Read Capanahua 1Zâŋ 4 Bible Online

1Zâŋ 4 - Capanahua bible

1Zâŋ 4

¹Mbaŋa a mǐri̧ a mi zi mambáy, í zi ná láɓulaw hí̧ njukuri too ka sa kú erú ka Têm, í lé kuriri a í kó ɓá katína, kú erú ka Têm ka gí a ŋgboro a Gáŋvbôn lé. Ɓayhí̧lé porofɛ́t a manyákéri gí, a wal ma tísiri nɛ́ ŋgɛ̧́ mambá.

²Í kó báŋké ka i e tu Têm a Gáŋvbôn: Njuku too ka tu ɓá Zezú Kiris gí, a mbí mûn a njukuy, ké erú ka Têm a Gáŋvbôn.

³Dáy a njuku too, ka zi tu nǎŋnɔ́ nyáy, ké zi tí ka Têm a Gáŋvbôn nyá, ké erú ka têm a njuku ŋgá̧na a Kiris, ka i tí láɓay gína a mɛ̌y, dáy a ŋgɛŋnɛ́, têmké e ka tísiri dá.

⁴Wǎy gun a mǐri̧, i kaw ɓá njuku a Gáŋvbônri̧, i ndé porofɛ́t a manyákéri, ɓayhí̧lé, Têm ka e ka mûn a wǎyri, erú ka kpɔ́ŋa, ndé têm ka niŋ péna ka tísiri.

⁵Njuku nɔ́rí̧, ɓá njuku a tísiriri, kú saɓay ɓá báŋa njuku a tísiriri, lé njuku a tísiriri lá nzáʼa a kuriri.

⁶Dáy a manárí̧, ná kaw ɓá njuku a Gáŋvbônri̧, njuku ka tu Gáŋvbôn, e lá nárí̧, a njuku, ka zi tí ɓá njuku a Gáŋvbôn nyáy, zi lá nárí̧ nyá. A goló, pé ná e tu Têm a gbátɓay rá̧ têm a manyáké.

⁷Mbaŋa a mǐri̧ a mi zi mambáy, ná zi há̧narí̧ a bazeŋ a manárí̧, ɓayhí̧lé zína gí a gel a Gáŋvbôn. Njuku too ka e ka zínay, kaw ɓá gun a Gáŋvbôn, a tu Gáŋvbôn.

⁸Njuku ka zi tí ka zína nyáy, zi tu Gáŋvbôn nyá, ɓayhí̧lé Gáŋvbôn ɓá zína.

⁹Í kó ɓǎŋké ka Gáŋvbôn tɔ́ʼɔ nárí̧ zína a mɛ̌: ké pé Gun mbêw a mɛ̌ gí tísiri, ɓay a ná ziŋ ndísɛ̌ʼɛ ka ŋgboro a mɛ̌.

¹⁰Dáy zínáké, Gáŋvbôn tɔ́ʼɔ nárí̧ a̧ní lé? Zi tí ɓá manárí̧ pé tí zi nɛ́ nyá, ɓá mɛ̌ pé tí zi nárí̧, pé a pé Gun a mɛ̌ gí hí̧ mûn nɛ́ ɓá hɛ̧púna ɓay a manárí̧, ɓay a Gáŋvbôn, ké vbá̧buma ɓéké a manárí̧.

¹¹Mbáŋa a mǐri̧ a mi zi mambáy, mí ɓá nǎŋ pé Gáŋvbôn zi nárí̧ lé, belɓá manárí̧ kɔ́, ná zi há̧narí̧.

¹²Njuku a há̧na ka kó Gáŋvbôn bɔʼɔ mbêw zi tí yá, dáy manárí̧ mí zi há̧narí̧, Gáŋvbôn kaw mbêw kuu manárí̧, nǎŋnɔ́ zína a mɛ̌ tɔ́ʼɔ mûn nɛ́ ɓá táŋáké a bazeŋ a manárí̧.

¹³Í kó báŋké ka ná tu ɓá ná kaw mbêw kuu Gáŋvbôn, rá̧ mɛ̌, ké e kuu manárí̧: Ké hí̧ nárí̧ Têm a mɛ̌.

¹⁴Rú kó a sa ɓá, Bâa pé Gun a mɛ̌ gí pɛ̧́ njuku a tísiriri.

¹⁵Njuku, mí tu ɓá Zezú ɓá Gun a Gáŋvbôn, Gáŋvbôn kaw mbêw kuu mɛ̌, mɛ̌ ké kaw mbêw kuu Gáŋvbôn.

¹⁶Dáy ná tu, a láɓulaw ɓá Gáŋvbôn zi nárí̧. Gáŋvbôn ɓá zína, njuku ka kaw ɓil zínay, ké kaw mbêw kuu Gáŋvbôn, Gáŋvbôn kaw mbêw kuu mɛ̌.

¹⁷Zína mí ná ɓá táŋáké a bazeŋ a manárí̧, a goló ná e kaw táŋ wɔ́w, a sêe ka Gáŋvbôn e walɓay. Ɓayhí̧lé káwa a manárí̧ ka tísiri, ɛ́ŋ ɓá káwa a Zezú Kiris.

¹⁸Wɔ́w zi tí a ɓil zína nyá, zína a gbátké ní wɔ́w. Wɔ́w, zi ɓay a sa ɓá, tɔ́ʼɔsêe mí gíw, nǎŋnɔ́ njuku ka ŋgú wɔ́w, zi tu gbát zína nyá.

¹⁹Dáy a manárí̧, ná zi há̧narí̧, ɓayhí̧lé Gáŋvbôn tí zi nárí̧ ɗambɛl.

²⁰Njuku mí sa: «Mi zi Gáŋvbôn» rá̧ a mí fɔny nyîn nɛ́ lé, ké ɓá njuku kúŋɓay. Ɓayhí̧lé njuku mí fɔny nyîn nɛ́ a ké kó, ké e zi Gáŋvbôn a ké kó yáy a̧ní lé?

²¹Sáŋna ka Kiris hí̧ nárí̧ ɓá: Njuku mí zi Gáŋvbôn lé, belɓá ké zi nyîn nɛ́ kɔ́.