Read Capanahua Apokalipse 12 Bible Online

Apokalipse 12 - Capanahua bible

Apokalipse 12

¹Ŋgána a há̧na ɓá hɔ̧́náké tɛ̧́ a nûnalê: Wûny a há̧na ku mûn nɛ́ ka sêe, ka erú ka fêw a ɓil bɔʼɔ, rá̧ mbúli ka erú ka rôori bôo a sére ka tûlé.

²Ké erú a ɓil ɓay mbuŋa dáy, ɓil séna mbuŋáké ɓá nɛ́ vbá̧nzáʼa.

³Ŋgána a há̧na ɓáy tɛ̧́ gí a nûnalê: Gáŋ Daragɔŋ a há̧na ɓá sɛ́ŋɛ́, erú ka tûl zíndɔ̂ʼɔsáy, tɛ̧̂wri̧ bôo, rá̧ mbulí a tûl mbêw mbêw too.

⁴A sɛ̧̂w nɛ́, ké táʼa rôo a nûnalê ŋgboro mbêw a ɓil wálaké sáy too, fere kɔ̧ tísiri. Ké sé ew mbɛl a wûny rá̧ ka ɓay mbuŋay, ɓay a wûnyké mí mbuŋ lé, ké sɔ̧́ gunké.

⁵Wûnyké mbuŋ gun wɔ̧rɔ̧́njuku, ka e tɔ́ʼɔ ŋgboro hí̧ njuku a tísiriri too ka kâ̧w lari. Kú mbí gunké he sé gel a Gáŋvbôn rá̧ gelkáwa mbây a mɛ̌.

⁶Dáy wûnyké ŋgú sé lawkɔ́r, gel ka Gáŋvbôn mɔny ɓay ké kawrúy, ɓay kú mbé nɛ́ nâm kumrá̧ké mbêw ka ísɔ́t sére a bonzêe.

⁷Dáy bére tí a nûnalê. Aŋnze Mísɛl rá̧ aŋnze a mɛ̌ri̧ rúbére kuu Daragɔŋ. Daragɔŋ rá̧ aŋnze a mɛ̌ri̧ rúbére kuu kuriri kɔ́.

⁸Dáy kú ndé Daragɔŋ rá̧ aŋnze a mɛ̌ri̧ ka ŋgɛ́rɛ, nǎŋnɔ́ Daragɔŋ rá̧ aŋnze a mɛ̌ri̧, zi ziŋ gelkáwa a nûnalê mbaa.

⁹Kú ní gáŋ Daragɔŋké nɔ́ ɗere, mɛ̌ tâ̧w sôy, a kú ɗí ɓá zábolo rá̧ Sata̧n, ka rɔ́ʼɔ njuku a tísiriri too. Kú ní nɛ́ ɗere sé tísiri rá̧ aŋnze a mɛ̌ri̧.

¹⁰Falké, mi láɓay gbé a nûnalê ɓá: «Ŋgɛŋnɛ́ pɛ̧́na ka̧ dá. Gáŋvbôn a manárí̧ tɔ́ʼɔ kpɔ́ŋa rá̧ káwa mbây a mɛ̌ rá̧ kpɔ́ŋa a Kiris a mɛ̌. Ɓayhí̧lé, kú ní njuku kúŋɓay, mɛ̌ a kúŋɓay ka̧n nzáʼa nyîn a manárí̧ sû̧ŋ ka sêe a mbɛl a Gáŋvbôn, ɗere a nûnalê dá.

¹¹Nyîn a manárí̧ ndé nɛ́, ka ŋgboro a sêm a gun mbólé rá̧ ɓay a hɛ̧ri̧ a kú kó a sáy. Kú zi kó mûn a kuriri ka nɛ́rɛ̧ nyá, kú kaw ɗɛ́ŋ ɓay a hûl.

¹²Ɓaykénɔ́, i ri mûn a wǎyri, nûnalêri rá̧ wǎy njukuri ka nárú̧y! Dáy lelêe hí̧ tísiri rá mbii lúkí! Sata̧n ɗéré gé ɓá gel a wǎyri, mbá ka hɛ́rɛ, ɓayhí̧lé ké tu ɓá nâm a mɛ̌ zi tɛ̧́w yáŋ.»

¹³Gelka Daragɔŋ kó ɓá kú ní nɛ́ ɗere gí tísiri dáy, ké ní wûny ráy ka mbuŋ gun wɔ̧rɔ̧́njukuy.

¹⁴Wûnyké tɛ̧́ pɔ́rɔ sére a gáŋ ŋgákɔʼɔ ɓay zɔ sé gel a kú mɔny zoko nɛ́ ka lawkɔ́r ɓay a kawrú, a kú mbé nɛ́ mbimbɔ̂m sáy ka fêw zêe, ɓá ɗínáké kuu sôy.

¹⁵Dáy sôy mbuku mbii tɔ́ŋ ka̧ny a wûny ráy ɓá báŋa gáŋmbii ɓay ké nyá nɛ́.

¹⁶Dáy tísiri gí pɛ̧́ wûny ráy, a ŋgburu nzɛ́ʼɛ, a ta̧ ŋgɛ́rɛ mbii ka Daragɔŋ mbuku ka nzɛ́ʼɛy too.

¹⁷Dáy Daragɔŋ ɗí hɛ́rɛ kuu wûny ráy, a rekála sé rúbére kuu gázín î̧n a mɛ̌ri̧, rá̧ njukuri ka hɛʼɛ sáŋna a Gáŋvbôn a law mbêw rá̧ gbátɓay a Zezú ka sáy.

¹⁸Daragɔŋ sé ew tûl sikɔʼɛrɛ a gbaŋ mbii lúkí.