Read Capanahua Apokalipse 10 Bible Online

Apokalipse 10 - Capanahua bible

Apokalipse 10

¹Mí kó kpɔ́ŋa aŋnze a féké ɗere a nûnalê. Ké ku mûn nɛ́ ka ɗaʼama a mbɔ̂m rá̧ rúwí ka̧n tûlé ɓá báŋa mbulí, nûn nɛ́ ná ɓá báŋa sêe, rá̧ bɛʼɛ ná ɓá báŋa gáŋ dii hɔrɛ.

²Ké ŋgbá gun mbété ka ŋgburuy, ka̧n ndɔ̂ʼɛ. A ɓá bɔʼɔ a lâʼa ndáʼa tûl mbii lúkí rá̧ bɔʼɔ ŋgbɔ́rɔ ndáʼa tísiri.

³Ké vbá̧nzáʼa a ŋgɛ́rɛ, ɓá báŋa vúna a mamûu. Gelka ké kaw vbá̧nzáʼa, poma mbɔ̂m zíndɔ̂ʼɔsáy zi nzɛ́ʼɛ.

⁴Mi zi ɓay a ɗé hɛ̧ a ké sáy, lé mi lá kɔ́ŋ a njuku a nûnalê a saɓay hí̧ mí ɓá: «Mɔ́ ŋgbá ka̧n lawɔ́ ɓay ka gbé a ɓil poma a mbɔ̂m zíndɔ̂ʼɔsáy nɔ́, mɔ́ zi ná ɗé ɓayké.»

⁵Dáy aŋnze, ka mi kó nɛ́ ew tûl mbii lúkí rá̧ tísiri, gbaŋ ndɔ̂ʼɛ a lâʼa sé sâa,

⁶ka háhɛ̧ ka rɛŋ a Gáŋvbôn ka kaw ka ndísɛ̌ʼɛ dát, ka mɔny nûnalê, tísiri, mbii lúkí rá̧ hɛ̧ri̧ too ka erú ɓilké. Nǎŋnɔ́ aŋnze sa: «Sɛl a sêe tí mbaa!

⁷Nâm ka aŋnze a zíndɔ̂ʼɔsáyké, e ul tɛ̧̂w, a goló Gáŋvbôn e niŋ hɛ̧ a múnáké a mɛ̌, a ké tí mɔny, ɓá báŋké a ké tí sa hí̧ njukupéna a mɛ̌ri̧, ka ɓá porofɛ́tri.»

⁸Dáy, kɔŋ a njuku ka mi lá saɓay gí a nûnalê, saɓay hí̧ mí ɓáy ɓá: «Mɔ́ sé mbí gun mbété ka ŋgburu ka ndɔ̂ʼɔ a aŋnze, ka ew tûl mbii lúkí rá̧ tísiri.»

⁹Mi ta̧m sé gbaŋa aŋnzeké a gé vbí nɛ́, ɓá ké hí̧ mí gun mbétéké. Ké rerú hí̧ mí ɓá: «Mɔ́ nyá mbétéké a mɔ́ sɔ̧́; e zuŋ a ɓiló, dáy a ɓil nzáʼa, e rí ɓá báŋa júrú.»

¹⁰Mi nyá gun mbétéké a ɓil ndɔ̂ʼɔ a aŋnze ráy a sɔ̧́. A ɓil nzáʼa ní, ké rí ɓá báŋa júrú, dáy gelka mi ta̧ sé ɓil ní, ké gé zuŋ a ɓil ní.

¹¹Dáy, kú sa hí̧ mí ɓá: «Belɓá mɔ́ sé sa ɓáy hɛ̧ ka Gáŋvbôn mɔny, ɓay a njukuri ɓá ŋgɛ̧́náké, pûri, nzáʼaɓayri ɓórí ɓórí rá̧ mbâyri.»