Read Capanahua 1Píyɛr 1 Bible Online

1Píyɛr 1 - Capanahua bible

1Píyɛr 1

¹Mǐ Píyɛ́r, apotere a Zezú Kiris. Mi ɗé mbété nɛ́ hí̧ njukuri ka Gáŋvbôn ten kuriri a kú kaw ɓá gɔ́rɔ́, ka a wal ma ɓil kaw a Pɔŋ, ɓil kaw a Galáte, ɓil kaw a Kapadós, ɓil kaw a Azí rá̧ ɓil kaw a Bitiní.

²Bâa, Gáŋvbôn tí ten wǎyri ɗambɛl ɓá báŋké a ké ziy, a ɓá wǎyri kaw ɓórí ka ŋgboro a Têm Pukí a mɛ̌, ɓay i lá nzáʼa a Zezú Kiris, a sêm mûn nɛ́ ké turu wǎyri. Béla rá̧ a vónáké a Gáŋvbôn ké kaw kuu wǎyri ɓá ŋgɛ̧́náké!

³Ná ɗél Gáŋvbôn, Bâa a Gáŋmbây a manárí̧ Zezú Kiris! A ɓil béla a mɛ̌, ké mbuŋ nárí̧ ɓá mbuŋa féké, ka ŋgboro a toma Zezú Kiris a bazeŋ a hûlri. Nǎŋnɔ́ ná erú ka kɛrɛ ka hí̧ káwa a ndísɛ̌ʼɛ,

⁴ɓay a zoko béla hɛ̧ri̧ ka Gáŋvbôn mɔny zoko njuku a mɛ̌ri̧ a nûnalê. Ɓá béla ka ma ɓɔ́la malé yíra malé fénáké e lúna nyá. Gáŋvbôn mɔny bélákéri ɓay a wǎyri a nûnalê,

⁵wǎyri, ka kpɔ́ŋa a Gáŋvbôn koro wǎyri ka ŋgboro a láɓulaw, ɓay a pɛ̧́na ka ná ɗɛ́ŋ ɓay a tɔ́ʼɔ mûn nɛ́ ka sêe a kɔ́rɔ́kéy.

⁶Ŋgɛŋnɛ́, wǎyri mí era a ɓil hɛ̧ ŋgɛ́rɛ́kéri ɓórí ɓórí ka yírí law a wǎyri ɓay a ɓil nâm kpay rá̧ kɔ́, í mbá a lawrína.

⁷Hɛ̧ ŋgɛ́rɛ́ké nɔ́rí̧, kaw tɔ́ʼɔ nɛ́rɛ̧ a láɓulaw a wǎyri. Vbí̧rí̧lari, ka ɓá hɛ̧ ka e ɓeway, kú kaw lé ka hɔrɛ rá̧ a kó béláké, ɓá mbêwké kɔ́ kuu láɓulaw a wǎyri ka ndé vbí̧rí̧lari ka nɛ́rɛ̧y, kú lé nɛ́ kɔ́ ka ŋgboro a hɛ̧ a ŋgɛ́rɛ́kéri rá̧lǒo kú kó nɛ́rɛ̧ a mɛ̌. Nǎŋnɔ́ pé i e ziŋ ɗéla, hɔ̧́na rá̧ béla káwa a sêe ka Zezú Kiris e tɔ́ʼɔ mûn nɛ́y.

⁸Mɛ̌ ka i zi nɛ́ táŋ kó nɛ́, mɛ̌ ka i láɓulaw hí̧ nɛ́ táŋ kó nɛ́ ɓáy kɔ́, ɓaykénɔ́, pé í mbá a lawrína, lawrína ka mbá sána a njukuri.

⁹Ɓayhí̧lé, i e ziŋ kpáʼandɔ̂ʼɔ a láɓulaw a wǎyri ka ɓá: Pɛ̧́na a ndísɛ̌ʼɛ a wǎyri.

¹⁰Porofɛ́tri saɓay sé tûl béla nɔ́ ka Gáŋvbôn mɔny zoko wǎyri, a mbí mûn a kuriri, a ɛ́ ɓil pɛ̧́na nɔ́ ɓay tu táŋáké.

¹¹Kú rú mûn a kuriri, ɓay a tu ɓá sêe sí̧, malé a̧ní hɛ̧ké e niŋa lé, ɓá báŋké ka Têm a Kiris ka e kuu kuriri tɔ́ʼɔ hí̧ kuriri. Ɓayhí̧lé Têmké nɔ́, tí tɔ́ʼɔ hí̧ kuriri ɗambɛl ɓá Kiris e tɔ́ʼɔsêe, falké lé, ké e ziŋ hɔ̧́na.

¹²Gáŋvbôn tí tɔ́ʼɔ hí̧ porofɛ́tri ɓá nzáʼapénaké nɔ́, zi tí ɓá ɓay a kuriri yá, ɓá ɓay a wǎyri. Dáy a ŋgɛŋnɛ́, nzáʼapénaké nɔ́, njuku tɔ́ʼɔ Bélaɓayri sa hí̧ wǎyri dá ka ŋgboro a kpɔ́ŋa a Têm Pukí, ka Gáŋvbôn pé gí a nûnalê. Dáy aŋnzeri kɔ́ zi ɓay a kú tu ɓilké.

¹³Ɓaykénɔ́, pé í ŋgbátûl a wǎyri ɓá béláké, a í kaw dɛ́ŋ a ɓil wal ɓil hɛ̧ a béláké rá̧ a belyáké. Í ɓá kɛrɛ a wǎyri ka̧n tûl béla a Gáŋvbôn ka i e ziŋáké ka sêe ka Zezú Kiris e tɔ́ʼɔ mûn nɛ́y.

¹⁴Í lá Gáŋvbôn, a í zi ná tɔ́ŋ tâ̧w hɛ̧ niŋa a wǎyri, ka i niŋ í̧ŋásá̧, ka i pa̧n tu Kiris yá ɓáy.

¹⁵Nǎŋnɔ́, ɓá báŋké ka Gáŋvbôn ka ɗí wǎyri, kaw ɓá njuku a táŋákéy, í kaw ɓá táŋáké kɔ́ a ɓil bɔʼɔséna a wǎyri too.

¹⁶Katína kú ɗé ɓá: «Í kaw ɓá táŋáké, ɓayhí̧lé mǐ, mi kaw ɓá táŋáké.»

¹⁷Mí ɓá njuku ka e walɓay kɔ̧ tûl a njuku sé tûl péna niŋa a mɛ̌ táŋ kó njuku tá mbɛ̧́nɛ́, pé i ɗí nɛ́ ɓá Bâa lé, í sé bɔʼɔséna a wǎyri sêe too ka i e ka tísiri nɛ́ a ɓil ŋgú wɔ́w.

¹⁸Í tu ɓá, Gáŋvbôn zé wǎyri a ɓil ɓéké káwa a wǎyri dá, ka i ziŋ ka gel a zîi a wǎyri. Zi tí ɓá ka ŋgboro a hɛ̧ a baaké ɓá báŋa a lari malé vbí̧rí̧lari yá;

¹⁹Dáy, ké zé wǎyri ka ŋgboro a sêm mûn a Kiris, ka niŋ hɛ̧púna rú̧ ɓá báŋa gun mbólé táŋ kpɛrɛ rá̧ táŋ ɗên ka mûn nɛ́.

²⁰Gáŋvbôn tí ten nɛ́ ɗambɛl ɓayké rá̧ pé a mɔny tísiri, dáy a ten táŋáké ɓay tûl béla a wǎyri a ŋgɛŋnɛ́, ka ɓá sêe a kɔ́rɔ́kéy.

²¹Ka ŋgboro a Kiris, pé i láɓulaw hí̧ Gáŋvbôn, mɛ̌ ka toma nɛ́ a bazeŋ a hûlri, ka a hí̧ nɛ́ hɔ̧́nay, nǎŋnɔ́ pé i ɓá láɓulaw a wǎyri rá̧ kɛrɛ a wǎyri too ka̧n tûl a Gáŋvbôn.

²²Ka ŋgboro a tɔ́ŋ gbátɓay, i tɛ̧ njuku a táŋákéri, ɓay í zi há̧narí̧ a bazeŋ a wǎyri ka law mbêw ɓá báŋa nyînrí̧. Nǎŋnɔ́, í zi há̧narí̧ ka ŋgɛ́rɛ a wǎyri too, ka law a táŋáké.

²³Katína, kú mbuŋ wǎyri ɓá féké, tí ɓá ka ŋgboro a mɛ̧rɛ̧ a púŋáké yá, ɓá ka ŋgboro a mɛ̧rɛ̧ a béláké ka ma hûl yáy, ka ŋgboro a ɓay a ndísɛ̌ʼɛ a Gáŋvbôn ka ná dát.

²⁴Ɓayhí̧lé, kú ɗé ɓá: «Njukuri too kaw ɓá báŋa hoyri, belkóna a kuriri too ná báŋa fúná hoy; Hoy hɔ́ʼɔ, fúnáké do,

²⁵dáy, ɓay a Gáŋmbây ná dát.» Ɓayké nɔ́, ɓá Bélaɓay a kú tɔ́ʼɔ hí̧ wǎyri.