Read Capanahua Apokalipse 1 Bible Online

Apokalipse 1 - Capanahua bible

Apokalipse 1

¹Mbété nɛ́ erú ka hɛ̧ a múnáké ka Zezú Kiris ten táŋáké. Gáŋvbôn hí̧ nɛ́, ɓay ké tɔ́ʼɔ hí̧ njukupéna a mɛ̌ri̧, hɛ̧ri̧ ka e gí ɗɛ́ŋ. Dáy Kiris pé aŋnze a mɛ̌ ɓay ké gí tɔ́ʼɔ hɛ̧kéri hí̧ Zâŋ njukupéna a mɛ̌.

²Zâŋ sa hɛ̧ri̧ too a ké kóy, ɓá ɓay a Gáŋvbôn rá̧ gbátɓay ka Zezú ten.

³Béla hí̧ njuku ka e kɛ̧́ mbété nɛ́, rá̧ njukuri ka e láɓay a porofɛ́t, ka a koro hɛ̧ri̧ ka ɗé ka̧n ɓil mbété nɛ́! Ɓayhí̧lé nâm a kú ŋgbá ɓay a hɛ̧ nɔ́rí̧ too, gí ɗɛ́ŋ dá.

⁴Mǐ Zâŋ, mi ɗé mbété nɛ́ hí̧ Egilize zíndɔ̂ʼɔsáy ka tísiri a Azí. Béla rá̧ a vónáké, ké kaw kuu wǎyri, ka ŋgboro a Gáŋvbôn ka tí erú, ka erú, ka e gína, rá̧ ka ŋgboro a têm zíndɔ̂ʼɔsáy ka ew a mbɛl gelkáwa mbây a mɛ̌,

⁵rá̧ ka ŋgboro a Zezú Kiris, njuku saɓay law mbêw, mbɔŋɔ gun, titíla njuku ka toma ka hûl rá̧ Gáŋmbây ka kaw tûl a mbâyri ka tísiri. Mɛ̌ Kiris ka zi nárí̧, pé ten nárí̧ a ɓil ɓékéhɛ̧ ka sêm mûn nɛ́,

⁶ké ɓá nárí̧ kaw ɓá njuku a Pû a Gáŋvbônri̧, njuku nzáʼaká̧nari̧, ɓay niŋ péna hí̧ Gáŋvbôn Bâa a mɛ̌. Hɔ̧́na rá̧ kpɔ́ŋa ké hí̧ nɛ́ dát! Amɛn!

⁷I kó, ké gí a ɓil ɗaʼama a mbɔ̂m! Nûn a njukuri too e kó nɛ́, rá̧ njukuri ka túŋ kazéré nɛ́ kɔ́. Njukuri ka tísiri nɛ́ too e órómûn a kuriri ɓay tûlé. Nǎŋnɔ́! Amɛn!

⁸Gáŋmbây, Gáŋvbôn ka erú ka kpɔ́ŋa too, sa: «Mi ɓá Alfa rá̧ Omɛ́ga, mi ɓá njuku ka tí erú, ka erú, ka e gína.»

⁹Mǐ Zâŋ, nyîn a wǎyri, ka e ɓil tɔ́ʼɔsêe kuu wǎyri ɓay a Pû a Gáŋvbôn, rá̧ ɓay ew ɓá kpúnáké kuu Zezú. Kú ɓá mi sé tûl kɔ̂ɔ mbii a kú ɗí ɓá Patmɔ́s, ɓay tûl niŋ law mbêw a mǐ sé tûl ɓay a Gáŋvbôn rá̧ ɓay a gbátɓay ka kó Zezú.

¹⁰A ɓil nâm a Gáŋmbây, Têm Pukí niŋ péna ka mûn ní, dáy mi lá kɔŋ a njuku saɓay ka falní ɓá gbénáké ɓá báŋa tɛ̧̂w pé kú ul.

¹¹Ka sa: «Hɛ̧ ka mɔ kóy, mɔ́ ɗé ɓayké ka̧n ɓil mbété, a mɔ́ pé sé hí̧ Egilize zíndɔ̂ʼɔsáy nɛ́rí̧: Efɛze, Ɛsmirne, Pɛrgám, Tiyátir, Sardɛ́s, Filadelfí rá̧ Lawdisé.»

¹²Mi kí ɓay a mí kó a gé saɓay hí̧ mí lé! Dáy a kó ɓá hɛ̧ ɓá lámbe si tûlké zíndɔ̂ʼɔsáy, a kú mɔny ka vbí̧rí̧lari.

¹³A lawgelké, hɛ̧ a há̧na ewrú ɓá báŋa gun njuku, a ri gáŋ laa ka ɗere kɔ̧ tûl bɛʼɛ, a ŋgá̧ nzáʼalawké ka hɔʼɔ tûl gári a kú mɔny ka vbí̧rí̧lari.

¹⁴Tâny tûlé puku ɓá báŋa ûm malé sá̧ri̧. Nûn nɛ́ taʼa ɓá báŋa rêm hɔrɛ,

¹⁵bɛʼɛ fé ɓá báŋa saw ka erú ka nɛ́rɛ̧ a kú ɓá ka̧n hɔrɛ, kɔ́ŋɛ́ gbé ɓá báŋa súbuu.

¹⁶Ké ŋgbá rôo zíndɔ̂ʼɔsáy ka̧n ndɔ̂ʼɔ lâʼa, gá̧má ka nzáʼaké sére, tûlké ná pɛ́rɛp tɛ̧́ ka nzɛ́ʼɛ. Nûn nɛ́ sú ɓá báŋa sêe ka e ka ɓaraŋgaŋ.

¹⁷Gelka mi kó nɛ́, mi lé vbú tísiri a bɛʼɛ ɓá báŋa hûl. Dáy, ké ɓá ndɔ̂ʼɛ a lâʼa ka̧n tûl ní a sa: «Mɔ́ ŋgú wɔ́w yá! Mi ɓá titíláké rá̧ kɔ́rɔ́ké,

¹⁸mi kaw ka ndísɛ̌ʼɛ. Mi tí hú, dáy a ŋgɛŋnɛ́ mi kaw ka ndísɛ̌ʼɛ dát. Mi erú ka kpɔ́ŋa ka tûl a hûl rá̧ pû a hûlri.

¹⁹Mɔ́ ɗé hɛ̧ ka mɔ kó, hɛ̧ ka erú rá̧ hɛ̧ ka e gí a fal.

²⁰Mɔ́ lá táŋa ɓay a rôo zíndɔ̂ʼɔsáy nɛ́, ka mɔ kó a ɓil ndɔ̂ʼɔ lâʼa a mǐ rá̧ hɛ̧ ɓá lámbe sirú zíndɔ̂ʼɔsáy a kú mɔny ka vbí̧rí̧lari: Rôo zíndɔ̂ʼɔsáy nɔ́, ɓá aŋnze a Egilizeri zíndɔ̂ʼɔsáy, rá̧ hɛ̧ ɓá lámbe sirú zíndɔ̂ʼɔsáy nɔ́, ɓá Egilizeri zíndɔ̂ʼɔsáy.»