Read Capanahua 2Píyɛr 2 Bible Online

2Píyɛr 2 - Capanahua bible

2Píyɛr 2

¹Porofɛ́t a manyákéri tɛ̧́ í̧ŋásá̧ a bazeŋ a gun Izirayɛ́lri, ɓá mbêwké kɔ́, njuku tɔ́ʼɔhɛ̧ a manyákéri e tɛ̧́ a bazeŋ a wǎyri. Kú e ɓá hɛ̧tɔ́ʼɔ foori ɓá múnáké ka e gí ɓá njukuri sé ɓil ɓɔ́lay, ka sáŋ bákáwa ka pɛ̧́ kuriri, ɓaykénɔ́ kú e kɔʼɔ hɛ̧ ka e nduku kuriri ɓá gánáké gí kɔ̧ tûl a kuriri.

²Njukuri ɓá ŋgɛ̧́náké e tɔ́ŋ kuriri a ɓil ɓéké káwaké, nǎŋnɔ́ ŋgboro a gbátɓay e ziŋ fára ɓay tûl a kuriri.

³Dáy ka ŋgboro a zi ziŋ hɛ̧, kú e sɔ̧́ ŋgɛ́rɛ a wǎyri ka ŋgboro a nzáʼa rɔ́ʼɔ. Dáy tí ka í̧ŋásá̧, walɓay a kuriri gí ɗɛ́ŋ dá, nǎŋnɔ́ ɓewa a kuriri tí zoko ɗiɓaŋ nyá!

⁴Katína, Gáŋvbôn zi pɔŋ aŋnzeri ka niŋ ɓékéhɛ̧ ziŋ nɛ́ nyá, dáy a ɓá kuriri vbú ɓil pɔ̂ny hɔrɛ, ka ŋgá̧ kuriri ka wɛ̧̂ɛ ka̧n ɓil tirí̧ma zoko sêe walɓay a mɛ̌.

⁵Ké zi pɔŋ tísiri a í̧ŋásá̧ nyá, dáy Gáŋvbôn ɓew tísiri ka mbá ka ɓéké njukuri a mbii, a pɛ̧́ ɓá Nuwé, ka tɔ́ʼɔɓay a ndáráké, rá̧ njuku zíndɔ̂ʼɔsáy a fékéri kuu mɛ̌.

⁶Gáŋvbôn, walɓay kɔ̧ tûl a njuku a Sɔdɔ̂mri̧ rá̧ Gɔmɔ̂rri, a rɛ́ŋ kuriri ka hɔrɛ, ɓay a tɔ́ʼɔ ka ŋgboro a nɔ́, hɛ̧ ka e zoko ɓéké njukuri tooy.

⁷Dáy a ɓilké nɔ́, ké pɛ̧́ Lót, ɓayhí̧lé ké kaw ɓá njuku a ndáráké, ka e ka séna law ɓay tûl bɔʼɔséna a ɓéké njuku nɔ́rí̧.

⁸Ɓayhí̧lé njuku a ndáráké nɔ́, mɛ̌ ka kaw bazeŋ a kuriri, ké kaw kó a lá hɛ̧ri̧ too ka njuku nɔ́rí̧ kaw niŋáké sêe tooy, ɓéké káwaké kuriri, kaw sé lawɛ́ dát.

⁹Nǎŋnɔ́, Gáŋmbây tu a̧ní, ké e pɛ̧́ njukuri ka kaw mbêw kuu mɛ̌ dát, a pɔŋ ɓéké njukuri ɓay a ɓá kuriri tɔ́ʼɔsêe ka sêe walɓay a mɛ̌.

¹⁰Ké e ɓá kuriri tɔ́ʼɔsêe, ɛ́ŋ báŋa njukuri ka tɔ́ŋ ɓá ɓéké kɛrɛ a law a kuriri, ka a yáw kpɔ́ŋa a Gáŋvbôn. Njuku tɔ́ʼɔhɛ̧ a manyáké nɔ́rí̧, zi tí ka wɔ́w yá, a erú ka hɔ̧́tûl, kú zi hɛʼɛ hɛ̧ri̧ ka e ka hɔ̧́na a nûnalê yá, dáy ka fára kuriri.

¹¹A tu ɓá aŋnzeri ka ndé kuriri ka ŋgɛ́rɛ rá̧ kpɔ́ŋa, zi fára kuriri bɔʼɔ mbêw a mbɛl a Gáŋmbây yá.

¹²Dáy njuku nɔ́rí̧ kaw ɓá báŋa nâny a kpâari, ka zi tí ka hɛ̧túna nyáy, a kú mɔny ɓay a ŋgbá, a íy, kú fára hɛ̧ a kú zi tu yáy. Nǎŋnɔ́, kú e í kuriri ɓá báŋa sâ̧nyri̧;

¹³Nǎŋnɔ́, kú e ziŋ kpáʼandɔʼɔ ɓéké péna a kuriri too a kú niŋ. Kú ziŋ mûnrína a kuriri a ɓil niŋ hɛ̧ri̧ táŋ ŋgboroké a ɓil a sêe ɓá báŋké ka law a kuriri ziy. Ɓá hɛ̧ ɗaʼama, a ɓá hɛ̧ sɔ̧rɔ̧, a kú mí gí kaw nzáʼa lâʼa kuu wǎyri, a ɓil rí mûn a kuriri ɓay tûl péna rɔ́ʼɔhɛ̧ a kuriri.

¹⁴Kɛrɛ a kuriri mbá ɓá kɛrɛ niŋ dala, kú zi ta̧ ka niŋ ɓéké yá. Kú rɔ́ʼɔ njukuri ka zi kpáʼa a ɓil láɓulaw yáy. Law a kuriri mbá ɓá kɛrɛ ziŋ hɛ̧zíŋári̧. Nǎŋnɔ́ hɛ̧hána a Gáŋvbôn e ka tûl a kuriri!

¹⁵Kú pɔŋ ŋgboro a ndáráké, dáy a kú ɓɔ́l, a tɔ́ŋ ŋgboro a mbêwké nɔ́ ka Balâm gun a Bosɔ̂r mbíy. Ké zi lari a kú hí̧ nɛ́ ɓay a ké niŋ hɛ̧ a belyáké,

¹⁶dáy Gáŋvbôn reɓay ka̧n nzɛ́ʼɛ sé tûl ɓékéhɛ̧ a mɛ̌. Ɓayhí̧lé máhóla ka zi saɓay yáy, saɓay hí̧ nɛ́ dáy a de ŋgboro niŋ péna dɔ̂ʼɔ a mɛ̌, a porofɛ́t.

¹⁷Njuku nɔ́rí̧ kaw ɓá báŋa lɔ̂ʼɔmbii a ɔ̧nakéy, a kaw ɓá báŋa ɗaʼama mbɔ̂m, a kúna fá̧y, nǎŋnɔ́ Gáŋvbôn mɔny gel zoko kuriri a ɓil tirí̧ma.

¹⁸Kú saɓay a hɔ̧́tûlri, ka zi tí ka nɛ́rɛ̧ nyáy, a kú mbí hɛ̧ kɛrɛ sɔ̧rɔ̧ a kuriri, ɓay a rɔ́ʼɔ njukuri ka rú ɓá pɔ̧́nɔ̧́ ka a pɛ̧́ a ɓil ndɔ̂ʼɔ a njukuri ka mbí ŋgboro a belyákéy.

¹⁹Kú sa hí̧ kuriri ɓá kú e ten kuriri a ɓil koy, a tu ɓá kuriri ka mûn a kuriri, kú kaw ɓá koy a bɔʼɔséna, ka kaw ɓew kuriri. Ɓayhí̧lé njuku too, kaw ɓá koy a hɛ̧ ka ndé tûlé.

²⁰Katína, njuku a há̧narí̧ ziŋ pɛ̧́na a ɓil ɓékéhɛ̧ a tísiri nɛ́ a kaw yɔʼɔlɔ kuriri, ka ŋgboro a tu Gáŋmbây, Zezú Kiris njuku pɛ̧́ nárí̧. Dáy kú ré pɔŋ mûn a kuriri ɓáy relé ɓil ɓékéhɛ̧ké, a goló káwa a kuriri a ŋgɛŋnɛ́, reɓew ndé káwa a tâ̧wké.

²¹Bel ndé hí̧ kuriri ɓá kú tu ŋgboro a ndáráké yá, ndé tu ŋgboro a ndáráké, a reféré ka̧ny hí̧ sáŋna a Gáŋvbôn a kú tɔ́ʼɔ hí̧ kuriri.

²²Nǎŋnɔ́ hɛ̧ ka zoko kuriri, ɓá báŋké ka galaɓay sáy: «Vâa resé lâʼa hɛ̧ a ké mbukuy», rá̧: «kɔsɔ a fal turu mûn nɛ́, relé núnmbɛ̧́nɛ́ vbú ɓil mbɔrɔ ɓáy.»