Read Capanahua Apokalipse 18 Bible Online

Apokalipse 18 - Capanahua bible

Apokalipse 18

¹A falké nɔ́, mi kó aŋnze a há̧na ɗere gí a nûnalê. Ké erú ka gáŋ kpɔ́ŋa, hɔ̧́ná a mɛ̌ táŋgel ka tísiri too.

²Ké vbá̧nzáʼa ɓá gbénáké a sa: «Ké lé dá, ké lé dá, Babilon a hɔ̧́náké. Ŋgɛŋnɛ́ ɓá gel nâm a vbônri̧, gel múna a têm ɓékéri ɓórí ɓórí. A goló pé ndoyri rá̧ sâ̧ny a táŋnyákéri ɓórí ɓórí ka fa̧tûl nárí̧.

³Njuku tísiriri too nzó vôn gána a mɛ̌. Mbây a tísiriri too lé ɓil niŋ dala kuu mɛ̌, rá̧ njuku niŋ sɔ́ʼɔ a tísiriri tɛ̧́ njuku hɛ̧zíŋári̧, a tûl gáŋ hɛ̧zíŋa a mɛ̌.»

⁴Falké, mi lá ŋgboro kɔ́ŋ a féké gbé gí a nûnalê a sa: «Njuku a mǐri̧, í tɛ̧́ a ɓil pûké ɓay a í zi ná ri ɓil ɓékéhɛ̧ kuu mɛ̌, rá̧ í lé ɓil lelêe ka e ziŋ nɛ́ nyá.

⁵Ɓayhí̧lé, ɓékéhɛ̧ a mɛ̌ mára̧ a gáŋ ka̧ nûnalê dáy Gáŋvbôn zi yɛʼɛrɛ ɓéké péna a mɛ̌ri̧ nyá.

⁶Í niŋ nɛ́ ɓá báŋké a ké niŋ ziŋ njukuri, í niŋ nɛ́ bɔʼɔ sére ɓá báŋa hɛ̧ a ké niŋ. Í ɓá vôn a ŋgbɔ́rɔké mbá kuu a mɛ̌ ɓá ŋgɛ̧́náké bɔʼɔ sére, ké ndé a njukuri a ké ɓá nzó kuriri.

⁷Í ɓá nɛ́ tɔ́ʼɔsêe ka ɓékéhɛ̧ri̧ ɓá ŋgɛ̧́náké ɓá báŋké, a ké hí̧ tûlé hɔ̧́na, a ɓá tûlé ri ɓil gáŋ hɛ̧zíŋa. Ké kɛrɛ ka lawɛ́ ɓá: “Mi kaw gelé ɓá mbây, mi zi tí ɓá wûnysêe yá, a tí káwa gel hûl bɔʼɔ mbêw yá!”

⁸Ɓaykénɔ́, hɛ̧ lelêe nɔ́rí̧ too ka mɔny zoko nɛ́y, e ɗere kɔ̧ tûlé sêe mbêw yáŋ: hûl, gel hûl rá̧ nzala; ké e gbɛʼɛrɛ ka hɔrɛ. Ɓayhí̧lé, ké erú ka kpɔ́ŋa, Gáŋmbây, Gáŋvbôn ka walɓay kɔ́ tûléy.»

⁹Mbây a tísiriri too ka lé ɓil niŋ dala kuu mɛ̌, ka a ziŋ hɛ̧ ka tûl gáŋ hɛ̧zíŋa a mɛ̌y, e vú a órómûn a kuriri ɓay a mɛ̌, gelka kú e kó súkú hɔrɛ ka rɛ́ŋ pûkéy.

¹⁰Kú ew ɓá ɗínáké ka wɔ́w a tɔ́ʼɔsêe ka ziŋ nɛ́y, ka e sa ɓá: «Lelêe! Lelêe! Babilon, gáŋ pû ka erú ka kpɔ́ŋa mambáy! Sɛl a sêe mbêw yáŋ, ma ɓay a Gáŋvbôn, ké walɓay kɔ̧ tûlóy!»

¹¹Njuku niŋ sɔ́ʼɔ a tísiriri kɔ́, vú, ka órómûn a kuriri ɓay a mɛ̌, ɓayhí̧lé njuku zé hɛ̧sɔ́ʼɔ a kuriri zi tí mbaa:

¹²vbí̧rí̧lari malé lari, sawri ka erú ka nɛ́rɛ̧ malé zaw, malé béla gári lɛ̂ŋ, gári lari sɛ́ŋɛ́ a fénáké rá̧ gári a kú ɗí ɓá súwá, diiri ka ziŋáké lá mambáy, rá̧ mára̧ hɛ̧ri̧ ɓórí ɓórí a kú mɔny ka sîl mbali, hɛ̧ri̧ a kú mɔny a béla diiri, boroŋnze, wɛ̧̂ɛ rá̧ saw a kú ɗí ɓá marbɛrɛ,

¹³hoydiiri rá̧ goydiiri ka fɔ̧ ɓá báŋa yámbó, mára̧ yámbóri, mîr rá̧ nɛ́rɛ̧dii, vôn, mára̧, sôm rá̧ bulé, ndayri rá̧ mbóléri, donri̧ rá̧ hotó béreri, koyri rá̧ njukuri a kú ŋgbá kuriri ɓá koy béreri kɔ́.

¹⁴Kú sa hɛ̧ri̧ too ka mɔ́ zi ɓayké, ɓɔ́l ka goló dá, hɛ̧zíŋa rá̧ béla káwa a mɔ̌ri̧ ɓɔ́l too dá, kú ma ziŋ kuriri bɔʼɔ mbêw mbaa.

¹⁵Njukuri ka tɛ̧́ njuku hɛ̧zíŋári̧ ka ŋgboro niŋ sɔ́ʼɔ ka pûké, e ew ɓá ɗínáké ka wɔ́w a tɔ́ʼɔsêe ka ziŋ nɛ́y. Kú e vú ka órómûn a kuriri.

¹⁶Ka e sa ɓá: «Lelêe! Lelêe hí̧ ziŋ gáŋ pû lé! Ké ri gári lari lɛ̂ŋ ɓá sɛ́ŋɛ́ ɓá fénáké, ka búla mûn nɛ́ ka hɛ̧ri̧ a kú mɔny ka vbí̧rí̧lari, saw ka erú ka nɛ́rɛ̧ rá̧ zawri.

¹⁷Dáy sɛl a sêe mbêw yáŋ, ma ɓáy ɓew hɛ̧zíŋáké too!» Gáŋnjuku ŋgú batôri, njukuri ka niŋ péna a ɓilké, njuku sé gɔ́rɔ́ri a e ɓil batôri too rá̧ njukuri too ka kaw ku̧ma hɛ̧ri̧ a ɓilkéri ew ɓá ɗínáké,

¹⁸a kú kɔ́ súkú hɔrɛ ka rɛ́ŋ gáŋ pû a vbá̧nzáʼa a sa: «Pû a sí̧ hɔ̧́ ɓá báŋa gáŋ pû nɛ́ lé?»

¹⁹Kú fá̧ sôm a siri, a fere kɔ̧ tûl a kuriri, a vú ka órómûn a kuriri a sa: «Lelêe! Lelêe hí̧ ziŋ gáŋ pû lé! Ka ŋgboro a hɛ̧zíŋa a mɛ̌, pé njukuri too ka e a batôri a tûl mbii nɛ́, tɛ̧ njuku hɛ̧zíŋári̧, dáy a ɓil sɛl a sêe mbêw yáŋ, hɛ̧zíŋákéri too gbɛʼɛrɛ!»

²⁰Nûnalê, mɔ́ záy ɓay tûl ɓewa a mɛ̌! Í záymûn a wǎyri njuku a Gáŋvbônri̧, apotereri rá̧ porofɛ́tri! Ɓayhí̧lé Gáŋvbôn walɓay kɔ́ tûlé ɓay a ɓékéhɛ̧ a ké niŋ ziŋ wǎyri!

²¹Dáy aŋnze a féké ka erú ka kpɔ́ŋa, mbí saw ka ɛ́ŋ gáŋ nîŋ, a ɓá vbú gí ɓil mbii lúkí a sa: «Nǎŋnɔ́ pé kú e ɓá gáŋ pû a Babilon vbú kpâa ka ŋgɛ́rɛ dáy njuku a há̧na tí kó nɛ́ mbaa wɔm.

²²Kú tí lá, njuku haŋ nzáŋá, njuku ɗí si̧ŋ malé njuku ul madokâ̧w rá̧ tɛ̧̂w a goló mbaa. Kú tí lá njuku fɛ́l hɛ̧ malé lá gárá nîŋ náŋ bulé mbaa.

²³Hɔrɛ lámbe tí táŋ ka pû a mɔ̌ mbaa, kú tí lá kɔ́ŋ a njuku nyá wûny a ŋgɛŋkéri a goló yá. Hɛ̧ nɔ́ ka̧, ɓayhí̧lé njuku niŋ sɔ́ʼɔ a mɛ̌ri̧ kaw ɓá gáŋnjukuri ka e ka nɛ́rɛ̧ mambá a tísiri, nǎŋnɔ́ ka ŋgboro péna niŋ nda̧m a mɔ̌, pé mɔ́ rɔ́ʼɔ njuku a tísiriri too ɓɔ́l.»

²⁴Ɓayhí̧lé njukuri ziŋ a goló; a Babilon, sêm a porofɛ́tri, njuku a Gáŋvbônri̧ rá̧ sêm mûn a njukuri too a kú í kuriri a tísiri.