: Njuku ka rerú a ɓéké njuku mbêw gí tûl ŋgboroy, e pɛ̧́ nɛ́ ka hûl, a niŋ rá̧lǒo Gáŋvbôn ké vbá̧buma ɓékéhɛ̧ a mɛ̌ ɓá ŋgɛ̧́náké.