Read Capanahua Júde 1 Bible Online

Júde 1 - Capanahua bible

Júde 1

¹Mi ɗé mbété nɛ́, mǐ Jude, njukupéna a Zezú Kiris, nyîn a Ják, hí̧ njukuri ka Bâa Gáŋvbôn ɗí kuriri, ka a zi kuriri, ka a koro kuriri ɓay a Zezú Kiris.

²Béla rá̧ vónáké a Gáŋvbôn rá̧ zína a mɛ̌ ké kaw kuu wǎyri.

³Nyîn a mǐri̧ ka mi zi mambáy, mi zi ka ŋgɛ́rɛ a mǐ too ɓay a mí ɗé mbété nɛ́ hí̧ wǎyri, sé tûl pɛ̧́na a manárí̧ ka mbêw. Dáy hɛ̧ri̧ ka kaw tánáy, ɓá mí ka ŋgɛ́rɛ ɓá mí reɗé hí̧ wǎyri, ɓay a kpúmûn a wǎyri, rá̧ í ma rúbére ɓay a koro ɓay a Gáŋvbôn ka ná láɓulaw sé tûlké, ka Gáŋvbôn hí̧ njuku a mɛ̌ri̧ bɔʼɔ mbêw wɔ́w.

⁴Katína njuku a há̧narí̧, lɔ́ rí bazeŋ a wǎyri, njukuri, a kú tí ɗé í̧ŋásá̧ ɓá hɛ́rɛ a Gáŋvbôn e kɔ̧ tûl a kuriri. Njukukéri nɔ́, kú kó béla a Gáŋvbôn, ɓá báŋa hɛ̧ ka pɔŋ ŋgboro niŋ dala hí̧ kuriri, ka sáŋ Gáŋnjuku rá Gáŋmbây a manárí̧ Zezú Kiris ka mbêw yáŋ.

⁵Mi zi ɓá, í kɛrɛ hɛ̧ri̧ ka i tu í̧ŋásá̧ tooy, ɓá Gáŋmbây, gelka ké pɛ̧́ gun Izirayɛ́lri, ka a ten kuriri tɛ̧́ ka tísiri a Ezíptey, a falké, ké gí nduku njukuri ka kpúlaw a kuriri too.

⁶Í rekɛ́rɛ káwa aŋnze a fékéri ka zi koro nzáʼa péna a kuriri yá, ka a sáŋ gelkáwa a kuriri, Gáŋvbôn ŋgá̧ kuriri, a tu kuriri kɔ̧ ɓil tirí̧ma wɔm, zoko sêe walɓay a mɛ̌ a kɔ́rɔ́ké.

⁷Nǎŋnɔ́ kɔ́, í rekɛ́rɛ Sɔdɔ̂m rá̧ Gɔmɔ̂r rá̧ gun pû a gbaŋkéri, ka njuku pûkéri sé bɔʼɔséna a belyáké ɓá báŋa aŋnze nɔ́rí̧. Kú ɛ́ ŋgboro niŋ dala kuu aŋnzeri ka mbí mûn a njuku, hɛ̧ ka zi tí ɓá ŋgboroké yáy. Kú rezíŋ hɛ́rɛ a Gáŋvbôn, ka ɓá hɔrɛ, ka rɛ́ŋ kɔ́rɔ́ké zi tí yáy, ɓayké ná ɓá nzáʼa nzɛ́rɛ hí̧ nárí̧.

⁸Ɓá báŋké nɔ́ kɔ́, njuku nɔ́rí̧ kɛrɛ ɓá hɛ̧ri̧ ka e a tûl a kuriri, nǎŋnɔ́, kú yírí mûn a kuriri ka mûn a kuriri, ka yáw kpɔ́ŋa a Gáŋvbôn, ka refara aŋnzeri a e ka hɔ̧́na a nûnalê.

⁹Dáy mbây a aŋnze ka rɛŋɛ́ ɓá Mísɛl rá̧ kɔ́, zi niŋ nǎŋnɔ́ nyá. Ké tá há̧na kú Zábolo a tûl hûl a Mɔyíze, ké zi kɛrɛ ɓay fára nɛ́ nyá, dáy a sa hí̧ nɛ́ ɓǎŋ ɓá: «Gáŋmbây hɛʼɛ marú̧!»

¹⁰Dáy njuku nɔ́rí̧ fára hɛ̧ a kú zi tu yáy, rá̧ hɛ̧ri̧ a kú tuy, hɛ̧túnáké a kuriri ná ɓá báŋa hɛ̧túna a hɛ̧sâ̧nyri̧ táŋ hɛ̧ mbɛla, dáy hɛ̧ nɔ́rí̧ ɓá kuriri sé ɓá ɓil ɓɔ́la.

¹¹Lelêe hí̧ kuriri, ɓayhí̧lé kú tɔ́ŋ gel bɔʼɔ a Kâ̧nyí, a ɓá mûn a kuriri vbú kpâa ɓá báŋa Balâm ɓay a hɛ̧zíŋa, kú ziŋ ɓɔ́la ɓay tûl uru bére a kuriri kuu Gáŋvbôn ɓá báŋa Koré.

¹²Njuku nɔ́rí̧ ɓá sɔ̧rɔ̧ kɔ̧ nûn a wǎyri a gel lâʼa a Gáŋmbây a bazeŋ a wǎyri. Kú lâʼa hɛ̧ táŋ sɔ̧rɔ̧, a kɛrɛ ɓá tûl a kuriri mbêw yáŋ. Kú ɛ́ŋ ɗaʼama a mbɔ̂m a ŋgɛ̧́náké a kúna fa̧ táy, ka mbɔ̂m zi tɔ́ nyáy. Kú ɛ́ŋ dii a tûl nzáʼambɔ̂m, ka lénáké zi tí yáy, kú lúrú kuriri lé, kú hú wɔm.

¹³Kú ɛ́ŋ gbélém mbii, ka uru ka gí ka ŋgɛ́rɛy, a ten fúrá ɓéké káwa sɔ̧rɔ̧ a kuriri. Kú ɛ́ŋ rôori ka há̧ra̧ táŋ ŋgboroké, nǎŋnɔ́ Gáŋvbôn mɔny gel yíra rá̧ tirí̧ma zoko kuriri dát.

¹⁴Ɓá Enɔ́k, gun a zíndɔ̂ʼɔsáyké a ɓil sɛl î̧n a Adam, ɗiɓaŋ dá a ké saɓay sé tûl a kuriri ɓá: «Í lá, Gáŋmbây e gí kuu táŋa aŋnze a mɛ̌ri̧ bonké ŋgɛ̧́ mambá,

¹⁵ɓay gí walɓay kɔ̧ tûl a njukuri too. Ké e ɓá ɓay ŋgbá ɓéké njukuri too, ɓay tûl ɓékéhɛ̧ a kuriri too, sé tûl uru bére a kuriri kuu Gáŋvbôn rá̧ ɓéké ɓayri a kú sa sé tûl a Gáŋvbôn táŋ hɛʼɛ nɛ́y.»

¹⁶Njuku nɔ́rí̧ ɓá njukuri ka ŋgɔ̧rɔ̧ ɓay mambá, a vúmûn a kuriri, ka tɔ́ŋ hɛ̧ri̧ ka law a kuriri ziy. Kú saɓay ka hɔ̧́tûl, ka rɔ́ʼɔ njukuri ɓay a sɔ̧́ ŋgɛ́rɛ a kuriri.

¹⁷Dáy a wǎyri, njuku zína a mǐri̧, í kɛrɛ nzáʼa nzɛ́rɛ ka apotere a Gáŋmbây a manárí̧ Zezú Kiris sa hí̧ wǎyri í̧ŋásá̧y.

¹⁸Kú sa hí̧ wǎyri ɓá: «Sêe ka tísiri e ɔ náy, njukuri erú, ka e yáw wǎyri, ka a tɔ́ŋ ɓá ɓéké péna kuriri a kú ziy.»

¹⁹Ɓá njukuri ka péna a kuriri ɓá, ɓá wála ka̧n bazeŋ a njukuri, kɛrɛ a kuriri ɔ ɓá tûl hɛ̧ a tísiri, a zi tí ka Têm Pukí a Gáŋvbôn nyá.

²⁰Dáy a wǎy, njuku zína a mǐri̧, í hɔ̧́ a ɓil táŋa ɓay ka i ɓá láɓulaw a wǎyri ka̧n tûlké, a í gɔ́ŋ Gáŋvbôn ka ŋgboro a kpɔ́ŋa a Têm Pukí.

²¹Í ŋgbá káwa a wǎyri dát a ɓil zína a Gáŋvbôn, a í zoko ɓá Gáŋmbây a manárí̧ Zezú Kiris, ka a ɓil béla a mɛ̌, ké hí̧ wǎyri káwa ndísɛ̌ʼɛ a wɔmkéy.

²²Í kósêe a njukuri ka zi tu hɛ̧ a kú ziy ɓá béláké yá ɓáy.

²³A fékéri erú, ka í pɛ̧́ kuriri, a ten kuriri a ɓil hɔrɛ. A fékéri ɓáy, í kósêe a kuriri kɔ́, dáy a ɓil wɔ́w. Nǎŋnɔ́, í fɔny kuriri sé ka̧ gári a kuriri ka sa̧, ka yíra ɓékéhɛ̧ a kuriri.

²⁴Gáŋvbôn ka ma ɓay a koro wǎyri, ɓay í zi ná léy, ké ɓá wǎyri tɛ̧́ táŋ ɓékéhɛ̧, mbá ka sáʼa a ɓil hɔ̧́na a mɛ̌.

²⁵Mɛ̌, Gáŋvbôn mbêw yáŋ, ka pɛ̧́ nárí̧ ka ŋgboro a Gáŋmbây a manárí̧ Zezú Kiris, ké ziŋ hɔ̧́na, zítêm, kpɔ́ŋa, sêe too, a ŋgɛŋnɛ́ rá̧ dát! Amɛn!