Read Capanahua Apokalipse 19 Bible Online

Apokalipse 19 - Capanahua bible

Apokalipse 19

¹A falké, mi lá a nûnalê kɔ́ŋ a há̧na gbé ɓá báŋa ɓala a njukuri ɓá dawáké ɓá: «Aleluya! Ɗéla hí̧ Gáŋvbôn! Pɛ̧́na, hɔ̧́na rá̧ kpɔ́ŋa ɓá a Gáŋvbôn a manárí̧!

²Ɓayhí̧lé walɓay a Gáŋvbônri̧ ɓá gbátké, ka ná ɓá ndáráké! Ké walɓay kɔ̧ tûl a mágána ka rɔ́ʼɔ njuku a tísiriri ka ŋgboro a niŋ dala a mɛ̌. Gáŋvbôn káŋ tûl a njukupéna a mɛ̌ri̧ a kú íy, a revbí sêm mûn a kuriri a ɓil ndɔ̂ʼɛ.»

³Dáy njukukéri sa ɓáy a bɔʼɔ séreké ɓá: «Ɗéla hí̧ Gáŋvbôn! Lé súkú hɔrɛ a gáŋ pû ka rɛ́ŋ, uru mbii ka mbii.»

⁴Dáy kpɔʼɔrɔ́ri bonsére a nɛŋ rá̧ hɛ̧ nɔ́rí̧ ka nɛŋ huku tísiri, a hɔ̧́ Gáŋvbôn, ka kaw tûl hɛ̧káwa mbây a sa: «Amɛn! Ɗéla hí̧ Gáŋvbôn!»

⁵Kɔŋ a há̧na gbé gí ka tûl hɛ̧káwa mbây ɓá: «Í hí̧ ɗéla hí̧ Gáŋvbôn a manárí̧, wǎy njukupéna a mɛ̌ri̧ too, wǎyri ka i hɛʼɛ nɛ́, gáŋnjukuri kuu gun a léléri!»

⁶Lé mi lá ɓá báŋa ɓala a njukuri ɓá ŋgɛ̧́náké, ɓá báŋa gbéna a súbuu rá̧ ɓá báŋa mbɔ̂m ka pom ka ŋgɛ́rɛy, ɓá: «Ɗéla hí̧ Gáŋvbôn! Ɓayhí̧lé Gáŋmbây, Gáŋvbôn a manárí̧ ka erú ka kpɔ́ŋa tooy, tí ná mbây a mɛ̌ dá!

⁷Ná záy a rí mûn a manárí̧, a ná hí̧ nɛ́ hɔ̧́na! Ɓayhí̧lé nâm nyá wûny a Gun mbólé ka̧ dá, dáy wûny nyá wɔ̧rɔ̧́ké mɔny mûn nɛ́.

⁸Kú hí̧ nɛ́ béla gári lɛ̂ŋ, ka fe ndéeré ndéeré ɓá táŋáké,» (ɓayhí̧lé béla gári lɛ̂ŋ, ná ɓá báŋa péna a táŋáké a njuku a Gáŋvbônri̧.)

⁹Dáy aŋnze sa hí̧ mí: «Mɔ́ ɗé: Béla hí̧ njukuri a kú ɗí kuriri gí gel lâʼa nyá wûny a Gun mbólé!» Ké resa hí̧ mí ɓá: «Ɓay nɔ́rí̧, ɓá gbátɓay a Gáŋvbôn.»

¹⁰Mi huku tísiri a mbɛlɛ́ ɓay a hɔ̧́ nɛ́, lé ké sa hí̧ mí ɓá: «Mɔ́ niŋ nǎŋ nyá! Mi ɓá njukupéna ɓá báŋa a mɔ̌ rá̧ nyîn nɔ́rí̧ ka ŋgbá gbátɓay ka Zezú tɔ́ʼɔ. Mɔ́ hí̧ hɔ̧́na hí̧ ɓá Gáŋvbôn!» Ɓayhí̧lé gbátɓay ka Zezú tɔ́ʼɔ, pé hí̧ hɛ̧túna a porofɛ́tri.

¹¹Falké mi kɔ́ nûnalê a ŋgburaké, lé dôn ɓá pukí tɛ̧́. Njuku ka he kaw tûlké, rɛŋɛ́ ɓá Njuku law mbêw rá̧ Gbát njuku. Ké walɓay ka rúbére ka ŋgboro a ndáráké.

¹²Nûn nɛ́ ná ɓá báŋa rêm hɔrɛ, ké erú ka tûlé, mbúli ɓá ŋgɛ̧́náké, rɛŋ a há̧na ɗé ka̧n mûn nɛ́, njuku túnáké zi tí yá ɓá mɛ̌ hɛʼɛ pé tu táŋa a rɛŋké.

¹³Ké ri gáŋ gári ka sêm sá̧ rúy. Rɛŋɛ́ ɓá: «Ɓay a Gáŋvbôn.»

¹⁴Ŋgawbéreri a nûnalê tɔ́ŋ nɛ́ ka dôn pukí, kú ri béla gárí lɛ̂ŋ ɓá pukí ɗɛ́ŋ.

¹⁵Gá̧má tûlké pɛ́rɛp tɛ̧́ ka nzɛ́ʼɛ, ɓay vbé njuku a tísiriri. Ké e tɔ́ʼɔ ŋgboro hí̧ kuriri ka kpɔ́ŋa ka̧w lari, dáy ké e ndáʼa ɓil nîŋ a ha̧ vôn gáŋ hɛ́rɛ a Gáŋvbôn ka ndé ka kpɔ́ŋa tooy.

¹⁶Ka tûl gáŋ gári rá̧ tûl hólé, kú ɗé ka̧nrú̧ ɓá: «Mbây a mbâyri rá̧ Gáŋmbây a gáŋmbâyri.»

¹⁷Falké mi kó aŋnze a há̧na ew ka nûn sêe. Ké vbá̧nzáʼa ɓá gbénáké a sa hí̧ ndoyri too ka zɔ ɓá ɗínáké ka sâa ɓá: «Í gí, a í mára̧ há̧narí̧ ɓay a gáŋ mára̧ záymûn a Gáŋvbôn!

¹⁸Í gí sɔ̧́ hay mûn a mbâyri, hay mûn a mbây a ŋgawbéreri rá̧ ŋgawbéreri, hay dônri̧ rá̧ hay mûn a njuku he tûlkéri, hay mûn a njukuri too, koyri rá̧ njukuri ka zi tí ɓá koyri yáy, gun a léléri rá̧ gáŋnjukuri.»

¹⁹Lé, mi kó sâ̧ny rá̧ mbây a tísiriri, kuu ŋgawbére a kuriri mára̧ há̧narí̧, ɓay a rúbére kuu njuku ka he kaw tûl dôn rá̧ ŋgawbére a mɛ̌ri̧.

²⁰Kú ŋgbá sâ̧ny rá̧ porofɛ́t a manyáké, ka niŋ hɛ̧sáʼama a mbɛl a sâ̧ny nɔ́, ka a rɔ́ʼɔ njukuri ka ziŋ ŋgána a sâ̧ny ka mûn a kuriri, ka hɔ̧́ têm a sâ̧nyké. Kú vbú sâ̧ny rá̧ porofɛ́t a manyáké nɔ́, kɔ̧ ɓil fâ̧w hɔrɛ.

²¹Ŋgawbéreri too ziŋ hûl ka gá̧má ka tɛ̧́ ka nzáʼa a njuku ka kaw tûl dôn, nǎŋnɔ́ ndoyri too lâʼa hay mûn a kuriri.