Read Capanahua Apokalipse 11 Bible Online

Apokalipse 11 - Capanahua bible

Apokalipse 11

¹Falké kú hí̧ mí kati ɓá báŋa kâ̧w léhɛ̧ a sa ɓá: «Mɔ́ sé lé vûn a Gáŋvbôn rá̧ nzáʼaká̧na, a kɛ̧́ bon a njukuri a kaw hɔ̧́ Gáŋvbôn a ɓilké.

²Dáy gel a kála, ka nzáʼa vûn a Gáŋvbôn, mɔ́ lé yá, ɓayhí̧lé gelké, kú hí̧ njukuri ka zi láɓulaw yáy, ka e ndáʼa pû a táŋáké a ɓil fêw bonɛŋ ka sére.

³Mi hí̧ njuku hánzáʼa níri̧ sére kpɔ́ŋa, kú e ri gári hûl, dáy a gé saɓay a kú ziŋ a gel a Gáŋvbôn, ɓil nâm kumrá̧ké mbêw ka ísɔ́t sére a bonzêe.»

⁴Njukuri sére nɔ́rí̧, ɓá oliviyéri sére rá̧ lamberi sére ka ew mbɛl a Gáŋmbây a tísiri.

⁵Njukuri mí zi ɓay niŋ ɓéké ziŋ kuriri, hɔrɛ tɛ̧́ ka nzáʼa a kuriri a rɛ́ŋ njukukéri. Katína, nǎŋnɔ́ pé njuku ka zi ɓay niŋ ɓéké ziŋ kuriri e ziŋ hûl.

⁶Njuku nɔ́rí̧ erú ka kpɔ́ŋa de mbɔ̂m ɓá ké zi ná tɔ́ a ɓil nâm a kú kaw saɓay a Gáŋvbôn. Kú erú ka kpɔ́ŋa fere mbí tɛ̧́ sêm kɔ́, a kú e ka ŋgboro ɓá ɓékéhɛ̧ri̧ ɓórí ɓórí gí tísiri, a kú mí ziy.

⁷Gelka kú mí ɔrɔ sa gelnzáʼa a Gáŋvbôn dáy, sâ̧ny ka tɛ̧́ ka pɔ̂ny ka kɔ́rɔ́ké tí yáy e rúbére ziŋ kuriri, a ndé kuriri, a í kuriri.

⁸Hûl a kuriri e kɔ̧ laɓára a ɓil gáŋ pûké a kú ɗí ɓá gala ɓá Sɔdôm malé Ezípte, goló a kú ɓara Gáŋmbây a kuriri ka tûl dii vbatay karúy.

⁹Njukuri, pûri, bɔʼɔdii ká̧nari̧, nzáʼaɓayri ɓórí ɓórí rá̧ njuku a tísiriri too e ɛ̧rɛ̧ hûl a kuriri a ɓil nâm sáy ka bɔ́ʼɔsêe kpay. Kú tí hí̧ ŋgboro ɓá kú goro kuriri yá.

¹⁰Njuku a tísirikéri e kaw ka lawrína ɓay a hûl a kuriri. Kú e záymûn a kuriri, a wal hɛ̧ hí̧ há̧narí̧, ɓayhí̧lé porofɛ́t nɔ́rí̧ sére niŋ kuriri tɔ́ʼɔsêe mambá.

¹¹Dáy a fal nâm sáy ka bɔ́ʼɔsêe kpay nɔ́, têm a hí̧ ndísɛ̌ʼɛ, e gí a gel a Gáŋvbôn, a gí ri mûn a kuriri, kú e toma, dáy njukuri too ka kó kuriri, e mbá ka wɔ́w.

¹²Dáy porofɛ́t nɔ́rí̧ láɓay a há̧na gbé ka ŋgɛ́rɛ gí a nûnalê ɓá: «Í he gí gelé!» Dáy kú he sé nûnalê a ɓil ɗaʼama a mbɔ̂m, ka nûn a njuku ŋgá̧na a kuriri.

¹³Núnmbɛ̧́nɛ́, tísiri laŋ ɓá ŋgɛ́rɛ́ké, wála ɓil pûkéri zêe too gbɛʼɛrɛ, dáy bon a njukuri kumrá̧ké zíndɔ̂ʼɔsáy ziŋ hûl. Njukuri ka kaw ka nûn, wɔ́w ŋgbá kuriri, dáy kú hí̧ hɔ̧́na hí̧ Gáŋvbôn.

¹⁴Lelêe a séreké tá dá, dáy í kóra, ɓá a sáyké zaa gelé gí.

¹⁵Falké, aŋnze a zíndɔ̂ʼɔsáyké ul tɛ̧̂w. Kú lá ŋgboro kɔ́ŋri̧ gbé ka ŋgɛ́rɛ a nûnalê a sa: «Káwa mbây a tísiri a ŋgɛŋnɛ́, ɓá ɓala a Gáŋmbây a manárí̧, rá̧ Kiris a mɛ̌, ké e kaw mbây mbii ka mbii.»

¹⁶Gáŋnjukuri bonsére a nɛŋ, a kaw tûl hɛ̧káwa mbây a kuriri a mbɛl a Gáŋvbôn, ɓá ŋgbɔŋ a kuriri si siri a ɗél Gáŋvbôn,

¹⁷a sa: «Gáŋmbây, Gáŋvbôn a kpɔ́ŋa tooy, mɔ̌ ka mɔ́ erú rú zi awá hí̧ mɔ́, ɓay ka mɔ tɔ́ʼɔ hɔ̧́na a kpɔ́ŋa a mɔ̌y ɓay mɔ́ kaw mbây.

¹⁸Njuku a tísiriri uru hɛ́rɛ a ŋgɛ́rɛ, dáy ŋgɛŋnɛ́ ɓá hɛ́rɛ a mɔ̌ pé kaw niŋ pénay, sêe walɓay kɔ̧ tûl a hûlri ka̧ dá. Sêe ka mɔ́ e hí̧ kpáʼandɔ̂ʼɔ péna a mɔ̌ ka̧ dá, hí̧ njukupéna mɔ̌ri̧ porofɛ́tri, rá̧ njukuri too ka ɓá a mɔ̌y, ka hɛʼɛ mɔ́y; gáŋnjukuri malé gun a léléri; ɓá nâm ka mɔ́ e ɓew njukuri ka ɓew káwa a tísiri!»

¹⁹Dáy, vûn a Gáŋvbôn a nûnalê ŋgburu, lé kú kó sandúku ŋgá̧nzáʼa a Gáŋvbôn a ɓilké. Nǎŋnɔ́ mbɔ̂m vbú hâ, ŋgboro kɔ́ŋri̧ gbé, mbɔ̂m pom, tísiri laŋ, gáŋ mbɔ̂m sá̧ri̧ tɔ́.