Read Capanahua 3Zâŋ 1 Bible Online

3Zâŋ 1 - Capanahua bible

3Zâŋ 1

¹Mǐ gáŋnjuku, mi ɗé mbété nɛ́, hí̧ mɔ́ Gayus, mbáŋa a mǐ ka mi zi a ɓil gbátɓay.

²Mbáŋa a mǐ, mi zi ɓá hɛ̧ too ké sé ɓá béláké hí̧ mɔ́, a mɔ́ kaw ka ŋgɛ́rɛ ka mûn ɓá báŋké ka mɔ kaw ka ŋgɛ́rɛ a ɓil Têm a mɔ̌y.

³Gelka nyîn a há̧narí̧ gí ká̧y, mi kaw ka law sáʼa, ɓayhí̧lé kú saɓay a mɔ̌ sé tûl gbátɓay ka e a goló rá̧ báŋ káwa a mɔ̌ a ɓil gbátɓay;

⁴Hɛ̧ ka rí law ní ndéy, ɓá lá ɓá, gun a mǐri̧ kaw a ɓil gbátɓay.

⁵Mbáŋa a mǐ, mɔ tɔ́ʼɔ law mbêw a mɔ̌ sé tûl hɛ̧ri̧ too a mɔ niŋ hí̧ njuku láɓulawri ka ɓá gɔ́rɔ́ri.

⁶Kú gí saɓay a zína a mɔ̌ a ɓil Egilize a gelé. Nǎŋnɔ́, mi vú hí̧ mɔ́ ɓá mɔ́ hí̧ndɔ̂ʼɔ hí̧ kuriri, ka tûl sé gɔ́rɔ́ a kuriri, a kú ma tá sé mbɛl, ɓá báŋké ka Gáŋvbôn ziy.

⁷Ɓayhí̧lé, kú mbí ŋgboro ɓay tûl a Kiris, táŋ nyá hɛ̧ a há̧na a gel a njukuri ka zi tu Gáŋvbôn nyáy.

⁸Belɓá ná hí̧ndɔ̂ʼɔ hí̧ mára̧ njuku nɔ́rí̧, ɓay a ná niŋ, manárí̧ kɔ́, péna mbêw kuu kuriri, ɓay a gbátɓay.

⁹Mi ɗé gun mbété nɛ́ hí̧ wǎyri, Egilize, dáy Diyotɛrɛf ka zi ɓay kaw ɓá njuku a tûlkéy dát, zi ɓay a láɓay a mǐ nyá.

¹⁰Ɓaykénɔ́, pé sêe ka mi e génay, mi e saɓay a ɓéké péna a mɛ̌, mɛ̌ ka kaw sa ɓéké ɓay rá̧ ɓay kúŋɓayri sé tûl a ɓurú. A féké ɓáy ɓá: Ké zi ɓay nyá njuku láɓulaw a fékéri ka ɓá gɔ́rɔ́ yá. Dáy njukuri ka zi ɓay nyá kuriri, ké de, a sa kú nyá gɔ́rɔ́kéri lé, ké e ní kuriri a ɓil Egilize.

¹¹Mbáŋa a mǐ, mɔ́ zi ná mbɛl ɓékéhɛ̧, mɔ́ mbɛl hɛ̧ ka ɓá hɛ̧ a béláké. Njuku ka niŋ bélahɛ̧y, kaw ɓá njuku a Gáŋvbôn, a njuku ka niŋ ɓékéhɛ̧y zi tu Gáŋvbôn nyá.

¹²Njukuri too kaw saɓay a béla a Demɛtiriyus rá̧ gbátɓay ka e a gé lé ka a tɔ́ʼɔ hɛ̧ niŋa a mɛ̌. Manárí̧ kɔ́, ná kaw saɓay a béla péna a mɛ̌, dáy mɔ tu ɓá, ɓay a manárí̧ nɔ́ ná ɓá gbátɓay dát.

¹³Mi erú ka ɓayri ɓá ŋgɛ̧́náké ɓay a sa hí̧ mɔ́, dáy mi zi ɓay a mí ɗé ka̧n ɓil goy mbété yá.

¹⁴Mi kɛrɛ ɓá, tí ɗí ɓǎŋ nyá ná e ziŋ há̧na, a goló ná e fɔ́ŋ sa̧a nûn ka nûn.

¹⁵A vónáké ké kaw kuu mɔ̌. Mbáŋa a mɔ̌ri̧ ka e a gelé, nam mɔ́. Mɔ́ nam mbáŋa a manárí̧ mbêw mbêw too.