Read Capanahua 1Zâŋ 5 Bible Online

1Zâŋ 5 - Capanahua bible

1Zâŋ 5

¹Njuku too ka láɓulaw ɓá Zezú ɓá Kiris, kú mbuŋ nɛ́ gí a ŋgboro a Gáŋvbôn. A njuku ka zi bâa, zi gun ɓiléri kɔ́.

²Ná e niŋ a̧ní rá̧ a tu ɓá ná zi gun a Gáŋvbônri̧ le? Ná zi kuriri, ka manárí̧ mí zi Gáŋvbôn, rá̧ a mí tɔ́ŋ sáŋna a mɛ̌ri̧.

³Ɛ̧ katína, zi Gáŋvbôn, ɓá koro sáŋna a mɛ̌ri̧. Sáŋnakéri zi ŋgbɔ́rɔ yá,

⁴ɓayhí̧lé njuku too a kú mbuŋ nɛ́ ka ŋgboro a Gáŋvbôn, ndé ŋgɛ́rɛ a tísiri. Hɛ̧ ka ndé ŋgɛ́rɛ a tísiri ɓá láɓulaw a manárí̧.

⁵A gé ɓá njuku ka ndé ŋgɛ́rɛ a tísiriy le? Ɓá njuku ka láɓulaw ɓá: Zezú ɓá Gun a Gáŋvbôn.

⁶Zezú Kiris, ɓá mɛ̌ pé gí ka mbii rá̧ sêm. Ké zi gí ka mbii mbɛ́ŋ nyá, ké gí ka mbii rá̧ sêm kɔ́. Têm Pukí kɔ́ sa ɓá hɛ̧ké ɓá gbátɓay, ɓayhí̧lé Têm ɓá gbátɓay.

⁷Hɛ̧ri̧ sáy ka saɓay a mɛ̌y ɓá:

⁸Têm Pukí, mbii, rá̧ sêm dáy kuriri sáy too kú zibɔʼɔké.

⁹Manárí̧ mí zibɔʼɔ ɓay, a hɛ̧ ka njuku a tísiriri sáy, ɓay a Gáŋvbôn ka sáy zi hɔ̧́ ndé ɓay a kuriri yá lé? Ɓayké nɔ́ ɓá ɓay a ké sa, ka kó Gun a mɛ̌y.

¹⁰Njuku ka láɓulaw hí̧ Gun a Gáŋvbôn, erú ka ɓayké. A njuku ka zi láɓulaw hí̧ Gáŋvbôn nyáy, ké mbí ɓá Gáŋvbôn ɓá njuku kúŋɓay, ɓayhí̧lé, ké zi láɓulaw sé tûl ɓay ka Gáŋvbôn sa sé tûl a Gun a mɛ̌ nyá.

¹¹Ɓayké nɔ́ ɓá: Gáŋvbôn hí̧ nárí̧ káwa a ndísɛ̌ʼɛ dát, káwa a ndísɛ̌ʼɛké nɔ́ e ka gel a Gun a mɛ̌.

¹²Njuku ka nyá Gun, erú ka ndísɛ̌ʼɛ, a njuku ka zi nyá Gun a Gáŋvbôn nyáy, zi tí ka ndísɛ̌ʼɛ yá.

¹³Mi ɗé hɛ̧ nɛ́rí̧ hí̧ wǎyri, ɓay í tu ɓá, i e ka káwa a ndísɛ̌ʼɛ dát: Wǎyri ka i láɓulaw ka rɛŋ a Gun a Gáŋvbôn.

¹⁴Ŋgboro erú hí̧ nárí̧ ɓay a ná ɛ̧rɛ̧ gel sé gel a Gáŋvbôn táŋ wɔ́w, ɓayhí̧lé, manárí̧ mí vbí nɛ́ hɛ̧ ɓá báŋké a ké ziy, ké e lá nárí̧.

¹⁵Rá̧ manárí̧ mí tu ɓá, Gáŋvbôn kaw lá hɛ̧gɔ́ŋa a manárí̧ lé, ná tu ɓá, hɛ̧ ka ná vbíy, ná e ziŋáké!

¹⁶Njuku mí kó nyîn nɛ́ niŋ ɓékéhɛ̧ ka zi ɓá njuku sé hûl yáy, ké gɔ́ŋ Gáŋvbôn hí̧ nɛ́. Nǎŋnɔ́ Gáŋvbôn e hí̧ nɛ́ ndísɛ̌ʼɛ, a nɔ́ kó njukuri ka niŋ ɓékéhɛ̧ ka zi ɓá njuku sé hûl yáy. Dáy ɓékéhɛ̧ ka ɓá njuku sé hûl erú, tí ɓá ɓay a ɓékéhɛ̧ nɔ́ pé mi vbí wǎyri ɓá í gɔ́ŋ Gáŋvbôn ɓayké yá.

¹⁷Hɛ̧ a belyákéri too ka njuku niŋ ɓá ɓéké, dáy tí ɓá ɓéké too pé ɓá njuku sé hûl yá.

¹⁸Ná tu ɓá, gun a Gáŋvbôn zi kaw ɓil ɓéké dát yá, ɓayhí̧lé Gun a Gáŋvbôn koro nɛ́, Sata̧n zi ma niŋ hɛ̧ a há̧na ziŋ nɛ́ nyá.

¹⁹Ná tu ɓá, ná kaw ɓá njuku a Gáŋvbôn, a njuku a tísiriri too e ka bɔʼɔ kpɔ́ŋa a Sata̧n.

²⁰Ná tu ɓá Gun a Gáŋvbôn gí tísiri, a gí hí̧ nárí̧ hɛ̧túna, ɓay a ná tu gbát Gáŋvbôn. Ná kaw mbêw kuu gbát Gáŋvbôn, ka ŋgboro Gun a mɛ̌ Zezú Kiris. Ɓá mɛ̌ gbát Gáŋvbôn, ɓá mɛ̌ káwa a ndísɛ̌ʼɛ dát.

²¹Gun a mǐri̧, í koro tûl a wǎyri kuu vbônri̧.