Read Capanahua 1Píyɛr 5 Bible Online

1Píyɛr 5 - Capanahua bible

1Píyɛr 5

¹Ŋgɛŋnɛ́, mi kaw saɓay hí̧ njukuri ka e a bazeŋ a wǎyri, ka kaw ɓá gáŋnjuku a Egilizey. Mǐ kɔ́, mi kaw ɓá gáŋnjuku, mi kó tɔ́ʼɔsêe a Kiris, nǎŋnɔ́ mi e ziŋ hɔ̧́na ka e tɔ́ʼɔ mûn nɛ́y. Hɛ̧ ka mi vbí kuriri ɓá:

²Í koro hɛ̧hɔ́la ka Gáŋvbôn hí̧ wǎyri ɓá báŋa njuku korohɛ̧ri̧. Í koro kuriri ɓá béláké, tí ɓá ka ŋgɛ́rɛ yá, ka law béla, ɓá báŋké ka Gáŋvbôn ziy. Í niŋ, tí ɓá, ɓay a ziŋ lari yá, dáy í niŋ ka law mbêw,

³a tí ɓá ka ŋgboro a kaw tûl a njukuri a kú hí̧ wǎyri ɓá i koro yá, dáy í kaw ɓá njukuri a kú e kó bɔʼɔséna a wǎyri a mbɛl.

⁴Rá̧ sêe ka Mbây a njuku hɛ̧kórari e tɔ́ʼɔ mûn nɛ́y, í e ziŋ mbulí ka mbá ka hɔ̧́na, ka fénáké ma ɓewa yáy.

⁵Ɓá mbêwké kɔ́, wǎy kaban njukuri, í pɔtûl a wǎyri hí̧ gáŋnjuku Egilizeri. Nǎŋnɔ́ wǎyri too, í pɔtûl a wǎyri a ɓil káwa a wǎyri hí̧ há̧narí̧. Ɓayhí̧lé kú ɗé ɓá: «Gáŋvbôn kí ka̧ny hí̧ njuku hɔ̧́tûlri, a niŋ béla hí̧ njuku pɔtûlri.»

⁶Dáy í pɔtûl a wǎyri ka bɔʼɔ kpɔ́ŋa a ndɔ̂ʼɔ a Gáŋvbôn, rá̧ ké ma gbaŋ wǎyri ka sêe a ké ŋgá̧y.

⁷Í ɗere hɛ̧ sélaw a wǎyri too kɔ̧ tûlé, ɓayhí̧lé ɓá mɛ̌ pé kaw koro wǎyri.

⁸Í ŋgbá tûl a wǎyri ɓá béláké, a í kaw ɗɛ́ŋ, ɓayhí̧lé njuku ŋgá̧na a wǎyri, Zábolo, há̧ra̧ ɓá báŋa mamûu ka vbá̧nzáʼa, a kaw ɛ́ njuku ɓay a sɔ̧́nákéy.

⁹Í kpútûl ziŋ nɛ́ a ɓil kaw kpú a ɓil láɓulaw a wǎyri. A í tu ɓá, tɔ́ʼɔsêe a mbêwké nɔ́rí̧, ka̧ nyîn a wǎyri kɔ́ ka tísiri.

¹⁰Í e ziŋ tɔ́ʼɔsêe ɓáy, ɓay a nâm kpay. Dáy Gáŋvbôn ka e ka béla tooy, ɗí wǎyri gí ɓil hɔ̧́na a mɛ̌ ka ná dát, ka ŋgboro a káwa mbêw kuu Zezú Kiris, ké e mɔny wǎyri ɓá béláké mɛ̌ ka mûn nɛ́, a hí̧ wǎyri ŋgɛ́rɛ, a kpúmûn a wǎyri, a ɓá wǎyri ew ɓá kpúnáké.

¹¹Kpɔ́ŋa ké ɓá a mɛ̌ dát! Amɛn.

¹²Mi ɗé gun mbété nɛ́ hí̧ wǎyri ka ŋgboro a Silás, ka mi kó nɛ́ ɓá báŋa a nyîn ní a law mbêw. Mi ɗé ɓay a hí̧ ŋgɛ́rɛ hí̧ wǎyri rá̧ ɓay sa hí̧ wǎyri ɓá katína, ɓá gbát béla a Gáŋvbôn pé i e ka ɓilkéy.

¹³Njukuri ka Gáŋvbôn ten kuriri ɓá báŋa a wǎyri ka e a Babilon a geléy, nam wǎyri rá̧ Márke, gun a mǐ kɔ́.

¹⁴Í sí̧ŋ há̧narí̧, a í nam há̧narí̧ a ɓil zína ɓá báŋa nyînrí̧. A vónáké ké kaw kuu wǎyri too, wǎyri ka kaw ɓá njuku a Kirisri!