Read Capanahua 2Zâŋ 1 Bible Online

2Zâŋ 1 - Capanahua bible

2Zâŋ 1

¹Mǐ gáŋnjuku, mi ɗé mbété nɛ́ hí̧ mɔ́ Kiriya, wûny ka Gáŋvbôn ten rá̧ gun a mɔ̌ri̧ ka mi zi a ɓil gbátɓay. Tí ɓá mǐ hɛʼɛ ní pé zi wǎyri yá, dáy njukuri too ka tu gbátɓay kɔ́.

²Rú zi wǎyri ɓay tûl gbátɓay a kaw ɓil a manárí̧, ka e kaw kuu manárí̧ dát.

³Bâa Gáŋvbôn rá̧ Zezú Kiris, Gun a Bâa, kú hí̧ manárí̧ béla, zína rá̧ a vónáké, ɓay ná kaw ɓil gbátɓay rá̧ zína.

⁴Mi erú ka lawrína mambá, ɓayhí̧lé mi kó gun a mɔ̌ a há̧narí̧ kaw a ɓil gbátɓay, ɓá báŋké ka Bâa Gáŋvbôn sa hí̧ nárí̧.

⁵Dáy a ŋgɛŋnɛ́, hɛ̧ ka mi vbí mɔ́, mɔ̌ Kiriya ɓá: Ná zi há̧narí̧ mbêw mbêw a bazeŋ a manárí̧. Tí ɓá sáŋna a féké pé mi ɗé hí̧ mɔ́ nyá, ɓá sáŋna ka ná tí ziŋ a títáʼaké.

⁶Zína zi ɓay sa ɓá, tɔ́ŋ sáŋna a Gáŋvbôn. Dáy sáŋna ka i tí ziŋ a tí taʼaké ɓá: I kaw a ɓil zína.

⁷Njuku nzáʼa rɔ́ʼɔri ɓá ŋgɛ̧́náké wal ma tísiri nɛ́ too. Kú zi zibɔʼɔké ɓá Zezú Kiris mbí mûn a njuku katína nyá. A nɔ́ pé tɔ́ʼɔ káwa a njuku nzáʼa rɔ́ʼɔ rá̧ njuku ŋgá̧na a Kirisri.

⁸Í kó tûl a wǎyri ɓá béláké, ɓay a í zi ná ɓá nɛ́rɛ̧ péna a wǎyri kɔ̧ kpâa baa, dáy í ziŋ kpáʼandɔ̂ʼɔ péna a wǎyri ɓá ŋgɛ̧́náké.

⁹Njuku ka zi tɔ́ŋ hɛ̧tɔ́ʼɔ a Kiris yáy, ka a niŋ hɛ̧ tá tûlkéy, mɛ̌ ké zi kaw mbêw kuu Gáŋvbôn nyá. Dáy njuku ka koro hɛ̧tɔ́ʼɔ a Kiris, ké kaw mbêw kuu Bâa Gáŋvbôn rá̧ Gun kɔ́.

¹⁰Njuku mí gí gel a wǎyri ka hɛ̧tɔ́ʼɔ a féké ɓórí lé, í nyá nɛ́ kaw kuu wǎyri yá, a í nam nɛ́ nyá kɔ́.

¹¹Ɓayhí̧lé njuku ka nam nɛ́y, kaw ɓá mbáŋa a péna ɓékéhɛ̧ké kuu mɛ̌.

¹²Mi erú ka ɓayri ɓá ŋgɛ̧́náké ɓay a mi sa hí̧ wǎyri, dáy mi zi ɗé ka̧n tûl goy mbété yá. Ɓayhí̧lé mi kaw kɛrɛ ɓay a gé gél a wǎyri, ɓay a saɓayké hí̧ wǎyri nûn ka nûn rá̧ law a manárí̧ ké mbá ka sáʼa too.

¹³Gun a nyîn nɔ́, a Gáŋvbôn ten kɔ́, nam mɔ́.