Read Capanahua Apokalipse 14 Bible Online

Apokalipse 14 - Capanahua bible

Apokalipse 14

¹Mi ɛ̧rɛ̧ gel ɓáy a kó Gun mbólé ka ew tûl kól Siyɔŋ, mɛ̌ rá̧ njukuri kumrá̧ké ísɔ́t mbêw ka bonɛŋ a nɛŋ, ka erú ka rɛŋɛ́ rá̧ rɛŋ a Bâa a mɛ̌, ka ɗé e ka ŋgbɔŋ kuriri.

²Mi láɓay gbé a nûnalê ɓá báŋa gáŋ súbuu, ɓá báŋa mbɔ̂m ka pom ka ŋgɛ́rɛ. Kɔ́ŋ ka mi láy, gbé ɓá báŋa nzáŋá a kú haŋ.

³Dawá njukuri nɔ́ ɗí si̧ŋ a fékéké a mbɛl hɛ̧káwa mbây rá̧ a mbɛl a hɛ̧ri̧ nɛŋ rá̧ gáŋnjukuri. Njuku a há̧na zi ma mbɛ́l si̧ŋ a fékéké nɔ́ nyá, mí tí yá lé, ɓá njukuri kumrá̧ké ísɔ́t mbêw ka bonɛŋ a nɛŋ nɔ́, ka gun mbólé zé kuriri ka tísiri.

⁴Njukuri nɔ́, zi ɓew mûn a kuriri kuu wûnynjuku yá, kú kaw ɓá táŋáké, kú tɔ́ŋ gun mbólé sé gel too a ké séy. Kú zé kuriri a bazeŋ a njukuri, ɓay kaw ɓá titíla njuku a kú hí̧ Gáŋvbôn rá̧ gun mbólé.

⁵Kú zi kúŋɓay bɔʼɔ mbêw yá, a zi niŋ hɛ̧ a manyáké yá.

⁶A falké, mi kó aŋnze a há̧na zɔ a sâa ɓá ɗínáké a ɓil kúna. Ké erú ka Bélaɓay ka ná dát, ɓay tɔ́ʼɔ hí̧ njuku a tísiriri too, pûri too, î̧nri̧ too, nzáʼaɓayri too rá̧ njukuri too.

⁷Ké vbá̧nzáʼa ɓá gbénáké a sa: «Í ŋgú wɔ́w a Gáŋvbôn, a í hí̧ nɛ́ hɔ̧́na, ɓayhí̧lé nâm walɓay a mɛ̌ kɔ̧ tûl a njukuri ka̧ dá. Í hɔ̧́ njuku ka mɔny wǎyri, nûnalê, tísiri, mbii lúkí rá pɔ̂ny mbiiri too.»

⁸Aŋnze a séreké tɔ́ŋ a titíláké a sa: «Ké lé dá, ké lé dá, Babilon a hɔ̧́náké! Ké ɓá vôn ɓéké péna niŋ dala a mɛ̌, nzó njukuri too!»

⁹Aŋnze a sáyké tɔ́ŋ a sérekéri a vbá̧nzáʼa ɓá gbénáké a sa: «Njuku ka hí̧ hɔ̧́na hí̧ sâ̧ny rá̧ têm mûn nɛ́, ka ziŋ ŋgána a mɛ̌ ka̧n ŋgbɔŋ malé ndɔ̂ʼɔ,

¹⁰mɛ̌ ka mûn nɛ́ kɔ́, ké e nzó vôn hɛ́rɛ a Gáŋvbôn, ka fere táŋ zuʼura kɔ̧ ɓil yoŋ hɛ́rɛ a mɛ̌. Njukuri too ka niŋ hɛ̧ nɔ́y, e ziŋ tɔ́ʼɔsêe a ɓil hɔrɛ rá̧ sôm saw hɔrɛ ka e rɛ́ŋ kuriri a mbɛl a aŋnze a táŋákéri rá̧ Gun mbólé.

¹¹Súkú hɔrɛ ka rɛ́ŋ kuriri e ɗú mbii ka mbii. A njukuri ka hí̧ hɔ̧́na hí̧ sâ̧ny rá̧ têm a mɛ̌y, rá̧ njukuri ka erú ka ŋgá̧na a rɛŋɛ́, kú tí ziŋ ɔʼɔ yá, sû̧ŋ ka sêe!»

¹²Ɓaykénɔ́, pé kú tɔ́ʼɔ ikilaw, njukuri ka ɓá njuku a Gáŋvbônri̧, ka a hɛʼɛ sáŋna a mɛ̌, ka a niŋ law mbêw kuu Zezú.

¹³A falké, mi lá ŋgboro kɔ́ŋ a há̧na gbé a nûnalê, a sa hí̧ mí ɓá mɔ́ ɗé ɓá: «Tí a ŋgɛŋnɛ́, béla hí̧ njukuri ka ziŋ hûl a ɓil péna a Gáŋmbây!» Nǎŋ pé Têm pukí say, nǎŋnɔ́, kú e ziŋ ɔʼɔ a ɓil ŋgɛ́rɛ péna a kuriri, ɓayhí̧lé béla a kú niŋ, tɔ́ŋ kuriri.

¹⁴Mi ɛ̧rɛ̧ gel ɓáy, a kó ɗaʼama a mbɔ̂m a pukí, dáy hɛ̧ a há̧na ɛ́ŋ njuku kaw ka tûlké. Ké hol mbúli a kú mɔny ka vbí̧rí̧lari, a ŋgbá kasaŋna ɓá únáké.

¹⁵Aŋnze a féké ɓáy tɛ̧́ ka vûn a Gáŋvbôn, dáy a saɓay ɓá gbénáké hí̧ njuku a ǎ̧w ka kaw tûl ɗaʼama a mbɔ̂m ɓá: «Mɔ́ mbí kasaŋna a mɔ̌, a lú hɛ̧pay, ɓayhí̧lé nâm ka̧, ɓay a lú hɛ̧pay a tísiri ka kpáʼay dá!»

¹⁶Dáy njuku ka kaw tûl ɗaʼama a mbɔ̂m, vbú kasaŋna gí tísiri, nǎŋnɔ́ hɛ̧pay ziŋ lúna a tísiri.

¹⁷Aŋnze a féké ɓáy tɛ̧́ a vûn a Gáŋvbôn a nûnalê. Mɛ̌ kɔ́, ké ŋgbá kasaŋna a únáké.

¹⁸Aŋnze a féké ɓáy ka erú ka kpɔ́ŋa a tûl a hɔrɛ, tɛ̧́ a nzáʼaká̧na a saɓay a ŋgɛ́rɛ hí̧ njuku a ǎ̧w ka ŋgbá kasaŋna a únáké ɓá: «Mɔ́ mbí kasaŋna únáké a mɔ̌, a mɔ́ kúŋ zúká léna ví̧nyɛ a tísiri, ɓayhí̧lé kpáʼa dá.»

¹⁹Dáy aŋnze mbí kasaŋna a mɛ̌, a kúŋ zúká léna ví̧nyɛ a tísiri, a fá̧ kɔ̧ ɓil gáŋ nîŋ hɛ́rɛ a Gáŋvbôn.

²⁰Kú ndáʼa rezɛ́ŋ ka bɔʼɔ a ɓil nîŋ ka fal pû, sêm tɛ̧́ a he gáŋ ma nzáʼa a dôn, ánaké e niŋ bɔʼɔséna ínáké ísɔ́t sáy.