Read Capanahua 1Píyɛr 4 Bible Online

1Píyɛr 4 - Capanahua bible

1Píyɛr 4

¹Nǎŋnɔ́ dáy, ɓá báŋké ka Kiris tɔ́ʼɔsêe a ɓil hay mûn nɛ́, wǎyri kɔ́, í mbí mûn a wǎyri a ɓil kɛrɛ a mbêwké nɔ́, ɓayhí̧lé njuku ka tɔ́ʼɔsêe a ɓil hay mûn nɛ́, wal há̧na kuu ɓéké dá,

²rá̧lǒo ké kaw, tí ɓá ɓay a niŋ hɛ̧ ka njukuri zi yá, ɓá ɓay a niŋ hɛ̧ ka Gáŋvbôn ziy, a ɓil nâm ka zi hí̧ nɛ́ ka tísiri nɛ́y.

³Katína, i mbí nâmri̧ ɓá ŋgɛ̧́náké í̧ŋásá̧, a niŋ hɛ̧ri̧ ka ri njukuri ka zi tu Gáŋvbôn nyáy, a ɓil niŋ hɛ̧ táŋ ŋgboroké, haŋ hɛ̧ri̧, távôn, sɔ̧́lâʼa táŋ ŋgboroké rá̧ nzó vôn táŋ ŋgboroké, pú vbônri̧ ka ná ɓá ɓékéhɛ̧.

⁴Ŋgɛŋnɛ́, njukuri ka zi tu Gáŋvbôn nyáy rekaw yér, ɓay hɛ̧ ka i zi mbí mûn a wǎyri a ɓil niŋ hɛ̧ a belyákéri kuu kuriri mbaa, nǎŋnɔ́, kú ɓew rɛŋ a wǎyri.

⁵Dáy, ɓéké njuku nɔ́rí̧ e sa fal péna a kuriri mbêw mbêw too hí̧ Gáŋvbôn, mɛ̌, ka kaw ɗɛ́ŋ ɓay a walɓay kɔ̧ tûl a njukuri ka e ka ndísɛ̌ʼɛ rá̧ hûlriy.

⁶Ɓaykénɔ́, pé kú tɔ́ʼɔ Bélaɓay hí̧ hûlri kɔ́, kú walɓay kɔ́ tûl a kuriri sé tûl hɛ̧ niŋa a kuriri ɓá báŋa a njukuri too ka tísiri. Dáy a ŋgɛŋnɛ́, ka ŋgboro a Têm Pukí, kú e ziŋ káwa ɓá báŋké ka Gáŋvbôn ziy.

⁷Kɔ́rɔ́ a hɛ̧ri̧ too gí ɗɛ́ŋ dá. Nǎŋnɔ́, í kaw ka ŋgboro a rɔ̧́na, a í ŋgbátûl a wǎyri ɓá béláké ɓay a gɔ́ŋ Gáŋvbôn.

⁸Ɗambɛlké too, í zi há̧narí̧ ka law mbêw, ɓayhí̧lé zína ɓá manárí̧ vbá̧buma ɓékéhɛ̧ri̧ ɓá ŋgɛ̧́náké.

⁹Í kaw ɗɛ́ŋ, ɓay a nyá gɔ́rɔ́ ziŋ há̧narí̧, táŋ ŋgɔ̧ra a bazeŋ a wǎyri.

¹⁰Í niŋ béla hí̧ há̧narí̧ mbêw mbêw ka ŋgboro a hɛ̧hí̧na ka í ziŋ a gel a Gáŋvbôn. Nǎŋnɔ́ i e kaw, ɓá béla njukupéna koro hɛ̧hí̧na ɓórí ɓórí ka Gáŋvbôn hí̧ wǎyri.

¹¹Njuku ka ziŋ hɛ̧hí̧na tɔ́ʼɔɓay, ké tɔ́ʼɔɓay a Gáŋvbôn, ka njuku ka ziŋ hɛ̧hí̧na niŋ pénay, ké niŋ ka ŋgɛ́rɛ ka Gáŋvbôn hí̧ nɛ́: Belɓá a ɓil hɛ̧ri̧ too, hɔ̧́na ké hí̧ Gáŋvbôn ka ŋgboro a Zezú Kiris, mɛ̌ ka hɔ̧́na rá̧ kpɔ́ŋa ɓá a mɛ̌ dát! Amɛn.

¹²Mbáŋa a mǐri̧, í zi ná kaw yér ɓay hɛ̧ ka i kaw ɓil hɔrɛ tɔ́ʼɔsêey, ɓá báŋa hɛ̧sáʼama pé gí ziŋ wǎyriy.

¹³Í ri mûn a wǎyri ɓay hɛ̧ ka i ziŋ tɔ́ʼɔsêe kuu Kiris, rá̧lǒo í mbá a lawrína a sêe ka Zezú e tɔ́ʼɔ hɔ̧́na a mɛ̌ hí̧ njukuri tooy.

¹⁴Njuku mí fára wǎyri ɓay hɛ̧ ka i kaw ɓá gunbɔʼɔ a Kiris lé, í mbá a lawrína, ɓayhí̧lé Têm a hɔ̧́na a Gáŋvbôn e ka tûl a wǎyri.

¹⁵Njuku a há̧na a bazeŋ a wǎyri, ké ná tɔ́ʼɔsêe ɓay hɛ̧ ka ké í hûl, malé ɓay hɛ̧ ka ké ríw malé niŋ ɓékéhɛ̧, malé ké ɓá tûlé rí ɓil ɓay a njukuri.

¹⁶Dáy njuku mí tɔ́ʼɔsêe, ɓay hɛ̧ ka ké kaw ɓá njuku a Kiris lé, sɔ̧rɔ̧ ké niŋ nɛ́ nyá, ké zi awá hí̧ Gáŋvbôn, ɓay hɛ̧ ka, ké mbí rɛŋ a Kiris ka̧n tûléy.

¹⁷Nâm ka walɓay e tínáy ka̧ dá, ké e tí ka tûl a njuku a Gáŋvbônri̧. Dáy, mí ɓá a tûl a manárí̧, pé walɓay e tínay, kɔ́rɔ́ a njukuri ka zi láɓulaw hí̧ Bélaɓay a Gáŋvbôn nyáy e ná a̧ní lé ?

¹⁸Ɓá báŋké a kú ɗéy: «Njuku a ndárákéri mí ziŋ pɛ̧́na ɓá pɔ̧́nɔ́y, e ná a̧ní, hí̧ ŋgbɔ́rɔ njukuri kuu ɓéké njukuri lé?»

¹⁹Nǎŋnɔ́, njukuri ka tɔ́ʼɔsêe a ɓil niŋ hɛ̧ ka Gáŋvbôn ziy, kú tɔ́ŋ niŋ hɛ̧ké, a kú pɔŋ mûn a kuriri ka̧n ɓil ndɔ̂ʼɔ a Gáŋvbôn ka mɔny hɛ̧ri̧ too, ka a kaw law mbêw sé tûl ŋgá̧nzáʼa a mɛ̌ri̧y.