Read Capanahua Apokalipse 16 Bible Online

Apokalipse 16 - Capanahua bible

Apokalipse 16

¹A falké, mi lá ŋgboro kɔ́ŋ a há̧na gbé ka vûn a Gáŋvbôn a sa hí̧ aŋnzeri zíndɔ̂ʼɔsáy ɓá: «Í sé fere yoŋ hɛ́rɛ a Gáŋvbôn zíndɔ̂ʼɔsáy kɔ̧ tísiri.»

²Dáy titíla aŋnze sé fere yoŋ a mɛ̌ kɔ̧ tísiri. Nɔʼɔ dâ̧ny ɗere kɔ̧ tûl a njukuri ka erú ka ŋgána a sâ̧ny, a kaw ɗél têm a mɛ̌.

³Aŋnze a séreké sé fere yoŋ a mɛ̌ kɔ̧ mbii lúkí. Mbii fere ɓá báŋa sêm a hûl, dáy hɛ̧ri̧ too ka e a ɓil mbiiké hú.

⁴Aŋnze a sáyké fere yoŋ a mɛ̌ kɔ̧ tûl gáŋmbiiri rá̧ pɔ̂ny mbiiri dáy mbiikéri too fere tɛ̧́ sêm.

⁵Mi lá aŋnzeri ka erú ka kpɔ́ŋa a tûl a mbiiri sa: «Mɔ̌ kaw ɓá njuku a ndáráké, mɔ́ ka mɔ erú, mɔ́ tí erú, mɔ̌ njuku a táŋáké, ɓayhí̧lé mɔ́ tɔ́ʼɔ mûn nɔ́ ɓá mɔ kaw ɓá njuku walɓay a ndáráké.

⁶Ɓayhí̧lé njukuri fere sêm a njukuri mɔ̌ri̧ rá̧ porofɛ́t a mɔ̌ri̧, ŋgɛŋnɛ́ mɔ́ hí̧ kuriri sêm ɓá kú nzó, dáy kú marú̧!»

⁷Falké ŋgboro kɔ́ŋ a há̧na gbé ka nzáʼaká̧na a sa: «Katína Gáŋmbây, Gáŋvbôn a kpɔ́ŋa tooy, walɓay a mɔ̌ri̧ ɓá gbátké a ná ɓá ndáráké!»

⁸Aŋnze a nɛŋké fere yoŋ a mɛ̌ kɔ̧ tûl sêe, dáy a hí̧ nɛ́ kpɔ́ŋa ɓá ké rɛ́ŋ njukuri a hɔrɛ a mɛ̌.

⁹Dáy sêe zaŋ ka rɛ́ŋ njukuri. Kú fára rɛŋ a Gáŋvbôn ka erú ka kpɔ́ŋa sé tûl ɓékéhɛ̧ nɔ́rí̧y, a zi fere káwa a kuriri, ɓay hí̧ nɛ́ hɔ̧́na nyá.

¹⁰Aŋnze a ndíɓíké fere yoŋ a mɛ̌ kɔ̧ tûl hɛ̧káwa a sâ̧ny dáy pû mbây a mɛ̌ ɗere sé ɓil tirí̧ma. Njukuri tɔ́ʼɔsêe a sɔ̧́ sîl a kuriri,

¹¹kú fára Gáŋvbôn a nûnalê ɓay tûl tɔ́ʼɔsêe rá̧ nɔʼɔ dâ̧ny a kuriri. Dáy kú zi fere káwa a belyáké a kuriri yá.

¹²Aŋnze a zêeké fere yoŋ a mɛ̌ kɔ̧ ɓil gáŋmbii lúkí Efárate. Mbiiké ɔ̧ ɓay mɔny ŋgboro hí̧ mbâyri ka e gí ka ŋgboro a tɛ̧́na sêe.

¹³Falké, mi kó têm ɓékéri sáy, ɓá báŋa ŋgbɛ́rɛ́ri, tɛ̧́ ka nzáʼa Daragɔŋ, nzáʼa a sâ̧ny rá̧ nzáʼa porofɛ́t a manyákéri.

¹⁴Ɓá têm ɓéké nɔ́rí̧ pé niŋ hɛ̧sáʼama, pé a sé gel a mbây a tísiriri too rá̧lǒo kú mára̧ kuriri ɓay rúbére ka nâm hɔ̧́ná a Gáŋvbôn a kpɔ́ŋa tooy.

¹⁵Gáŋmbây sa í lá: «Mi e gí ɓá báŋa ríwa. Béla hí̧ njukuri ka rɔ̧́ ka a koro gári a kuriri rá̧lǒo kú zi há̧ra̧ mûn baa rá̧ sɔ̧rɔ̧ ké sé kuriri yá.»

¹⁶Têm ɓéké mára̧ mbâyri kɔ̧ gel a kú ɗí ka nzáʼa Hebiré ɓá Harmagedɔ̂ŋ.

¹⁷Aŋnze a zíndɔ̂ʼɔsáyké fere yoŋ a mɛ̌ kɔ̧ ɓil kúna. Ŋgboro kɔ́ŋ a há̧na gbé ka ɓil vûn a Gáŋvbôn, ké gbé gí ka gelkáwa mbây a sa: «Ŋgɛŋnɛ́ ɔ dá!»

¹⁸Mbɔ̂m vbú hâ, kɔ́ŋ a há̧narí̧ gbé, mbɔ̂m pom, tísiriri laŋ ka ŋgɛ́rɛ, mára̧ láŋa a tísiriké zi niŋ bɔʼɔ mbêw yá ɓáy, tí ka njuku e a tísiri.

¹⁹Gáŋ pû wal ɓilké sáy, pû a njuku a tísiriri too gbɛʼɛrɛ. Gáŋvbôn zi yɛʼɛrɛ Babilon a hɔ̧́náké yá, a ɓá yoŋ vôn nzó nɛ́, vôn a gáŋ hɛ́rɛ a mɛ̌.

²⁰Tûlkɔ̂ɔri too ɓɔ́la, rá̧ konri̧ kú zi kó kuriri mbaa.

²¹Gáŋ sá̧ri̧ ka zínáké ma niŋ kílo bonɛŋ a sére, fere a nûnalê kɔ̧ tûl a njuku a tísiriri. Dáy njukuri fára Gáŋvbôn ɓay a tûl lelêe a sá̧ri̧ nɔ́. Ɓayhí̧lé lelêeké ka niŋ, ndé ŋgɛ́rɛ.