Read Capanahua Apokalipse 15 Bible Online

Apokalipse 15 - Capanahua bible

Apokalipse 15

¹Falké, mi re kó ŋgána a há̧na ɓá hɔ̧́náké ka ná yér a nûnalê: Aŋnzeri zíndɔ̂ʼɔsáy, ŋgbá hɛ̧ lelêeri zíndɔ̂ʼɔsáy. Ɓá kɔ́rɔ́ lelêeri, ɓayhí̧lé hɛ́rɛ a Gáŋvbôn e tɔ́ʼɔ mûn nɛ́ ka ŋgboro a kuriri.

²Falké mi kó hɛ̧ a há̧na ɓá báŋa mbii lúkí ná ɛ́ŋ báŋa vɛ́r zuʼuru ka hɔrɛ. Njukuri ka ndé ŋgɛ́rɛ a sâ̧ny rá̧ têm a mɛ̌ rá̧ bon a rɛŋɛ́, ew tûl mbii lúkíké ka ná ɓá báŋa vɛ́r. Kú ŋgbá nzáŋári̧ ka Gáŋvbôn hí̧ kuriri.

³Kú ɗí si̧ŋ a Mɔyíze, njukupéna a Gáŋvbôn, rá̧ si̧ŋ a Gun mbólé kɔ́. Kú sa ɓá: «Gáŋmbây, Gáŋvbôn a kpɔ́ŋa tooy, péna a mɔ̌ri̧ hɔ̧́ a bel mambá! Mbây a njuku a tísiriri, ŋgboro a mɔ̌ri̧ ná ɓá ndáráké, a ɓá gbátké.

⁴Gáŋmbây, njuku a sí̧ tí ŋgú wɔ́w a mɔ̌ nyá lé? Njuku a sí̧ tí hí̧ mɔ́ hɔ̧́na nyá lé? Ɓayhí̧lé mɔ̌ mbêw yáŋ, pé kaw ɓá táŋáké, Njuku a tísiriri too e gí hɔ̧́ mɔ́, ɓayhí̧lé péna a ndáráké a mɔ̌ ná ɓá táŋáké hí̧ kuriri.»

⁵A falké, mi kó vûn a Gáŋvbôn ŋgburu a nûnalê, Tabɛrnákɛlɛ ŋgá̧nzáʼa a Gáŋvbôn erú.

⁶Nǎŋnɔ́ aŋnzeri zíndɔ̂ʼɔsáy ráy, ka ŋgbá hɛ̧ lelêeri zíndɔ̂ʼɔsáy, tɛ̧́ gí a ɓil vûn a Gáŋvbôn, kú ri laa lɛ̂ŋ a pukí ɓá fénáké, a ŋgá̧ tûl gári ka hɔ́ʼɔ tûl gári a kú mɔny ka vbí̧rí̧lari.

⁷Mbêw a bazeŋ a hɛ̧ri̧ nɛŋ nɔ́, hí̧ aŋnzeri zíndɔ̂ʼɔsáy ráy, yoŋ vbí̧rí̧lari zíndɔ̂ʼɔsáy mbá ka hɛ́rɛ a Gáŋvbôn, mɛ̌ a kaw dát mbii ka mbii.

⁸Ɓil vûn a Gáŋvbôn mbá ɓá súkú, ɓay tûl hɔ̧́na rá̧ kpɔ́ŋa a Gáŋvbôn. Njuku a há̧na zi ma gí ri ɓil vûnké yá, ka̧ ɔrɔ lelêeri zíndɔ̂ʼɔsáy nɔ́ ka aŋnzeri gírúy.