Read Capanahua Apokalipse 17 Bible Online

Apokalipse 17 - Capanahua bible

Apokalipse 17

¹Dáy mbêw a bazeŋ a aŋnzeri zíndɔ̂ʼɔsáy ka ŋgbá yoŋ zíndɔ̂ʼɔsáy, gí sa hí̧ mí ɓá: «Mɔ́ gí a mi tɔ́ʼɔ mɔ́ báŋké a kú e walɓay kɔ̧ tûl a mágána, rá̧ gáŋ pû a kú mbó ka̧n gbaŋ gáŋmbiiri.

²Mbây a tísiriri lé ɓil niŋ dala kuu mɛ̌, nǎŋnɔ́ njuku a tísiriri too tá vôn dala a mɛ̌!»

³Têm Pukí ri mí dáy aŋnze mbí mí sé lawkɔ́r. A goló mi gé kó wûny a há̧na kaw tûl a sâ̧ny ɓá sɛ́ŋɛ́. Sâ̧nyké erú ka tûl zíndɔ̂ʼɔsáy rá̧ tɛ̧̂w bôo, kú ɗé rɛŋ fára a Gáŋvbôn kɔ̧ mûn a sâ̧nyké.

⁴Wûnyké ri gári lari ɓá sɛ́ŋɛ́, ké erú ka hɛ̧ búla mûn a kú mɔny ka vbí̧rí̧lari, saw ka erú ka nɛ́rɛ̧ rá̧ zaw. Ké ŋgbá yoŋ a kú mɔny ka vbí̧rí̧lari, mbá ka hɛ̧ a táŋnyákéri, ka gí ka ŋgboro a péna niŋ dala a mɛ̌.

⁵A nzáʼa ŋgbɛ́ŋɛ́, kú ɗé rɛŋ a há̧na erú, táŋáké ná ɓá múnáké: «Babilon a hɔ̧́náké, mâa a wûny niŋ dalari rá̧ hɛ̧ a belyáké a tísiriri.»

⁶Mi kó, wûnyké távôn sêm a njuku a Gáŋvbônri̧, njukuri ka ziŋ hûl ɓay tûl a Zezú, a ké nzóy. Gelka mi kó nɛ́y, mi kaw yér.

⁷Dáy aŋnze sa hí̧ mí: «Ɓayhí̧ rá̧ mɔ́ kaw yér lé? Mi e tɔ́ʼɔ hɛ̧ a múnáké ka tûl a wûny nɛ́ rá̧ sâ̧ny ka hol nɛ́y, mɛ̌ ka erú ka tûl zíndɔ̂ʼɔsáy rá̧ tɛ̧̂w bôo.

⁸Sâ̧ny nɔ́ ka mɔ kóy, erú í̧ŋásá̧, dáy a ŋgɛŋnɛ́ ké tí mbaa. Ké e tɛ̧́ a ɓil pɔ̂ny ka kɔ́rɔ́ké zi tí yáy, ɓay sé ɓil ɓɔ́la a mɛ̌. Njuku a tísiriri a tí ka sêe a kú mɔny tísiri, a kú zi ɗé rɛŋ a kuriri kɔ́ ɓil mbété a ndísɛ̌ʼɛ yá, e kó sâ̧nyké, a kaw yér. Ɓayhí̧lé, í̧ŋásá̧ ké kaw ka nûn, dáy a hú dá, ŋgɛŋnɛ́ ké retɛ̧ gí.

⁹A gelé vbí hɛ̧túna rá̧ rɔ̧́na. Tûl zíndɔ̂ʼɔsáy nɔ́rí̧, ɓá kolri zíndɔ̂ʼɔsáy ka wûny kaw tûlké. Tûl nɔ́rí̧, ɓá mbâyri zíndɔ̂ʼɔsáy kɔ́.

¹⁰Ndiɓi a bazeŋ a kuriri, mbêw kaw ɓá mbây a ŋgɛŋnɛ́. A zíndɔ̂ʼɔsáyké pa̧n gí yá ɓáy. Dáy ké mí gí, ké ná mbây tí ɗí ɓǎŋ nyá.

¹¹Sâ̧ny ka tí erú rá̧ ka a retí mbaay, mɛ̌ ka mûn nɛ́ ké ɓá mbây a zíndɔ̂ʼɔséreké. Ké kaw ɓá mbêw a bazeŋ a mbâyri zíndɔ̂ʼɔsáy nɔ́, dáy a mbí ŋgboro ɓɔ́la, mɛ̌ kɔ́.

¹²Tɛ̧̂wri̧ bôo nɔ́, ka mɔ́ kóy ɓá mbâyri bôo, ka ná mbây yá ɓáy. Kú e ná mbây kuu sâ̧ny ka̧ sɛl a sêe mbêw.

¹³Mbâykéri bôo too erú ka kɛrɛ a mbêwké: Kú mbí ŋgɛ́rɛ rá̧ kpɔ́ŋa a kuriri a niŋ péna hí̧ sâ̧ny.

¹⁴Kú e rúbére kuu Gun mbólé dáy Gun mbólé e ndé kuriri, ɓayhí̧lé ké kaw ɓá Gáŋmbây a gáŋmbâyri, Mbây a mbâyri. Nǎŋnɔ́ ké e ndé kuriri, mɛ̌ kuu njukuri a ké ɗíy, njukuri a ké tén rá̧ njukuri ka niŋ law mbêw kuu mɛ̌y.»

¹⁵Aŋnze sa hí̧ mí ɓáy ɓá: «Mbiiri ka mɔ́ tí kóy, ka wûny niŋ dala ewrúy. Ɓá njuku pûri, njukuri, njuku a tísiriri rá̧ nzáʼaɓayri ɓórí ɓórí.

¹⁶Tɛ̧̂wri̧ bôo nɔ́ ka mɔ́ kó rá̧ sâ̧ny nɔ́ e fɔny wûny niŋ dala nɔ́. Kú e naʼa hɛ̧zíŋa a mɛ̌ too, a pɔŋ nɛ́ kaw táŋ laa, kú e sɔ̧́ hay mûn nɛ́ ka rɛ́ŋ gáráké ka hɔrɛ.

¹⁷Ɓayhí̧lé Gáŋvbôn ɓá kɛrɛ niŋ hɛ̧ a ké ziy ka̧n law a kuriri. Kú e mára̧ kɛrɛ a kuriri mbêw ɓay kú ɓá kpɔ́ŋa a kuriri hí̧ sâ̧ny, ka̧ sêe ka ɓay ka Gáŋvbôn sáy, ké niŋ ɓá báŋké.»

¹⁸Wûny nɔ́ ka mɔ kóy, ɓá gáŋ pû ka erú ka kpɔ́ŋa ka tûl a mbây a tísiriri.