Read Capanahua 1Zâŋ 2 Bible Online

1Zâŋ 2 - Capanahua bible

1Zâŋ 2

¹Gun a mǐri̧, mi ɗé hí̧ wǎyri, rá̧ í zi ná niŋ ɓéké. Dáy njuku mí niŋ ɓéké lé, ná erú ka njuku nyá tûl a manárí̧ a mbɛl a Bâa: Ɓá Zezú Kiris, njuku a ndáráké.

²Ɓayhí̧lé, ké hí̧ mûn nɛ́ ɓá hɛ̧púna ɓay a vbá̧buma ɓéké a manárí̧, tí ɓá manárí̧ mbɛ́ŋ nyá, dáy hí̧ njukuri too ka tísiri kɔ́.

³Manárí̧ mí koro sáŋna a Gáŋvbôn, tɔ́ʼɔ ka ŋgboro a nɔ́ ɓá ná tu Gáŋvbôn.

⁴Njuku mí sa: «Mi tu Gáŋvbôn», dáy a mí zi hɛʼɛ sáŋna a Gáŋvbôn nyá lé, ké ɓá njuku kúŋɓay, gbátɓay zi tí a gé lé yá.

⁵Dáy a njuku ka tɔ́ŋ ɓay a Gáŋvbôn, zína a mɛ̌ sé ŋgboro a Gáŋvbôn ná ɓá táŋáké. Nǎŋnɔ́, ka ŋgboro a nɔ́, pé ná tu ɓá, ná e mbêw kuu Gáŋvbôn.

⁶Njuku mí sa ɓá, ké e mbêw kuu Gáŋvbôn, belɓá ké kaw ɓá báŋa káwa a Zezú.

⁷Mbáŋa a mǐri̧, zi tí ɓá sáŋna a ŋgɛŋké pé mi ɗé hí̧ wǎyri yá, ɓá tâ̧w sáŋna, ka i tí ziŋ a tí taʼaké. Tâ̧w sáŋnaké nɔ́, ɓá ɓay ka i tí lá dáy.

⁸Ɓá sáŋna a ŋgɛŋké kɔ́ pé mi ɗé hí̧ wǎyri, ɓá gbátɓay a sáŋna nɔ́ pé tɔ́ʼɔ mûn nɛ́ ka ŋgboro a Kiris rá̧ wǎyri kɔ́. Katína, sû̧ŋ kaw tána, nǎŋnɔ́ geltáŋa a gbátké kaw táŋa dá.

⁹Dáy njuku mí sa ɓá, mi e a ɓil geltáŋa rá̧ a mí fɔny nyîn nɛ́rí̧y, tɔ́ʼɔ ɓá ké kaw dát a ɓil tirí̧ma.

¹⁰Njuku ka zi nyîn nɛ́y, kaw ɓil geltáŋa, nǎŋnɔ́ hɛ̧ a há̧na mbêw a gé lé ka e ɓá nɛ́ léy, zi tí yá.

¹¹Dáy njuku ka fɔny nyîn nɛ́y, ké e a ɓil tirí̧ma ɓáy, ké séséna a ɓil tirí̧ma, a zi tu gel a ké kaw serú yá, ɓayhí̧lé tirí̧ma râ̧w nûn nɛ́.

¹²Gun a mǐri̧, mi ɗé hí̧ wǎyri, ɓayhí̧lé Gáŋvbôn vbá̧buma ɓéké a wǎyri, ɓay tûl a rɛŋ a Zezú Kiris dá.

¹³Mi ɗé hí̧ wǎyri bâari, ɓayhí̧lé i tu njuku ka tí erú a títáʼaké. Mi ɗé hí̧ wǎyri kaban njukuri, ɓayhí̧lé i ndé Zábolo.

¹⁴Mi ɗé hí̧ wǎyri, gun a mǐri̧, ɓayhí̧lé i tu Bâa. Mi ɗé hí̧ wǎyri, bâari, ɓayhí̧lé i tu njuku ka tí erú a títáʼaké. Mi ɗé hí̧ wǎyri, kaban njukuri, ɓayhí̧lé i erú ka ŋgɛ́rɛ: Ɓay a Gáŋvbôn e ka law wǎyri, dáy i ndé Zábolo.

¹⁵Í ná zi tísiri malé hɛ̧ri̧ ka e ka tísiri. Njuku mí zi tísiriy, ŋgboro zi Bâa Gáŋvbôn zi tí hí̧ nɛ́ mbaa.

¹⁶Ɓayhí̧lé, hɛ̧ tísiri ɓá: Haŋhɛ̧ niŋ hɛ̧ ka hay mûn ziy, nzala ziŋ hɛ̧ a gí ka ŋgboro a kó hɛ̧ a nûn rá̧ hɔ̧́tûl ka gí ka ŋgboro a hɛ̧zíŋa, hɛ̧ nɔ́rí̧ too, zi gí ka ŋgboro a Bâa yá, gí ka ŋgboro a tísiri.

¹⁷Dáy, tísiri kaw tána rá̧ hɛ̧ a ɓilkéri too ka njuku ɓá law ka̧n tûlké, dáy njuku ka niŋ hɛ̧ ka Gáŋvbôn ziy, ké e kaw dát.

¹⁸Gun a mǐri̧, ɓá sɛl a sêe a kɔ́rɔ́ké! I tí lá kú sa ɓá, njuku ŋgá̧na a Kiris e gína, dáy a ŋgɛŋnɛ́, njuku ŋgá̧na a Kiris ɓá ŋgɛ̧́náké gí dá. A goló, pé ná tu ɓá sɛl a sêe a kɔ́rɔ́ké ka̧ dá.

¹⁹Njuku nɔ́rí̧ tɛ̧́ a bazeŋ a manárí̧, dáy, kú zi tí ɓá njuku a manárí̧ nyá. Kú mí kaw ɓá gbát njuku a manárí̧, kú e kaw kuu manárí̧. Ŋgɛŋnɛ́ ná ɓá táŋáké dá, ɓá kuriri nɔ́ too, kú zi kaw ɓá gbát njuku a manárí̧ nyá.

²⁰Dáy a wǎyri too, i ziŋ Têm a Gáŋvbôn ka ŋgboro a Kiris, nǎŋnɔ́ i tu gbátɓay too.

²¹Dáy mí, mi ɗé hí̧ wǎyri, zi tí ɓá, i zi tu gbátɓay nyá yá, ɓá ɓay ka i tu gbátɓay, nǎŋnɔ́ kúŋɓay a há̧na, ma tɛ̧́ a ɓil gbátɓay yá.

²²Dáy a gé ɓá njuku kúŋɓay lé? Ɓá njuku ka many ɓá Zezú zi tí ɓá Kiris yáy. Njuku nɔ́, ɓá njuku ŋgá̧na a Kiris, ké sáŋ Bâa rá̧ Gun!

²³Ɓayhí̧lé, njuku too ka sáŋ Gun, sáŋ Bâa kɔ́, ka njuku ka nyá Gun, nyá Bâa kɔ́.

²⁴Ɓaykénɔ́, í koro ɓay ka i lá a títáʼaké kɔ̧ law a wǎyri. Wǎyri mí koro hɛ̧ ka í lá a títáʼaké kɔ̧ law a wǎyri, wǎyri kɔ́, i kaw mbêw kuu Gun rá̧ Bâa.

²⁵Katína, hɛ̧ ka Kiris hí̧nzáʼa hí̧ nárí̧ ɓá: Ná e ziŋ káwa a ndísɛ̌ʼɛ dát.

²⁶Mi ɗé hɛ̧ nɛ́rí̧ hí̧ wǎyri, sé tûl a njukuri ka ɛ́ ŋgboro rɔ́ʼɔ wǎyri.

²⁷A wǎyri, Têm ka Kiris hí̧ wǎyri, e ka mûn a wǎyri. I zi tí ka nzala, ɓá njuku ké tɔ́ʼɔ ŋgboro hí̧ wǎyri yá, ɓayhí̧lé Têm Pukí tɔ́ʼɔ wǎyri hɛ̧ too: Ké tɔ́ʼɔ gbátɓay, a zi tí ɓá kúŋɓay yáy. Ɓaykénɔ́, í niŋ hɛ̧ a ké tɔ́ʼɔ hí̧ wǎyri: Í kaw mbêw kuu Kiris.

²⁸Katína gun a mǐri̧, í kaw mbêw kuu Kiris. Nǎŋnɔ́, a sêe a ké e gínay, ná e mbá ka mbílaw sé tûlé, sɔ̧rɔ̧ tí ŋgbá manárí̧ a mbɛlɛ́ yá.

²⁹I tu ɓá Kiris kaw ɓá njuku a ndáráké, dáy belɓá í tu kɔ́ ɓá, njuku too ka niŋ péna a ndáráké, kaw ɓá gun a Gáŋvbôn.